အာဆင်နယ်နည်းပြ အာတီတာက နောက်ထပ်ပရီးမီးယားလိဂ်စတားတစ်ဦးကို အငှားခေါ်ယူဖို့ စတာလင်ကို ချဲလ်ဆီးပြန်လွှတ်နိုင်ချေနဲ့ပတ်သက်ပြီး ငြင်းဆန်လိုက်ပါတယ်။ ဆာကာ နဲ့ ဂျီးဆပ်စ်တို့ ဒဏ်ရာရရှိခဲ့တဲ့အနေအထားမှာ အာဆင်နယ်ဟာ တိုက်စစ်ပိုင်းလိုအပ်ချက်ရှိလာခဲ့တာဖြစ်ပါတယ်။ ဆာကာကတော့ အခုရာသီမကုန်ခင်မှာ ပြန်လာနိုင်ချေရှိပေမယ့် ဂျီးဆပ်စ်ကတော့ အခုရာသီကုန်အထိ နားရတော့မှာဖြစ်ပါတယ်။

ဝမ်နီရီက ကြားရက်တုန်းက ပြန်လာနိုင်ခဲ့ပေမယ့် ၄ ပွဲလောက်လွဲချော်ခဲ့တာဖြစ်ပြီး အာတီတာအနေနဲ့ တောင်ပံတွေမှာ ထရိုဆက် နဲ့ မာတီနယ်လီတို့ကိုသာ အားထားခဲ့ရပါတယ်။ စတာလင်ကတော့ ပြီးခဲ့တဲ့အပတ်တွေက အခွင့်အရေးတွေရခဲ့ပေမယ့် စွမ်းဆောင်ရည်ကောင်းတွေပြသနိုင်ဖို့ ရုန်းကန်နေရဆဲဖြစ်ပါတယ်။

အာဆင်နယ်ဟာ နက်တိုကို ဘုန်းမောက်အသင်းထံကနေ အငှားခေါ်ယူထားခဲ့တာကြောင့် နောက်ထပ်ပရီးမီးယားလိဂ်စတားတစ်ဦးကို အငှားခေါ်ယူနိုင်ဖွယ်မရှိတော့တာဖြစ်ပါတယ်။ အဆိုပါအနေအထားကြောင့် စတာလင် ဒါမှမဟုတ် နက်တိုကို မိခင်အသင်းထံစေလွှတ်နိုင်တယ်လို့ သတင်းကြီးလာခဲ့ပါတယ်။

“ကျွန်တော်တို့ အဲ့အကြောင်း မတွေးဖြစ်ပါဘူး”လို့ အာတီတာက ပြောကြားခဲ့ပါတယ်။ အာဆင်နယ်ဟာ အခုဆောင်းဈေးကွက်ထဲမှာ တိုက်စစ်မှူးသစ်ခေါ်ယူဖို့ လုပ်ဆောင်နေပြီး ဆက်စ်ကို နဲ့ အီဆက်တို့ကိုတော့ ခေါ်ယူနိုင်ချေအလားအလာနည်းပါးနေပါတယ်။ ကန်ဟာကိုလည်း ချိတ်ဆ်နေပေမယ့် ချဲလ်ဆီး ၊ တော့တင်ဟမ် နဲ့ နော်တင်ဟမ်တို့ကပါ စိတ်ဝင်စားနေပါတယ်။ အာတီတာက  သူ့အနေနဲ့ အသင်းတိုက်စစ်ပိုင်းကိုအားဖြည့်ဖို့ ပြင်ဆင်နေပြီး မှန်ကန်တဲ့ကစားသမားမျိုးရှာဖွေနေတယ်လို့ ပြောကြားခဲ့ပါတယ်။

“ခင်ဗျားအနေနဲ့ သေချာတဲ့အရင်းအမြစ်ရှိဖို့ လိုအပ်ပါတယ်။ သေချာတဲ့ကစားသမားမျိုး ၊ အသင်းအတွက် အကျိုးပြုနိုင်မယ့်ကစားသမားမျိုး လိုအပ်ပါတယ်။ ကျွန်တော်တို့ အရေးပါတဲ့တိုက်စစ်ကစားသမား ၂ ဦးကို လက်လွှတ်ထားခဲ့ရပါတယ်။ကျွန်တော်တို့အသင်းအတွက် ဂိုးတွေလိုအပ်ပါတယ်။ အဲ့အတွက် မှန်ကန်တဲ့ကစားသမားလိုအပ်ပါတယ်။ မှန်ကန်တဲ့ကစားသမားရနိုင်ဖို့အတွက်လည်း ဈေးကွက်ထဲမှာ ရှာဖွေနေပါတယ်”လို့ အာတီတာက ထပ်လောင်းပြောကြားခဲ့ပါတယ်။