လီဗာပူးနဲ့ပွဲမတိုင်ခင် အီဇီကို ချီးကျူးလိုက်တဲ့ အာတီတာ
အာဆင်နယ်အသင်းနည်းပြ မီကယ်အာတီတာက ကစားသမားသစ် အီဘရာချီအီဇီကို ချီးကျူးပြောဆိုခဲ့ပြီး "ထူးခြားတဲ့စွမ်းရည်" ရှိသူဖြစ်တယ်လို့လည်း ပြောကြားခဲ့ပါတယ်။ ခရစ္စတယ်ပဲလေ့စ်အသင်းကနေ ပေါင် ၆၇.၅ သန်းနဲ့ ခေါ်ယူခဲ့တဲ့ အီဇီဟာ ပြီးခဲ့တဲ့အပတ်က အသင်းနဲ့စာချုပ်ချုပ်ဆိုခဲ့ပြီးနောက် အန်ဖီးလ်ကွင်းမှာ အာဆင်နယ်အသင်းအတွက် ပွဲထွက်လာဖို့ရှိနေပါတယ်။
သောကြာနေ့က သတင်းမီဒီယာတွေနဲ့တွေ့ဆုံစဉ်မှာ အာတီတာက အီဇီအပေါ် သူ့ရဲ့အမြင်ကိုပြောပြခဲ့ပြီး အဆိုပါကွင်းလယ်ကစားသမားရဲ့ စရိုက်လက္ခဏာနဲ့ အရည်အသွေးတွေကို ချီးကျူးခဲ့ပါတယ်။ အာတီတာက"သူက အရမ်းထက်မြက်တယ်၊ သူ့မှာအရမ်းထူးခြားတဲ့ စွမ်းအင်နဲ့ ထူးခြားတဲ့စွမ်းရည်တွေရှိတယ်။ သူက (သင်ယူဖို့) တကယ်ကို စိတ်အားထက်သန်သူဖြစ်ပါတယ်။ သူက အချက်အလက်တွေအများကြီးကို စုဆောင်းထားပြီးပြီ... ဒါပေမဲ့ အထူးသဖြင့် သူက သူ့ရဲ့အရည်အသွေးတွေကို ဖော်ထုတ်နိုင်ဖို့ လွတ်လပ်ခွင့်ရရှိဖို့နဲ့ စွမ်းရည်တွေပြသနိုင်ဖို့ ကျွန်တော်တို့က သူ့ကိုခေါ်ယူခဲ့တာပါ"လို့ ပြောခဲ့ပါတယ်။
အာဆင်နယ်အသင်းရဲ့ ပရိသတ်တစ်ဦးဖြစ်တဲ့ အီဇီအတွက်တော့ ဒီအပြောင်းအရွှေ့က အမှတ်ရစရာပါပဲ။ အီဇီဟာ ကျောနံပါတ် ၁၀ ဂျာစီကို ဝတ်ဆင်မှာဖြစ်ပြီး အာဆင်နယ်ရဲ့ ပြိုင်ဘက်ဖြစ်တဲ့ တော့တင်ဟမ်အသင်းဆီပြောင်းဖို့ရှိနေတဲ့ကိစ္စမှာ အာတီတာနဲ့ ဖုန်းတစ်ခါပြောဆိုခဲ့ရုံနဲ့ အာဆင်နယ်အသင်းကို ပြောင်းရွှေ့ဖို့သဘောတူခဲ့တယ်လို့ သိရပါတယ်။ ကစားသမားသစ်ကို ပွဲထွက်စာရင်းမှာ ချက်ချင်းထည့်သွင်းမှာလားလို့မေးမြန်းတဲ့အခါ အာတီတာက အတိအကျမဖြေကြားခဲ့ပါဘူး။
"ဒီရာသီမှာ ကျွန်တော်တို့မှာ အဲဒီနေရာအတွက် ရွေးချယ်စရာတွေရှိပြီး ဒါက ကောင်းတဲ့အချက်ပါ" လို့ နည်းပြကပြောကြားခဲ့ပြီး ချန်ပီယံဟောင်းနဲ့ ကစားရမယ့် အရေးကြီးတဲ့ပွဲစဉ်မှာ ဘယ်လိုလူစာရင်းမျိုးနဲ့ ကစားသွားမယ်ဆိုတာကိုတော့ အရိပ်အမြွက်မပြခဲ့ပါဘူး။
