အပြောင်းအရွှေ့နှင့်ပတ်သက်ပြီး ပရိသတ်တွေက မေးမြန်းတဲ့အခါ ရီးရဲလ်မက်ဒရစ်ဥက္ကဌ ပီရက်ဇ်က အမ်ဘာပေနဲ့ ဒေးဗီးစ်တို့ကို သူမသိပါဘူးလို့ ရယ်စရာဖြစ်အောင် တုံ့ပြန်လိုက်ပါတယ်။

သူတို့နှစ်ဦးဟာ ရီးရဲလ်မက်ဒရစ်အဖို့ လာမယ့်နွေရာသီအပြောင်းအရွှေ့အတွက် ဦးစားပေးပစ်မှတ်တွေဖြစ်ပါတယ်။ အမ်ဘာပေကိုတော့ ရာသီကုန် ပီအက်စ်ဂျီနှင့် စာချုပ်သက်တမ်းကုန်ဆုံးချိန်မှာ အလွတ်ပြောင်းရွှေ့ကြေးဖြင့် ရရှိမှာဖြစ်ပြီး ဒေးဗီးစ်ကတော့ ဘိုင်ယန်မြူးနစ်နဲ့ စာချုပ်သက်တမ်း ကျန်ရှိနေသေးတာဖြစ်ပါတယ်။

သူတို့ ၂ ဦးစလုံးကို သဘောကျကြောင်း ရီးရဲလ်မက်ဒရစ်က လူသိရှင်ကြားပြောကြားထားပြီး ကစားသမားတွေကိုခေါ်ယူမယ့် အစီစဉ်နဲ့ပတ်သက်ပြီး ပရိသတ်တွေက မေးမြန်းတဲ့အခါ ပီရက်ဇ်က ပြန်လည် ဖြေကြားထားတာဖြစ်ပါတယ်။

မီဒီယာ ဓာတ်ပုံရိုက်ဖို့ထွက်လာတဲ့အခါ ပရိသတ်တစ်ဦးက "ခင်များ ဒေးဗီးစ်ကိုခေါ်ပေးရမယ်" လို့ ပီရက်ဇ်ကို ပြောကြားလိုက်ပါတယ်။ ထိုအခါ ပီရက်ဇ်က "ဒေးဗီစ်ဆိုတာ ဘယ်သူလဲ"လို့ ပြန်လည် ပြောကြားလိုက်ပါတယ်။ အဲ့ဒီနောက် ပီရက်ဇ်က အနည်းငယ်ပြုံးသွားပြီး နောက်ထပ်ပရိသတ်တစ်ဦးက "ဒေးဗီစ်နဲ့ အမ်ဘာပေကိုခေါ်ယူမယ်ဆိုရင် ကျွန်တော်တို့ အားလုံးကိုအနိုင်ရရှိနိုင်တယ်" လို့ ထပ်ပြောပါတယ်။

နောက်တစ်ကြိမ် ပီရက်ဇ်က ထပ်ပြုံးပြီး "အမ်ဘာပေကရော ဘယ်သူတုန်း" လို့ ပြောပါတယ်။ အမ်ဘာပေမရှိတော့မယ့်အချိန်တွေအတွက် ပီအက်စ်ဂျီဟာ ပြင်ဆင်မှုတွေလုပ်ဆောင်နေပြီး ပြီးခဲ့တဲ့ လီဂူးဝမ်း ၂ ပွဲရဲ့ တစ်ပွဲဆိုရင် နည်းပြ အင်းနရစ်က အမ်ဘာပေးကို စောစီးစွာ လူစားလဲခဲ့တာဖြစ်ပါတယ်။ ရီးရဲလ်ဆိုစီဒက်စ်အား အနိုင်ရရှိခဲ့တဲ့ ချန်ပီယံလိဂ်ပွဲစဉ်မှာတော့ ပြင်သစ်သားဟာ မိနစ် ၉၀ ပြည့် ကစားခဲ့ပြီး လှပတဲ့ ဂိုးကို သွင်းယူပေးခဲ့တာဖြစ်ပါတယ်။

မကြာသေးခင်က စောစီးစွာ လူစားလဲခံခဲ့ရသော်လည်း အမ်ဘာပေဟာ အင်းနရစ် ဒါမှမဟုတ် သူ့ရဲ့နည်းပြအဖွဲ့တွေနဲ့ မည်သည့်ပြဿနာမျှ ဖြစ်ထားပုံမရပါဘူး။ မကြာသေးခင်က ဒဏ်ရာကနေ ပြန်ကောင်းလာတဲ့ ဒေးဗီစ်ဟာ လာဇီယိုအား အနိုင်ရရှိခဲ့တဲ့ ချန်ပီယံလိဂ်ပွဲစဉ်မှာ ကစားပေးခဲ့ပါတယ်။ ကနေဒါနိုင်ငံသားဟာ နောက်ဆုံး ၁၂ မိနစ်တွင် လူစားဝင်ရောက်လာခဲ့ပြီး ကစားပေးခဲ့တာဖြစ်ပါတယ်။

ရီးရဲလ်မက်ဒရစ်ဟာ လိုက်ပ်ဇစ်နှင့် ၁-၁ ဂိုးသရေကျခဲ့သော်လည်း နှစ်ကျော့ပေါင်း ၂-၁ ဂိုးဖြင့်အနိုင်ရရှိကာ ကွာတားဖိုင်နယ်သို့ရောက်ရှိခဲ့တာဖြစ်ပါတယ်။