ဆန်းတို့စ်စတား နေမာက အခုလာမယ့်ကမ္ဘာ့ဖလားခြေစစ်ပွဲအတွက် ဘရာဇီးလူစာရင်းမှာ မပါဝင်ခဲ့တဲ့နောက် သူ့အမြင်ကို ထုတ်ဖော်ပြောကြားလာပါတယ်။အသက် ၃၃ နှစ်သားဟာ အခုလမှာကန်မယ့်နိုင်ငံအသင်းပွဲစဉ်တွေအတွက် ဘရာဇီးလူစာရင်းမှာ မပါဝင်ခဲ့တာဖြစ်ပါတယ်။ ရီးရဲလ်နည်းပြဟောင်းကတော့ နေမာအနေနဲ့ အသေးစားဒဏ်ရာပြဿနာရှိနေတာကြောင့်လို့ ပြောကြားလိုက်ပါတယ်။

အခုချိန်မှာတော့ နေမာက သူ့အမြင်ကို ထုတ်ဖော်ပြောကြားလာခဲ့ပါတယ်။ gym မှာလေ့ကျင့်ခန်းအပြင်းအထန်လုပ်နေတဲ့ပုံနဲ့အတူ နေမာက အင်စတာဂရမ်ကနေ “အောင်မြင်မှုဆိုတာက စိတ်အားထက်သန်မှု ၊ ဆုံးဖြတ်ချက် နဲ့ မဆုတ်မနစ်ကြိုးစားမှုတွေကနေ လာတာပါ။ ခင်ဗျားအနေနဲ့ ခင်ဗျားလိုချင်တဲ့ပစ်မှတ်ကိုမရောက်ရင်တောင် အတားအဆီးတွေကို ကျော်ဖြတ်နိုင်ဖို့ လိုအပ်ပါတယ်။ အဲ့လိုဆိုရင် တစ်ချိန်ချိန်မှာ လိုချင်တာတွေရလာမှာပါ”လို့ တင်ခဲ့ပါတယ်။

အန်ဆယ်လော့တီက နေမာရဲ့အရည်အချင်းတွေကို ပြောကြားခဲ့ပေမယ့် ဆန်းတို့စ်မှာတော့ တည်ငြိမ်တဲ့စွမ်းဆောင်ရည်ပြသနိုင်ခြင်းမရှိသေးတာဖြစ်ပါတယ်။ မိခင်မြေပြန်ရောက်လာချိန်မှာ နေမာတစ်ယောက် ၁၉ ပွဲမှာ ၆ ဂိုးသွင်း ၊ ၃ ဂိုးဖန်တီးထားနိုင်ခဲ့ပါတယ်။ အယ်လ်-ဟီလယ်စတားဟောင်းအနေနဲ့ လာမယ့် ၂၀၂၆ ကမ္ဘာ့ဖလားမှာ ပါဝင်ချင်တယ်ဆိုရင် ကြံ့ခိုင်မှုအပြင် စွမ်းဆောင်ရည်ပါ တိုးတက်နေဖို့ လိုအပ်တာဖြစ်ပါတယ်။

အန်ဆယ်လော့တီရဲ့ဘရာဇီးအသင်းဟာ ၁၆ ပွဲကစားပြီးချိန် ကမ္ဘာ့ဖလားခြေစစ်ပွဲအဆင့်ရပ်တည်မှုအဖြစ် အဆင့် ၃ နေရာမှာ ရပ်တည်နေကာ လာမယ့်နှစ်အတွက် ဝင်ခွင့်ရရှိခဲ့ပြီဖြစ်ပါတယ်။ စက်တင်ဘာ ၅ ရက်နေ့မှာ ဘရာဇီးဟာ ချီလီအသင်းနဲ့ကစားရမှာဖြစ်ပြီး အဲ့နောက် ဘိုလီဗီးယားနဲ့ကစားရမှာဖြစ်ပါတယ်။