မန်ချက်စတာဒါဘီပွဲစဉ်၊ ပထမပိုင်းပွဲချိန်အတွင်း ဟာလန်းရဲ့အပိုင်အခွင့်အရေးကောင်းတစ်ခု လွဲချော်မှုနဲ့ပတ်သက်လို့ မန်စီးတီးနည်းပြပက်ဂွါဒီယိုလာက ကာကွယ်ပြောဆိုခဲ့ပြီး သူ့ရဲ့တိုက်စစ်မှူးဟာ ထူးချွန်တဲ့ဘောလုံးသမားတစ်ဦးဖြစ်တယ်လို့ ချီးကျူးခဲ့ပါတယ်။

မန်စီးတီးဂိုးသွင်းစက်က ပြိုင်ဘက်ခံစစ်ဧရိယာအတွင်း ဂိုးပေါက်လွတ်ဆီကို အပိုင်ပိတ်သွင်းခွင့်ရရှိခဲ့ပေမယ့် သူ့ရဲ့ကန်သွင်းယူမှုက အံ့အားသင့်ဖွယ်လွဲချော်သွားခဲ့ပါတယ်။ ဒါပေမယ့် ဟာလန်းက မန်ချက်စတာဒါဘီမှာ မန်စီးတီးတို့ပြတ်ပြတ်သားသားအနိုင်ရရှိစေမယ့် အသင်းရဲ့တတိယမြောက်ဂိုးကို သွင်းယူပေးခဲ့ပါတယ်။

နောက်ပိုင်းမှာတော့ ပက်ဂွါဒီယိုလာက အခွင့်အရေးကောင်းလွဲချော်မှုတွေအပေါ် ဟာလန်းရဲ့မေ့ဖျောက်ပစ်နိုင်စွမ်းအကြောင်း ယုတ္တိမတန်တဲ့ဥပမာတစ်ခုပေးကာ ရှင်းပြပြောဆိုပါတယ်။

ပွဲစဉ်အပြီး သတင်းထောက်တွေနဲ့ တွေ့ဆုံချိန် ကတ္တလန်သားနည်းပြက “အလွန်ကြီးကျယ်ခမ်းနားတဲ့ ကစားသမားတွေနဲ့ ကျွန်တော်ဆုံတွေ့ခဲ့ရသလို သူတို့တွေကို စီမံအုပ်ချုပ်ခွင့်ရရှိလို့ ကျွန်တော် ကံကောင်းလွန်းခဲ့ပါတယ်။ သူတို့တွေက အခွင့်အရေးကောင်းလွဲချော်မှုတွေကို တခဏလေးအတွင်းမှာပဲ မေ့ဖျောက်ပစ်တက်ကြပါတယ်။ တက်နိုင်သလောက် အမြန်ဆုံး မေ့ပစ်တက်ကြတာပါ။ ဘောလုံးသမားတွေရော၊ ဘတ်စကတ်ဘောအားကစားသမားတွေရောပေါ့။ သူတို့တွေ လွဲချော်ခဲ့ဖူးပါတယ်။ အဲ့ဒီအချိန်မျိုးမှာ ပြုံးရုံသာ ပြုံးနိုင်ကြပြီး ဟာလန်းလည်း အဲ့ဒီအတိုင်းပဲ လုပ်ခဲ့ပါတယ်။ ဟာလန်းဆီမှာ မယုံကြည်နိုင်လောက်စရာ မေ့ဖျောက်ပစ်လိုက်နိုင်တဲ့စွမ်းရည်ကောင်း ရှိပါတယ်။ ဒီလိုအရာတွေကပဲ ကြီးကျယ်ခမ်းနားတဲ့ကစားသမားကောင်းဆိုတာကို အဓိပ္ပါယ်ဖွင့်လှစ်ပေးပါတယ်”လို့ ပြောပါတယ်။

ပရီးမီးယားလိဂ်လက်ရှိချန်ပီယံတွေက လာမယ့်ဗုဒ္ဓဟူးနေ့မှာ ကိုပင်ဟေဂင်နဲ့ ချန်ပီယံလိဂ် ၁၆-သင်းရှုံးထွက်ဒုတိယအကျော့ပွဲစဉ်ကို ယှဉ်ပြိုင်ကစားရပါမယ်။