ယူနိုက်တက်နည်းပြ အာမိုရင်က တိုက်စစ်မှူး ဟွိုက်လန်းဂိုးပေါက်ပျောက်နေတာနဲ့ပတ်သက်ပြီး ကာကွယ်ပြောကြားလိုက်ပါတယ်။ ဟွိုက်လန်းတစ်ယောက် ပရီးမီးယားလိဂ် ၁၆ ပွဲမှာ ၂ ဂိုးသာသွင်းယူထားနိုင်ခဲ့ပြီး အခုရာသီမှာ ရုန်းကန်နေရတာနဲ့ပတ်သက်လို့ ဝေဖန်ခံနေရပါတယ်။

လီဗာပူးနဲ့ပွဲမှာလည်း ဟွိုက်လန်းအနေနဲ့ အခွင့်အရေးကောင်းတွေရခဲ့ပေမယ့် အသုံးမချနိုင်ခဲ့တာဖြစ်ပါတယ် ဒါပေမယ့်လည်း အာမိုရင်ကတော့ သူ့ကစားသမားဘက်ကနေ ကာကွယ်ပြောကြားခဲ့ပါတယ်။ လီဗာပူးနဲ့ပွဲမှာ အလီဆင်နဲ့တစ်ဦးချင်းတွေ့ခဲ့ပေမယ့် လွဲချော်ခဲ့ပြီးနောက် ပရိသတ်တွေက သူ့ကိုစာချုပ်ဖျက်သိမ်းဖို့ လူမှုမီဒီယာကနေ တောင်းဆိုခဲ့ကြပါတယ်။

အဆိုပါအနေအထားမှာ အာမိုရင် ဟွိုက်လန်းဘက်ကနေ ကာကွယ်ပြောကြားခဲ့ပြီး တစ်ဦးချင်းကို ဝေဖန်ဖို့ ငြင်းဆန်ခဲ့ပါတယ်။ ပေါ်တူဂီသားနည်းပြက “အဲ့တာက အသင်းပြဿနာလို့ ကျွန်တော်ထင်ပါတယ်။ ခင်ဗျားအဲ့တာကို မြင်နိုင်ပါတယ်။ အခုတင်မဟုတ်ပဲ အတိတ်တုန်းကလည်း အတူတူပါပဲ။ ဒါကြောင့် ကျွန်တော်တို့ ဂိုးတွေပြတ်လပ်နေပြီး ဂိုးပေါက်ပျောက်နေတာပါ။

ပြိုင်ဘက်တွေကို ခြိမ်းခြောက်ချိန်မှာ ခင်ဗျားအနေနဲ့ ပြိုင်ဘက်ကို လုံလောက်တဲ့ဖိအားပေးထားနိုင်ဖို့ လိုအပ်ပါတယ်။ အရာအားလုံးက ချိတ်ဆက်နေတာပါ။ ကစားသမားအားလုံးက ဒီရာသီမှာ သူ့အရှိန်နဲ့သူရှိနေပါတယ်။ ဒီခရီးကို အတူတူစတင်ရမယ်လို့ ကျွန်တော်ထင်ပါတယ်။ ရက်မက်စ်က ဂိုးအမြဲတမ်းသွင်းနေတဲ့ကစားသမားပါ။ ဒါကြောင့် လာမယ့်ပွဲမှာ သူဂိုးပေါက်ပြန်တွေ့နိုင်လောက်ပါတယ်။ ကျွန်တော်တို့ ဆက်လက်စောင့်ကြည့်ရပါမယ်။

အခုအခြေအနေက ဟွိုက်လန်းတစ်ဦးတည်းထက် အသင်းပြဿနာပိုများနေပါတယ်။ ဒါကို အတိတ်မှာတုန်းကလည်း မြင်နိုင်ပါတယ်။ ကျွန်တော်တို့ အတိတ်မှာတုန်းက အသင်းရဲ့အကူးအပြောင်းကာလကို မြင်ရမှာပါ။ အဲ့တာကို ခံစားနိုင်ပါတယ်။ Final third မှာ အခွင့်အရေးဖန်တီးဖို့ဆိုတာ ကျွန်တော်တို့ အများကြီးရုန်းကန်နေရပါတယ်။ ဒါပေမယ့် ကျွန်တော်တို့ အဲ့အတွက် လုပ်ဆောင်နေသလို ပွဲမတိုင်ခင် ကျွန်တော်ပြောခဲ့သလိုပါပဲ။ 

ခံစစ်ပိတ်ကစားတဲ့အသင်းတွေအတွက် လေ့ကျင့်ရတာက အခက်ခဲဆုံးပါ။ အခွင့်အရေးဖန်တီးနိုင်ဖို့လည်း ခက်ခဲပါတယ်။ ဒါကြောင့် ကျွန်တော်အသင်းကို ပျော်ရွှင်မှုအပြည့်နဲ့ကစားတဲ့အသင်းအဖြစ်ပဲ မြင်ချင်ပါတယ်။

အဲ့အတွက်လည်း ကျွန်တော်တို့ ပြောင်းလဲနေပါတယ်။ လေ့ကျင့်ခန်းမှာလည်း ပြောင်းလဲနေပြီး အချိန်တစ်ခုတော့ လိုအပ်ပါတယ်။ နိုင်ပွဲတွေလည်း လိုအပ်ပါတယ်။ ကျွန်တော်တို့ ကြိုးစားနေပါတယ်”လို့ အာမိုရင်က သတင်းထောက်တွေကို ပြောကြားခဲ့ပါတယ်။ ယူနိုက်တက်ဟာ လာမယ့်တနင်္ဂနွေနေ့မှာ ဘရိုက်တန်အသင်းနဲ့ အိုးထရက်ဖို့ဒ်မှာ ရင်ဆိုင်ရမှာဖြစ်ပါတယ်။