ပီအက်စ်ဂျီစတား ဗီတင်ဟာက ဘာပေမရှိပေမယ့် မိမိတို့အသင်းဘာကြောင့် ပိုကောင်းလာလဲဆိုတာကို ရှင်းပြလိုက်ပါတယ်။ ပီအက်စ်ဂျီဟာ ၂၀၁၇ တုန်းက နေမာကို ကမ္ဘာ့စံချိန်တင်ပြောင်းရွှေ့ကြေးနဲ့ခေါ်ယူခဲ့သလို အဲ့တစ်နှစ်တည်းမှာပဲ ဘာပေကိုပါခေါ်ယူခဲ့ပါတယ်။ ၄ နှစ်အကြာမှာ ပီအက်စ်ဂျီက မက်ဆီကို ထပ်မံခေါ်ယူခဲ့တာဖြစ်ပါတယ်။ အဲ့နောက် မက်ဆီ နဲ့ နေမာတို့ အသီးသီးထွက်ခွာခဲ့ကြပြီး ဘာပေကလည်း ၂၀၂၄ ခုနှစ်မှာ ရီးရဲလ်အသင်းထံပြောင်းရွှေ့ခဲ့ပါတယ်။

ဘာပေမရှိတဲ့နောက်မှာ ပီအက်စ်ဂျီက မတူညီတဲ့လမ်းကြောင်းပေါ်ပြောင်းလဲလာခဲ့ပါတယ်။ တိုင်းမ်စ်သတင်းဌာနနဲ့အင်တာဗျူးမှာ ဗီတင်ဟာက “ကျွန်တော်တို့ ပြဿနာအကြောင်းမပြောဖြစ်ပါဘူး။ ဘာပေပက အကောင်းဆုံးကစားသမားတွေထဲကတစ်ယောက်ပါ။ အဲ့တာက ခက်ခဲမယ်ဆိုတာ ကျွန်တော်တို့သိပါတယ်။

ခင်ဗျားအနေနဲ့ သူ့နေရာကို တိုက်ရိုက်အစားမထိုးနိုင်ပါဘူး။ ဒါပေမယ့် အသင်းကတော့ သူ့နေရာကို အစားထိုးနိုင်ပါတယ်။ ဒါက ကျွန်တော်တို့လုပ်ဆောင်ခဲ့တာပါ။ ဒါပေမယ့် အချိန်တော့ယူရပါမယ်။ ကျွန်တော်တို့ တစ်စုတစ်စည်းတည်းဆိုပိုကောင်းလာနိုင်ပါတယ်။ အဲ့တာကိုလည်း ပြသထားပြီးပါပြီ။ တစ်ချို့အချိန်တွေမှာ ဂိုးတွေမရပေမယ့် အများကြီးတိုးတက်လာတာတွေရှိပါတယ်။

မက်ဆီအပါအဝင် ကမ္ဘာ့အကောင်းဆုံးတွေနဲ့ တွဲကစားခွင့်ရတာက အိပ်မက်လိုပါပဲ။ အဲ့တာက တကယ့်အစစ်လို့ အချိန်အတော်ကြာ မခံစားခဲ့ရပါဘူး။ သူတို့မရှိတော့တာက မလွယ်ပါဘူး။ ပွဲတော်တော်များများမှာ ခက်ခဲပါတယ်။ ဒါပေမယ့် အဲ့တာကို ကျွန်တော့်ကစားသမားဘဝလက်ကျန်မှာ မှတ်မိနေမှာပါ။ ဘာလို့လဲဆိုတော့ ကျွန်တော် အကောင်းဆုံးတွေနဲ့တွဲကစားခဲ့ရလို့ပါ။ ဒီအရာတွေကို ကျွန်တော့်ကလေးတွေ မြေးတွေကို တစ်နေ့မှာ ပြောပြမှာပါ”လို့ ဗီတင်ဟာက ဖြေကြားခဲ့ပါတယ်။

ဗီတင်ဟာကတော့ ၂၀၂၂ တုန်းက  ပီအက်စ်ဂျီအသင်းထံပြောင်းရွှေ့လာခဲ့တာဖြစ်ပြီး အသင်းအတွက် ပွဲပေါင်း ၁၀၀ ကျော်ပါဝင်ခဲ့ကာ အခုရာသီမှာလည်း အသင်းကို ထိပ်ဆုံးနေရာမှာ ရပ်တည်နိုင်အောင် ကူညီပေးထားနိုင်ခဲ့ပါတယ်။ လာမယ့်ဗုဒ္ဓဟူးနေ့မှာ ပီအက်စ်ဂျီအသင်းဟာ မန်စီးတီးအသင်းနဲ့ ချန်ပီယံလိဂ်ပွဲကန်ရမှာဖြစ်ပါတယ်။