ရီးရဲလ်မက်ဒရစ်ကနေ ထွက်ခွာတော့မယ်ဆိုတဲ့ သတင်းတွေကို ငြင်းဆန်လိုက်တဲ့ ရိုဒရီဂို
ရီးရဲလ်မက်ဒရစ်ကြယ်ပွင့် ကစားသမား ရိုဒရီဂိုက ပီအက်စ်ဂျီကြယ်ပွင့် ကီလီယန်အမ်ဘာပေရဲ့ အပြောင်းအရွှေ့ကြောင့် အသင်းကနေ ထွက်ခွာတော့မယ်ဆိုတဲ့ ကောလာဟလသတင်းတွေကို ငြင်းဆန်ခဲ့ပြီး အန်ဆယ်လော့တီရဲ့အသင်းမှာ ပျော်ရွှင်နေတယ်လို့ ပြောကြားလာခဲ့ပါတယ်။ ဘရာဇီးလက်ရွေးစင် ကစားသမားဟာ ဆန်တီယာဂိုဘာနေဗျူးကနေ ထွက်ခွာနိုင်ချေရှိတယ်လို့ သတင်းတွေက ဖော်ပြလာခဲ့ပေမယ့် မကြာသေးမီကပြုလုပ်ခဲ့တဲ့အင်တာဗျူးမှာတော့ ရိုဒရီုဂိုက ရီးရဲလ်မက်ဒရစ်မှာပဲ ဆက်လက်နေထိုင်လိုတယ်လို့ ပြောကြားခဲ့တာဖြစ်ပါတယ်။
တောင်ပံကစားသမားက “အမ်ဘာပေရဲ့ သတင်းကလည်း ဒီလိုမျိုး ထင်မိစေနိုင်ပါတယ်။ ကျွန်တော်ကတော့ ဒီမှာ နောက်ထပ် နှစ်ပေါင်းများစွာနေချင်ပါသေးတယ်။ အသင်းအတွက် အကူအညီဖြစ်စေပြီး အရေးကြီးတယ်လို့ ကိုယ့်ကိုယ်ကိုယ် ထင်မိတဲ့အချိန်အထိ ဒီမှာနေချင်တာပါ။ တကယ်လို့ ကိုယ့်ကိုယ်ကိုယ်ဒီမှာ အရေးမပါတဲ့လူတစ်ယောက်လို့ ထင်လာတဲ့အချိန်ကျရင်တော့ အခြားအသင်းကို ပြောင်းဖို့စဉ်းစားသွားမှာပါ” “အခုချိန်မှာ အပြောင်းအရွှေ့နဲ့ ပတ်သက်ပြီး ဘာတွေဖြစ်နိုင်မလဲ ကျွန်တော်မစဉ်းစားပါဘူး။ ဒီမှာကစားဖို့ပဲ အိပ်မက်မက်နေခဲ့တာပါ။ ဒီအသင်းကအမြဲတမ်း ကျွန်တော့်အချစ်ဆုံးအသင်းဖြစ်နေမှာပါ။ ဒီမှာ ကျွန်တော့်အတွက် အရာအားလုံးပြီးပြည့်စုံပါတယ်။ အိပ်မက်တွေကို အကောင်အထည် ဖော်နေရသလိုပါပဲ။ ကိုယ့်ကိုယ်ကိုယ်အရေးပါတဲ့လူတစ်ယောက်လို့ ခံစားရတဲ့အချိန်အထိ ဒီမှာရှိနေချင်ပါတယ်”လို့ ပြောကြားခဲ့ပါတယ်။
လာလီဂါမဟုတ်ဘဲ အခြားလိဂ်ဆိုရင် ဘယ်လိဂ်မှာ ကစားချင်လဲလို့မေးမြန်းခဲ့ရာ ရိုဒရီဂိုက “ပရီးမီးယားလိဂ်ပေါ့။ ဒါက လူတိုင်း ကြိုက်နှစ်သက်တဲ့နေရာပါ။ ဒါပေမယ့် အခြားလိဂ်တွေမှာလည်း ကျွန်တော် ကစားချင်ပါတယ်။ ကျွန်တော့်ရဲ့အိပ်မက်ကတော့ ရီးရဲလ်မက်ဒရစ်အတွက် အမြဲတမ်းကစားသွားဖို့ပါပဲ။ ကျွန်တော့်ရဲ့ရည်မှန်းချက်က ဒီမှဆက်ရှိနေဖို့ပါ”လို့ ဖြေကြားခဲ့ပါတယ်။
ယခုအခါမှာတော့ ရီးရဲလ်မက်ဒရစ်နဲ့ ရိုဒရီဂိုတို့ဟာ ဒေါ့မွန်နဲ့ ယှဉ်ပြိုင်သွားရမယ့် ချန်ပီယံလိဂ်ဗိုလ်လုပွဲအတွက် ပြင်ဆင်မှုတွေပြုလုပ်နေပြီး အန်ဆယ်လော့တီရဲ့အသင်းဟာ ချန်ပီယံလိဂ်ဖလားကို ၁၅ ကြိမ်မြောက် စံချိန်တင်ဆွတ်ခူးနိုင်ဖို့ မျှော်လင့်နေမှာဖြစ်ပါတယ်။
