အင်္ဂလန်အသင်းနည်းပြ တူချယ်က အယ်လ်ဘေးနီးယားကို ၂-၀ နဲ့အနိုင်ရခဲ့တဲ့ပွဲအပြီးမှာ မားကပ်စ် နဲ့ ဖိုဒန်တို့ စိတ်အားထက်သန်မှုမရှိခဲ့ဘူးလို့ ဝေဖန်လိုက်ပါတယ်။ အင်္ဂလန်ဟာ အယ်လ်ဘေးနီးယားကို  စကယ်လီ ၊ ကိန်းတို့ရဲ့ဂိုးတွေနဲ့ အနိုင်ရရှိခဲ့တာဖြစ်ပါတယ်။ အဆိုပါပွဲမှာ ဖိုဒန် နဲ့ ရက်ရှ်ဖို့ဒ်တို့ ဂိုးပေါက်တည့်ကန်ချက်မရှိခဲ့သလို ဒုတိယပိုင်းလက်ကျန် ၁၆ မိနစ်ကျန်နေချိန်မှာ ဘိုဝင် ၊ ဂေါ်ဒွန်တို့နဲ့ လူစားလဲခံခဲ့ရပါတယ်။

တူချယ်က သူ့အနေနဲ့ ဖိုဒန် ၊ မားကပ်စ်တို့ဆီကနေ အများကြီးမျှော်လင့်ခဲ့ကြောင်း ဝန်ခံပြောကြားခဲ့ပါတယ်။ “သူတို့ ၂ ဦး လုံလောက်တဲ့ထိရောက်မှုမပြုလုပ်နိုင်ခဲ့ဘူးလို့ ကျွန်တော်ထင်ပါတယ်။ လက်ရှိမှာ သူတို့ဘာကြောင့် ဘောလုံးနဲ့အတူ ဆွဲပြေးရာမှာ ရုန်းကန်နေရလဲဆိုတာကို ကျွန်တော် သေချာမသိပါဘူး။ 

သူတို့ အဲ့လိုအရာမျိုးနဲ့ အနည်းငယ်ပြတ်လပ်နေတယ်လို့ ကျွန်တော်ထင်ပါတယ်။ ဘောလုံးပေးပို့မှုတွေအများကြီးသာရှိနေပြီး ဖြတ်ကျော်မှုတွေ မလုံလောက်ပါဘူး။ ဘောလုံးနဲ့အတူ ဆွဲပြေးရာမှာလည်း မလုံလောက်ခဲ့ပါဘူး။ သူတို့ လေ့ကျင့်ခန်းကောင်းကောင်းဆင်းခဲ့သလို အကောင်းဆုံးလုပ်နိုင်ခဲ့ပါတယ်။ ဒါကြောင့်လည်း သူတို့ ပွဲထွက်ခွင့်နဲ့ထိုက်တန်တယ်လို့ ကျွန်တော်ထင်ခဲ့တာပါ။ ပြီးခဲ့တဲ့အပတ်တွေက သက်ဆိုင်ရာအသင်းတွေမှာ သူတို့ အရမ်းကောင်းခဲ့ပါတယ်။

ကျွန်တော်တို့ သူတို့ကို ဆက်လက်တွန်းအားပေးရပါမယ်။ သူတို့အလားအလာကို ပြသနိုင်အောင် လုပ်ဆောင်ရပါမယ်။ အဲ့နေရာတွေမှာ သူတို့ပိုအကျိုးပြုနိုင်မယ်လို့ ကျွန်တော်တို့ မျှော်လင့်ပါတယ်။ ဂေါ်ဒွန် နဲ့ ဘိုဝင်တို့လည်း ကြိုးစားခဲ့ပါတယ်။ ကျွန်တော်တို့ ပိုကောင်းလာဖို့ မျှော်လင့်နေပါတယ်။ ဒါက သာမန်လွဲချော်မှုလို့ ကျွန်တော်ထင်ပါတယ်။ ဘယ်လင်ဟမ်ဆို ပထမပိုင်းမှာ ကောင်းမွန်ခဲ့သလို မိုင်လီဆိုလည်း ဂိုးသွင်းနိုင်ခဲ့ပါတယ်။ ကိုင်လီဆိုရင်လည်း ဒုတိယဂိုးရနိုင်မယ့် အခွင့်အရေးကောင်းရခဲ့ပါတယ်။ အဲ့တာက အနည်းငယ်လွဲချော်ခဲ့တာပါ”လို့ တူချယ်က ပြောကြားခဲ့ပါတယ်။