အာဆင်နယ်အသင်းနဲ့ ၂-၂ သရေကျခဲ့ပြီးနောက် ဝက်တ်ကင်းက အာဆင်နယ်ရဲ့တတိယဂိုးနဲ့ပတ်သက်ပြီး မိမိတို့ကံကောင်းခဲ့တယ်လို့ အခိုင်အမာပြောကြားလိုက်ပါတယ်။ အာဆင်နယ်ဟာ ဗီလာကို မာတီနယ်လီ ၊ ဟာဗက်ဇ်တို့ရဲ့ဂိုးတွေနဲ့ ဦးဆောင်နိုင်ခဲ့ပေမယ့် ဗီလာအသင်းက တိုင်လီမန်းစ် ၊ ဝက်တ်ကင်းတို့ရဲ့ဂိုးတွေနဲ့ ပြန်လာနိုင်ခဲ့တာဖြစ်ပါတယ်။

တစ်ဖက်မှာ လီဗာပူးအသင်းက ဘရန့်ဖို့ဒ်ကိုအနိုင်ရခဲ့တာကြောင့် အာဆင်နယ်အနေနဲ့ ဗီလာကိုအနိုင်ကန်နိုင်ဖို့ လိုအပ်ခဲ့တာဖြစ်ပါတယ်။ ဒါပေမယ့်လည်း အာဆင်နယ်ရဲ့တတိယဂိုးကို VAR က လက်ထိဘောအဖြစ်သာ သတ်မှတ်ခဲ့တာကြောင့် အဖိုးတန်အနိုင် ၃ မှတ်နဲ့ လွဲချော်ခဲ့ပါတယ်။ ပွဲအပြီးမှာ ဝက်တ်ကင်းက အဆိုပါဆုံးဖြတ်ချက်ဟာ မှန်ကန်တဲ့ဆုံးဖြတ်ချက်လားဆိုတာ မသေချာပေမယ့် မိမိတို့အသင်းအတွက်တော့ အကျိုးရှိခဲ့တယ်လို့ ပြောကြားခဲ့ပါတယ်။

“နောက်ကျောကနေ မြင်ရတာက မသေချာပါဘူး။ အဲ့တာက ကျွန်တော်တို့ကို မျက်နှာသာပေးခဲ့တယ်လို့ ထင်ပါတယ်။တကယ်လို့ မျက်နှာသာမပေးခဲ့ရင် ကျွန်တော် စိတ်ပျက်မိမှာပါ။အဲ့ရှုထောင်ကနေ ကျွန်တော် တပ်အပ်တော့ မပြောနိုင်ပါဘူး။ ဒါပေမယ့် VAR ရှိနေပါတယ်။ ကျွန်တော်တို့ တိုင်လီမန်းစ်ဆီကနေ ဂိုးတစ်ဂိုးရခဲ့ပြီးနောက် ပြန်လာနိုင်ခဲ့တာဖြစ်ပါတယ်။ အဲ့အရှိန်ကပဲ ကျွန်တော်တို့ကို ချေပဂိုးတွေရလာစေတာပါ။ အာဆင်နယ်က တစ်ဦးချင်းလူကပ်ကစားခဲ့တာပါ။ ဂါဘရီရယ်က ကျွန်တော့်ကိုလူကပ်ပြီး ပါတေးက ဂျာကော့တ်ကို ကပ်ထားခဲ့ပါတယ်။ အဲ့လိုအနေအထားမျိုးဖြစ်နေပေမယ့် ပထမပိုင်းအပြီးမှာ ကျွန်တော်တို့ ပိုကောင်းလာပါတယ်။ အခွင့်အရေးတွေရခဲ့တာကလည်း အာဆင်နယ်က အနည်းငယ်ခံစစ်ကစားတာ လျော့ရဲနေလို့ပါ”လို့ ဝက်တ်ကင်းက ပြောကြားခဲ့ပါတယ်။

အခုသရေပွဲကြောင့် အာဆင်နယ်ဟာ လီဗာပူးအသင်းနဲ့ အမှတ်အနည်းငယ်ကွာဟခဲ့ပြီဖြစ်ပါတယ်။ ဟာဗက်ဇ်ရဲ့ဂိုးနဲ့ပတ်သက်ပြီး ပေါလ်မာဆင်က ဂိုးပေးခဲ့သင့်တယ်လို့ ထောက်ပြခဲ့ပါတယ်။ “ဟာဗက်ဇ်ဂိုးမပေးခဲ့တာကို ကျွန်တော် မယုံကြည်နိုင်ဖြစ်ရပါတယ်။ ဘောလုံးက သူ့လက်ကိုလာထိတာဖြစ်ပြီး သူက ရပ်နေခဲ့တာပါ။ အခုအခြေအနေက ချန်ပီယံရှစ်မှာဆိုရင် ကျွန်တော် နားလည်ပေးနိုင်ပါတယ်။  VAR မရှိတာကြောင့် ချန်ပီယံရှစ်မှာဖြစ်ခဲ့တာဆိုရင် တစ်မျိုးပါ။ အခုအခြေအနေက အရမ်းလည်း ပြင်းထန်တဲ့အနေအထားမဟုတ်ပါဘူး”လို့ မာဆင်က ပြောကြားခဲ့ပါတယ်။ အာဆင်နယ်ဟာ အခုပွဲအပြီးကြားရက်မှာ ချန်ပီယံလိဂ်ပွဲအဖြစ် ဒိုင်နမိုဇာဂရက်အသင်းနဲ့ရင်ဆိုင်ရမှာဖြစ်ပြီး ဗီလာက မိုနာကိုအသင်းနဲ့ရင်ဆိုင်ရမှာဖြစ်ပါတယ်။