စနေနေ့ညက ယှဉ်ပြိုင်ခဲ့တဲ့ ပရီးမီးယားလိဂ်ပွဲစဉ်မှာ ဘရိုက်တန်ကို ၂-၂ နဲ့သရေကျခဲ့ပြီးနောက် မန်ချက်စတာစီးတီးနည်းပြ ပက်ဂွါဒီယိုလာက သူ့ရဲ့အသင်းဟာ ထိပ်ဆုံး ၄ သင်းဝင်ပြီး နောက်ရာသီချန်ပီယံလိဂ်ပြိုင်ပွဲကို ယှဉ်ပြိုင်ဖို့ အခွင့်အရေးရှိနေဆဲဖြစ်တယ်လို့ ပြောကြားလာခဲ့ပါတယ်။ 

မန်စီးတီးအနေနဲ့ ဘရိုက်တန်ကိုအနိုင်ရခဲ့မယ်ဆိုပါက အဆင့် ၄ နေရာသို့တက်လှမ်းဖို့ အခွင့်အရေးရှိခဲ့ပေမယ့် သရေ ၁ မှတ်သာရရှိခဲ့တာကြောင့် အဆင့် ၅ နေရာမှာပဲ ဆက်လက်ရပ်တည်နိုင်ခဲ့တာဖြစ်ပါတယ်။ လက်ရှိပရီးမီးယားလိဂ်ချန်ပီယံတွေဟာ ယခုပွဲစဉ်မှာ အာလင်းဟာလန်း၊ အိုမာ မာမွတ်ရှ်တို့ရဲ့သွင်းဂိုးတွေနဲ့ ဘရိုက်တန်ကို ၂ ကြိမ်တိုင်တိုင်ဦးဆောင်နိုင်ခဲ့ပေမယ့် ချေပဂိုးတွေပြန်လည်ခွင့်ပြုခဲ့ရလို့ အိမ်ကွင်းမှာ သရေသာရှိခဲ့ပါတယ်။ 

ဒါကြောင့် အဆင့် ၄ နေရာကချဲလ်ဆီးအနေနဲ့ တနင်္ဂနွေနေ့မှာယှဉ်ပြိုင်သွားရမယ့် အာဆင်နယ်နဲ့ပွဲစဉ်မှာသာ နိုင်ပွဲရခဲ့မယ်ဆိုရင် မန်စီးတီးကို ၄ မှတ်အထိဖြတ်တောက်သွားနိုင်မှာဖြစ်ပါတယ်။ အစ်ဆွစ်ချ်ကို ဂိုးပြတ်နိုင်ခဲ့တဲ့ နော်တင်ဟမ်ဖောရက်စ်ကတော့ အဆင့် ၃ နေရာမှာဆက်လက်ရပ်တည်နေပြီး ဒုတိယနေရာက အာဆင်နယ်နဲ့ ၁ မှတ်သာကွာဟပါတော့တယ်။ 

အဆင့် ၆၊ ၇ နဲ့ ၈ နေရာတို့မှာ အသီးသီးရပ်တည်နေတဲ့ နယူးကာဆယ်၊ ဘရိုက်တန်နဲ့ အက်စတွန်ဗီလာတို့ကလည်း အဆင့် ၄ နေရာအတွက် အခွင့်အရေးရှိနေဆဲဖြစ်လို့ ပရီးမီးယားလိဂ်ရဲ့ချန်ပီယံလိဂ်ဝင်ခွင့်တိုက်ပွဲဟာ ရင်ခုန်ဖွယ်ဆက်လက်စောင့်ကြည့်သွားဦးမှာဖြစ်ပါတယ်။ 

မန်စီးတီးအနေနဲ့ ရာသီကုန်မှာ ချန်ပီယံလိဂ်ဝင်ခွင့်ရဖို့ ယုံကြည်သလားလို့မေးမြန်းခဲ့ရာ ဂွါဒီယိုလာက “သေချာပေါက်ယုံကြည်ပါတယ်။ လူတိုင်းက ဖိအားတွေနဲ့ကြုံတွေ့နေရတာပါပဲ။ကျွန်တော်တို့ ပိုကောင်းတဲ့ခြေစွမ်းနဲ့ ပြန်လာဖို့ကြိုးစားသွားပါမယ်။ ကျွန်တော်ကတော့ အမြဲတမ်းယုံကြည်ချက်ရှိပါတယ်။သံသယတွေရှိနေပေမယ့် လမ်းကြောင်းမှန်ပေါ်ပြန်တက်နိုင်မှာပါ။ အပြုသဘောဆောင်တဲ့အချက်တွေ အသင်းမှာရှိနေပါတယ်။ အခက်ခဲတွေအများကြီးရှိသွားမှာဖြစ်ပေမယ့် ကျွန်တော်တို့မှာ ၉ ပွဲတောင်ကျန်နေပါသေးတယ်” လို့ပြောကြားခဲ့ပါတယ်။ 

မန်စီးတီးဟာ ဒီရာသီမှာ ဆုဖလားမျှော်လင့်ချက်အနေနဲ့ အက်ဖ်အေဖလားတစ်လုံးသာကျန်ရှိတော့ပြီး လာမယ့်မတ်လအကုန်မှာတော့ ကွာတားဖိုင်နယ်ပွဲစဉ်အဖြစ် ဘုန်းမောက်နဲ့ယှဉ်ပြိုင်သွားရမှာဖြစ်ပါတယ်။ သို့သော်လည်း အက်ဖ်အေဖလားကိုသာဆွတ်ခူးနိုင်ခဲ့မယ်ဆိုရင်တော့ မန်စီးတီးဟာ ယူရိုပါလိဂ်ဝင်ခွင့်သာရရှိသွားမှာဖြစ်ပါတယ်။ ၂၀၁၀-၁၁ ရာသီကတည်းက ချန်ပီယံလိဂ်ဝင်ခွင့်နဲ့လွဲချော်ခြင်းမရှိခဲ့တဲ့ မန်စီးတီးအနေနဲ့ ယခုရာသီကုန်မှာလည်း အဆင့် ၄ နေရာရရှိအောင်စွမ်းဆောင်သွားနိုင်မလား စောင့်ကြည့်ရပါမယ်။