နယူးကာဆယ်အသင်းရဲ့ ဥက္ကဌ ယာဆာအယ်လ်ရူမေယန်က အသင်းရဲ့တန်ဖိုးအမြင့်ဆုံးကစားသမားဖြစ်သလို၊ ပရိသတ်အချစ်တော်ကစားသမားတစ်ဦးလည်းဖြစ်တဲ့ တိုက်စစ်မှူး အလက်ဇန်းဒါးအီဆက်ကို လာမယ့်နွေရာသီအပြောင်းအရွှေ့ကာလမှာ ရောင်းချသွားမှာမဟုတ်ဘဲ အသင်းမှာပဲ ဆက်လက်ထိန်းသိမ်းထားဖို့ ဆုံးဖြတ်ထားတယ်လို့သိရပါတယ်။ 

ဒီရာသီမှာ နယူးကာဆယ်အတွက် ထိပ်တန်းခြေစွမ်းတွေတောက်လျှောက်ပြသထားနိုင်တဲ့ အီဆက်ဟာ တနင်္ဂနွေနေ့က လီဗာပူးကို ၁-၂ နဲ့အနိုင်ရခဲ့တဲ့ ကာရာဘောင်ဖလားဗိုလ်လုပွဲစဉ်မှာ အရေးပါတဲ့သွင်းဂိုးတစ်ဂိုးကို သွင်းယူပေးခဲ့ပြီး ကလပ်ရဲ့ ကာလရှည်ဖလားမိုးခေါင်မှုကို အဆုံးသတ်ပေးနိုင်ခဲ့ပါတယ်။ ဒါကြောင့် ဆော်ဒီအာရေဗျရင်းနှီးမြှုပ်နှံမှု စီးပွားရေးလုပ်ငန်းရှင်တစ်ဦးဖြစ်သလို၊ နယူးကာဆယ်ရဲ့ဥက္ကဌလည်းဖြစ်တဲ့ ရူမေယန်အနေနဲ့ ဆွီဒင်လက်ရွေးစင်ကို အသင်းမှာဆက်လက်ထိန်းသိမ်းနိုင်ဖို့ ဆန္ဒရှိနေပြီး နွေရာသီမှာရရှိလာနိုင်တဲ့ ကမ်းလှမ်းမှုတွေအားလုံးကို ငြင်းပယ်ဖို့ဆုံးဖြတ်ထားတယ်လို့ Daily Mail ကဖော်ပြောထားပါတယ်။ 

အက်ဒီဟိုဝီရဲ့အသင်းအတွက် ဒီရာသီမှာ ၂၃ ဂိုးအထိသွင်းယူထားနိုင်တဲ့ အီဆက်ကို အာဆင်နယ်နဲ့ ဘာစီလိုနာတို့အပါအဝင် ဥရောပတစ်ဝှမ်းထိပ်သီးကလပ်တွေက စိတ်ဝင်တစား စောင့်ကြည့်နေကြတာဖြစ်ပါတယ်။သို့သော်လည်း ရူမေယန်ရဲ့ အကြိုက်ဆုံးကစားသမားအဖြစ်ရပ်တည်ထားတဲ့ အီဆက်ဟာ ရာသီကုန်မှာလည်း နယူးကာဆယ်ကနေ ထွက်ခွာသွားဖို့မရှိပါဘူး။ 

ဝက်စ်ဟမ်းကို ၁-၀ နဲ့အနိုင်ရခဲ့တဲ့ နယူးကာဆယ်ရဲ့ပွဲစဉ်အပြီးမှာ ဘာစီလိုနာက အီဆက်ကို စိတ်ဝင်စားနေကြောင်း သတင်းတွေထွက်ပေါ်လာခဲ့ပြီး လာမယ့်နွေရာသီမှာ ခေါ်ယူဖို့ကြိုးစားသွားမယ်လို့ဆိုပါတယ်။ သို့သော်လည်း လက်ရှိဘာစီလိုနာရဲ့ ဘဏ္ဍာရေးအခြေအနေက ထိပ်တန်းကစားသမားတစ်ဦးကိုခေါ်ယူနိုင်ဖို့ လုံလောက်မှုမရှိသလို၊ နယူးကာဆယ်ကလည်း အီဆက်အတွက် ပေါင်သန်း ၁၅၀ လောက်အထိတောင်းဆိုနိုင်ချေရှိလို့ အပြောင်းအရွှေ့ပေါ်ပေါက်လာဖွယ်မရှိပါဘူး။ 

လက်ရှိအချိန်မှာတော့ အီဆက်ဟာ လူဇင်ဘတ်၊ မြောက်အိုင်ယာလန်တို့နဲ့ ယှဉ်ပြိုင်သွားရမယ့် ချစ်ကြည်ရေးနိုင်ငံတကာပွဲစဉ်တွေကစားဖို့ ဆွီဒင်လက်ရွေးစင်အသင်းသို့ရောက်ရှိနေပြီး နိုင်ငံတကာပွဲစဉ်တွေအပြီး နယူးကာဆယ်သို့ပြန်လည်ရောက်ရှိချိန်မှာတော့ အသင်းနဲ့အတူ ကာရာဘောင်ဖလားအောင်မြင်မှုအတွက် အောင်ပွဲခံသွားမှာဖြစ်ပါတယ်။