ကာရာဘောင်ဖလား ဆုပေးပွဲအတွင်း ချဲလ်ဆီးပိုင်ရှင် တော့ဘိုလီနဲ့ အဆင်မပြေဖြစ်နေပုံရတဲ့ ပိုချက်တီနို
ချဲလ်ဆီးနည်းပြ မော်ရီစီယိုပိုချက်တီနိုဟာ ယမန်နေ့ညက လီဗာပူးကို ရှုံးနိမ့်ခဲ့တဲ့ ကာရာဘောင်ဖလား ဗိုလ်လုပွဲအပြီးမှာ အသင်းပိုင်ရှင် တော့ဘိုလီကို နှုတ်ဆက်ဖို့ လျစ်လျူရှုခဲ့တာကြောင့် သူတို့နှစ်ဦးကြားက ဆက်ဆံရေးအခြေအနေက သံသယရှိစရာဖြစ်လာခဲ့ပါတယ်။
ချဲလ်ဆီးဟာ အရေးပါတဲ့ ကစားသမားတွေ မပါဝင်တဲ့လီဗာပူးကို အနိုင်ယူနိုင်ခဲ့ခြင်းမရှိဘဲ ဗန်ဒိုက်ရဲ့တစ်လုံးတည်းသော အနိုင်ဂိုးကိုခွင့်ပြုခဲ့ရပြီး လက်ဗလာနဲ့အိမ်ပြန်ခဲ့ရပါတယ်။ လီဗာပူးဟာ အဓိက ကစားသမား အများအပြားဒဏ်ရာ ရရှိနေခဲ့တာကြောင့်ယခုပွဲစဉ်မှာ လူငယ်ကစားသမားလေးတွေကို ပွဲထုတ်ခဲ့ရပေမယ့် အံ့မခန်းစွမ်းဆောင်ရည်ကို ပြသနိုင်ခဲ့ပြီး ယာဂင်ကလော့ပ်အတွက် ဆုဖလားဆွတ်ခူးနိုင်ဖို့ အစွမ်းကုန်တိုက်ပွဲဝင်ခဲ့ကြတာ ဖြစ်ပါတယ်။
ပွဲအပြီးမှာတော့ ပိုချက်တီနိုဟာ ယခုပွဲကိုလာရောက်ကြည့်ရှုခဲ့တဲ့ အသင်းပိုင်ရှင် တော့ဘိုလီကို လက်ဆွဲနှုတ်ဆက်ဖို့ လျစ်လျူရှုခဲ့ပြီး အခြားလူတွေကိုတော့ နှုတ်ဆက်ခဲ့တာဖြစ်ပါတယ်။ ပိုချက်တီနိုဟာ ဒုတိယဆိုကို သွားရောက်ယူဆောင်ချိန်မှာ တော့ဘိုလီကို ကျော်ပြီး အခြားလူတွေကို လက်ဆွဲနှုတ်ဆက်ခဲ့ပါတယ်။
တော့ဘိုလီက ပိုချက်တီနိုကို လက်ဆွဲနှုတ်ဆက်မယ့် အရိပ်အယောင်မျိုးပြသခဲ့ပေမယ့် ပိုချက်တီနိုက မသိချင်ယောင်ဆောင်ခဲ့ပုံပေါ်ပါတယ်။ အဆိုပါ ဗီဒီယိုဖိုင်ဟာ အခုအခါ ဆိုရှယ်မီဒီယာမှာ ပေါက်ကြားလာတာကြောင့် ပရိသတ်တွေက လှောင်ပြောင်မှုတွေ ပြုလုပ်နေကြပြီး နည်းပြနဲ့ အသင်းပိုင်ရှင်ကြားက ဆက်ဆံရေးကလည်း သံသယဝင်စရာကောင်းလာပါတယ်။
ချဲလ်ဆီးဟာ လီဗာပူးနဲ့ ဆုံတွေ့ခဲ့တဲ့ နောက်ဆုံး ဗိုလ်လုပွဲ ၃ ပွဲဆက်တိုက် ရှုံးနိမ့်ခဲ့တာ ဖြစ်ပါတယ်။ ဒါ့အပြင် ချဲလ်ဆီးဟာ ပြည်တွင်းဖလား ဗိုလ်လုပွဲ ၆ ပွဲဆက်တိုက် ရှုံးနိမ့်ခဲ့တဲ့ ပထမဆုံးသော အင်္ဂလိပ်အသင်းဖြစ်လာခဲ့ပါတယ်။
ပွဲအပြီးမှာတော့ ပိုချက်တီနိုက “အချိန်ပိုမှာ ကျွန်တော်တို့ ဂယ်လာဟာနဲ့ ဘင်ချီဝဲလ်တို့ကို အပြောင်းအလဲပြုလုပ်ခဲ့တာကြောင့် ဒုတိယပိုင်းက စွမ်းဆောင်ရည်မျိုးကို ထိန်းသိမ်းနိုင်ဖို့ ခက်ခဲခဲ့ပါတယ်။ ဒီအခြေအနေကို ဘယ်လိုဖော်ပြရမလဲမသိပေမယ့် ကစားသမားတွေ အနေနဲ့ အတတ်နိုင်ဆုံး ကြိုးစားအားထုတ်ခဲ့ကြတယ်လို့ ထင်ပါတယ်။ သူတို့ကလည်း လူငယ်တွေအများအပြားပါဝင်သလို ကျွန်တော်တို့ကလည်း လူငယ်အသင်းပါပဲ။ ကျွန်တော်တို့ လက်ရှိလုပ်နေတဲ့ ပရောဂျက်ကို ခိုင်ခိုင်မာမာရပ်တည်သွားပြီး အနာဂတ်မှာ ဘာတွေလုပ်ဆောင်နိုင်မလဲဆိုတာကို စောင့်ကြည့်သွားရမှာပါ”လို့ ပြောကြားခဲ့ပါတယ်။
