လီဗာပူးအသင်းခေါင်းဆောင် ဗာဂျီလ်ဗန်ဒိုက်က နယူးကာဆယ်ကို အနိုင်ယူခြင်းဖြင့် ဒုတိယအကြိမ်မြောက် လိဂ်ဖလားဆုကို ရယူပြီး ကလပ်ရဲ့ ဂန္တဝင်ကပ္ပတိန်တွေထဲမှာ နေရာတစ်ခု ရချင်တယ်လို့ ပြောလိုက်ပါတယ်။ ဗန်ဒိုက်က ချဲလ်ဆီးနဲ့ ပြီးခဲ့တဲ့နှစ် ဖိုင်နယ်မှာ အနိုင်ဂိုးသွင်းခဲ့တဲ့ ဒတ်ချ်ခံစစ်မှူးဖြစ်ပြီး ၂၀၂၃ခုနှစ်မှာ ဂျော်ဒန်ဟန်ဒါဆန်ဆီက ကပ္ပတိန်တာဝန်ကို လွှဲယူခဲ့တာပါ။ 

အခု နည်းပြသစ် အန်းစလော့လက်ထက်မှာလည်း အသင်းခေါင်းဆောင်အဖြစ် ဆက်ပြီး ဦးဆောင်နေပါတယ်။ ဗန်ဒိုက်က “ဖလားနှစ်လုံးကို ရယူနိုင်ခဲ့ရင် ဒီကလပ်မှာ အောင်မြင်မှုကြီးတွေ ရခဲ့တဲ့ ကပ္ပတိန်တွေရဲ့ စာရင်းထဲ ဝင်ဖို့ အခွင့်အရေးကောင်းတစ်ခု ရမယ်လို့ ထင်ပါတယ်။ ကလပ်ရဲ့ ကပ္ပတိန်ဖြစ်လာကတည်းက ဒါဟာ ကျွန်တော့်ရဲ့ အိပ်မက်ကြီးတစ်ခုပဲ။ ဒါပေမယ့် အခုထိ အဲဒီနေရာမှာ မရှိသေးဘူး၊ ကြိုးစားရမယ့်အလုပ်တွေ အများကြီး ကျန်သေးတယ်” လို့ ပြောပါတယ်။ ဗန်ဒိုက်ရဲ့စာချုပ်က ဇွန်လမှာ ကုန်တော့မှာဆိုပေမယ့် ဗန်ဒိုက်က ဆုဖလားတွေအပေါ် အာရုံစိုက်ထားပြီး ယုံကြည်မှုလည်း ရှိနေသေးတယ်။ 

“ကျွန်တော် အခုဆို ကစားသမားဘ၀ အကောင်းဆုံး ပုံစံမှာ ရှိနေတယ်လို့ ခံစားရတယ်၊ အဲဒါကို ခင်ဗျားတို့လည်း မြင်နေရမှာပါ။ ကစားရတာ ပျော်တယ်၊ အသင်းဖော်တွေကို ဦးဆောင်ရတာ ပျော်တယ်၊ သူတို့အားလုံးအတွက် ရှိပေးရတာ ပျော်တယ်၊ တာဝန်ယူရတာကို အရင်ကထက် ပိုပြီး သဘောကျတယ်။ ဒါက ကျွန်တော် အသက်ကြီးလာတာနဲ့အမျှ ဖြစ်လာတာလည်း ပါနိုင်တယ်။ ဒါကြောင့် ဘာဖြစ်လာမလဲ စောင့်ကြည့်ရမှာပဲ” လို့ သူက ဆိုတယ်။

အခု ပရီးမီးယားလိဂ်ကို ၁၅ မှတ်ဖြတ်ပြီး ဦးဆောင်နေတဲ့ လီဗာပူးက နိုင်ငံတကာ အားလပ်ရက်အပြီး ဧပြီလ ၂ ရက်မှာ မာဆေးဆိုက် ပြိုင်ဘက် အဲဗာတန်ကို အိမ်ကွင်းမှာ ဧည့်ခံကစားရပါမယ်။