ယူနိုက်တက်စတားဟောင်း လူးဝစ်ဆာဟာက ရော်နယ်ဒိုဟာ ပေါ်တူဂီရဲ့ဂန္ထဝင်တစ်ဦးဖြစ်နေဆဲဖြစ်ပြီး လာမယ့် ၂၀၂၆ ကမ္ဘာ့ဖလားမှာလည်း ခြိမ်းခြောက်နိုင်မှာဖြစ်ပြီး အသက် ၂၀ အရွယ်တုန်းကနဲ့အတူတူပဲလို့ ထောက်ခံပြောကြားလိုက်ပါတယ်။

အသက် ၄၀ အရွယ်ရောက်လာတာကြောင့် ရော်နယ်ဒိုရဲ့စွမ်းဆောင်ရည်ကကျဆင်းလာမလားဆိုတာကို မေးခွန်းထုတ်မှုတွေရှိနေတာဖြစ်ပါတယ်။ ဘော်လွန်းဒီအော်ဆု ၅ ကြိမ်ရ ရော်နယ်ဒိုဟာ ပေါ်တူဂီအသင်းခေါင်းဆောင်အဖြစ် တာဝန်ယူပြီး အသင်းကို နေးရှင်းလိဂ်ဆီမီးဖိုင်နယ်ပို့ဆောင်ပေးထားနိုင်ပါတယ်။

နိုင်ငံအသင်းအတွက် ရော်နယ်ဒိုတစ်ယောက် ၂၁၉ ပွဲပါဝင်ကစားထားပြီး ၁၃၆ ဂိုးသွင်းယူထားနိုင်သလို အယ်လ်နာဆာနဲ့လည်း စွမ်းဆောင်ရည်ကောင်းတွေပြသထားနိုင်ပါတယ်။ဘေးလူတွေကတော့ ရော်နယ်ဒို နဲ့ အယ်လ်နာဆာတို့ကြား စာချုပ်သက်တမ်းက အဆင်မပြေလောက်ဘူးလို့ ထင်မြင်နေကြပေမယ့် သူကိုယ်တိုင်က လာမယ့်ကမ္ဘာ့ဖလားဖိုင်နယ်အထိသွားဖို့ မျှော်လင့်နေပါတယ်။

ယူနိုက်တက်တိုက်စစ်မှူးဟောင်း ဆာဟာကတော့ အသင်းဟောင်းအခြေအနေနဲ့ပတ်သက်ပြီး “သူ(ရော်နယ်ဒို)တစ်ယောက် တူညီတဲ့စိတ်နှလုံးနဲ့အတူ အသက် ၂၀ အရွယ်တုန်းကအတိုင်း ဆက်သွားမယ်လို့ကျွန်တော်ထင်ပါတယ်။ သူက ခံစားချက်တိုင်းကို ဖော်ပြပါတယ်။

သူ့ရဲ့စိတ်အားထက်သန်မှုကိုလည်း မြင်ရပါတယ်။ ကျွန်တော်ကတော့ သူဆက်လက်တိုးတက်ဦးမယ်လို့ မျှော်လင့်ပါတယ်။ ဒိန်းမတ်နဲ့ပွဲက သူလုပ်ပြခဲ့တာကို ကြည့်လိုက်ပါ။ သူ့အသက်အရွယ်နဲ့ ကျွန်တော် အခုလိုမျိုးလုပ်ပြနေတာကို အရမ်းအားကျမိပါတယ်။

အဲ့တာက တကယ့်ကိုကြီးမားတဲ့အောင်မြင်မှုပါ။ သူအင်တာဗျူးအချို့မှာ ပြောခဲ့တာရှိပါတယ်။ ကမ္ဘာ့ဖလားမှာ ပေါ်တူဂီအသင်းနဲ့အတူ ပါဝင်ချင်တယ်ဆိုပြီး ပြောခဲ့ပါတယ်။ မှန်ပါတယ်။ နိုင်ငံအသင်းအတွက်ဂိုးတွေသွင်းပြီး အသင်းနဲ့အတူ ဆုဖလားမကိုင်မြှောက်ချင်တဲ့ကစားသမားမရှိပဲနေမလားဗျာ။ ကျွန်တော်က သူ့ရဲ့အမာခံပရိသတ်ပါ။ ရော်နယ်ဒိုကို GOAT တစ်ဦးအနေနဲ့ သတိရနေကြမယ်လို့ ကျွန်တော်ထင်ပါတယ်။ ကျွန်တော် အမြဲပြောသလို သူက လုံးဝပြီးပြည့်စုံတဲ့ကစားသမားပါ။

ပြောရရင် သူကွင်းထဲမှာ ဘာမဆိုလုပ်နိုင်တဲ့ကစားသမားပါ။ ရုပ်ပိုင်းဆိုင်ရာကော ဘောလုံးစွမ်းဆောင်ရည်ကော ဘောလုံးဉာဏ်ရည်ကော အကုန်ရှိပါတယ်။ ကစားသမားတစ်ဦးအနေနဲ့ သူက ဘယ်ပွဲဘယ်အဆင့်မှာမဆိုကစားနိုင်တဲ့ကစားသမားမျိုးပါ။ အခြားစတိုင်တစ်ခုလိုချင်တယ်ဆိုရင် ခင်ဗျားမှာအသင်းတစ်သင်း နဲ့ အရည်အချင်းရှိတဲ့ကစားသမားတွေ ခေါ်ယူရပါမယ်။ ဒါပေမယ့် စက်တစ်ခုအနေနဲ့ စက်ရုပ်တစ်ခုအနေနဲ့ဆိုရင် သူကအကြမ်းဆုံးဗားရှင်းတစ်ခုပါ”လို့ ဆာဟာက ဖြေကြားခဲ့ပါတယ်။ ရော်နယ်ဒိုဟာ ကစားသမားဘ၀ ဂိုး ၁၀၀၀ ပြည့်ဖို့ ပစ်မှတ်ထားနေပြီး မကြာခင်မှာလည်း အယ်လ်နာဆာနဲ့ စာချုပ်ချုပ်ဆိုနိုင်ဖွယ်ရှိနေပါတယ်။