ယူနိုက်တက်အမှုဆောင် ဆာဂျင်မီက အသင်းအနေနဲ့ ဆာအဲလက်စ်ဖာဂူဆန်အလွန်မှာ မခန့်အပ်ခဲ့သင့်တဲ့နည်းပြတစ်ဦးနာမည်ကို ထုတ်ဖော်ပြောကြားလိုက်ပါတယ်။ ဂန္ထဝင်စကော့တလန်နည်းပြဟောင်းကြီးဟာ ၂၀၁၃ မှာ နည်းပြဘဝကနေ အနားယူခဲ့ပြီး အနားမယူခင် အဆိုပါနှစ်မှာ ယူနိုက်တက်ကို ပရီးမီးယားလိဂ်ချန်ပီယံဖြစ်အောင် စွမ်းဆောင်ပေးနိုင်ခဲ့ပါတယ်။

ဖာဂူဆန်မရှိတော့တဲ့နောက် ယူနိုက်တက်မှာ နည်းပြအပြောင်းအလဲတွေ ၁၀ ဦးအထိ ရှိခဲ့ပြီး ဆာအဲလက်စ်နေရာကို အစားဝင်နိုင်ခြင်းမရှိခဲ့တာဖြစ်ပါတယ်။ ဆာဂျင်မီတစ်ယောက် ယူနိုက်တက်ကိုရောက်လာချိန်မှာ ၁၂ လအတွင်း ကြီးမားတဲ့ဆုံးဖြတ်ချက်တွေချမှတ်ခဲ့သလို တန်ဟက်ကို လိုအပ်တာထက် အချိန်ပိုပေးခဲ့မိတယ်လို့ ဝန်ခံပြောကြားခဲ့ပါတယ်။

အဲ့နောက် တန်ဟက်နေရာမှာ နစ္စတယ်ရွိုင်းကို ယာယီခန့်အပ်ခဲ့ပြီး အာမိုရင်ကို အမြဲတမ်းနည်းပြအဖြစ် ခေါ်ယူခဲ့ပါတယ်။ ယူနိုက်တက်သမိုင်းမှာ မှားယွင်းတဲ့နည်းပြတစ်ဦး ခန့်အပ်ခဲ့မိတယ်လို့ ဆာဂျင်မီက ထောက်ပြပြောဆိုခဲ့ပါတယ်။ “ကြည့်လိုက်ပါ။ ကျွန်တော် မိုယက်စ်ကို တကယ်ကြိုက်ပါတယ်။ သူက နည်းပြကောင်းတစ်ဦးပါ။ ဒါပေမယ့် ဆာအဲလက်စ်အပြီးမှာ သူ့ကိုခေါ်ယူခဲ့တာက မဖြစ်သင့်တာပါ။

မိုယက်စ်က ဆာအဲလက်စ်နေရာကို အစားဝင်နိုင်တဲ့နည်းပြမဟုတ်သလို နာမည်ကျော်တွေကိုလည်း မကိုင်တွယ်ဖူးပါဘူး။ ပြီးတော့ ဘာမှလည်း အောင်မြင်မှုမရယူနိုင်ပါဘူး။ သူက ယူနိုက်တက်လိုချင်တဲ့နည်းပြမျိုးမဟုတ်ခဲ့ပါဘူး။ ခင်ဗျားအနေနဲ့ နည်းပြတွေကို ရွေးချယ်တော့မယ်ဆိုရင် သေချာလေးရှာဖွေဖို့ လိုအပ်ပါတယ်။ ဘာလို့လဲဆိုတော့ ယူနိုက်တက်က ကမ္ဘာ့အကောင်းဆုံးအသင်းတစ်သင်းဖြစ်နေလို့ပါ။ အဲ့အစား ယူနိုက်တက်က မှားယွင်းတဲ့ဆုံးဖြတ်ချက်နဲ့အတူ မှားယွင်းတဲ့နည်းပြကို ခန့်အပ်ခဲ့ပါတယ်”လို့ ဆာဂျင်မီက ပြောကြားခဲ့ပါတယ်။