နာပိုလီနည်းပြ အန်တိုနီယိုကွန်တီက ယနေ့နံနက်ကယှဉ်ပြိုင်ခဲ့တဲ့ စီးရီးအေပွဲစဉ်မှာ အေစီမီလန်ကို ၂-၁ နဲ့အနိုင်ရရှိခဲ့ပြီးနောက် အမှတ်ပေးဖလားကို စိန်ခေါ်နိုင်ဖို့ အားတက်လာခဲ့ကြောင်း ပြောကြားလာခဲ့ပါတယ်။ ယခုနိုင်ပွဲကြောင့် နာပိုလီဟာ အမှတ်ပေးဇယားထိပ်ဆုံးက အင်တာမီလန်နဲ့ ရမှတ် ၃ မှတ်သာကွာဟတော့သလို၊ တတိယနေရာက အတ္တလန္တာကိုလည်း ၆ မှတ်အထိဖြတ်တောက်နိုင်ခဲ့ပါတယ်။ ပွဲအပြီး သတင်းစာရှင်းလင်းပွဲမှာ ကွန်တီက "ဒီနိုင်ပွဲက ကျွန်တော်တို့အတွက် အရေးကြီးပါတယ်။ အင်တာမီလန်နဲ့အပြိုင် အမှတ်ပေးဖလားကိုစိန်ခေါ်နိုင်ဖို့ အများကြီးတွန်းအားပေးခဲ့ပါတယ်"

"အရင်တုန်းကတော့ အသင်းက ချန်ပီယံလိဂ်ဝင်ခွင့်ရဖို့တောင် မမျှော်မှန်းရဲခဲ့ဘဲ ဥရောပဝင်ခွင့်ရဖို့ပဲ မျှော်မှန်းခဲ့ကြတာပါ။ ဒါပေမယ့် ၈ လကြာ အလုပ်ကြိုးစားပြီးနောက်ပိုင်းမှာတော့ မထင်မှတ်ထားတဲ့အရာတွေကိုပါ စိန်ခေါ်လာနိုင်ပါပြီ" လို့ပြောကြားခဲ့ပါတယ်။ 

အေစီမီလန်နဲ့ပွဲစဉ်မှာ နာပိုလီဟာ ခြေစွမ်းအသာစီးနဲ့ ပွဲကို ထိန်းချုပ်ကစားနိုင်ခဲ့ပြီး ပထမပိုင်းမှာတင် ၂ ဂိုးပြတ်ဦးဆောင်ထားနိုင်ခဲ့တာဖြစ်ပါတယ်။ အသင်းအတွက် ဂိုးတွေကိုတော့ မက်တီယိုပိုလီတာနိုနဲ့ ရိုမီယူလူကာကူတို့က သွင်းယူပေးခဲ့ကြတာဖြစ်ပါတယ်။

သို့သော်လည်း နာပိုလီရဲ့ ဒုတိယပိုင်းကစားပုံကို အားရကျေနပ်မှုမရှိကြောင်းကို ကွန်တီက "ဒီလိုပွဲမျိုးမှာ အသင်းရဲ့ကစားပုံကောင်းမနေရင် ကျွန်တော်ကိုယ်တိုင်ပဲ ဝင်ကန်လိုက်ချင်ပါတယ်။ ပထမပိုင်းမှာ ပွဲကိုထိန်းချုပ်နိုင်ခဲ့ပေမယ့် အေစီမီလန်က အရမ်းကောင်းတဲ့အသင်းဆိုတာ မေ့ထားလို့မရပါဘူး။ ပြီးတော့ သူတို့က ဇန်နဝါရီမှာ အင်အားဖြည့်တင်းထားခဲ့ပါတယ်" လို့ပြောကြားခဲ့ပါတယ်။ 

ယခုပွဲစဉ်မှာ နာပိုလီဟာ အသင်းရဲ့အားထားရတဲ့ကွင်းလယ်လူ စကော့မက်တိုမီနေးကို အသုံးပြုနိုင်ခဲ့ခြင်းမရှိသလို၊ လီအန်ဒရိုစပ်နက်ဇိုလာကလည်း ဒဏ်ရာရနေလို့ ဒေးဗစ်နာရက်စ်ကို ပွဲထွက်ကစားသမားအဖြစ် အစားထိုးထည့်သွင်းခဲ့ရပါတယ်။ 

ဆက်လက်ပြီး ကွန်တီက "ကျွန်တော်တို့ တိုမီနေးကိုဆုံးရှုံးထားပါတယ်။ ဒါကြောင့် ကျွန်တော့်အနေနဲ့ ဒီပွဲမှာ စွန့်စားမှုအချို့ယူခဲ့ရပြီး ဖရန့်ခ်အဂွစ်ဆာနဲ့ ဒေးဗစ်နာရက်စ်တို့ကို အသုံးပြုခဲ့ရပါတယ်။ ကျွန်တော်တို့တွေ မမျှော်လင့်ထားတဲ့အရာတွေကို လုပ်နိုင်မယ်လို့ရည်ရွယ်ပါတယ်။ နောက်ထပ် ၈ ပွဲကစားဖို့ကျန်ရှိနေသေးပြီး အဲဒီပွဲစဉ်တွေအတွက် ကျွန်တော်တို့ စဉ်းစားသွားရပါမယ်" လို့ပြောကြားခဲ့ပါတယ်။