ချဲလ်ဆီးအသင်းထံ အခုအပတ်က အပြီးသတ်ပြောင်းရွှေ့ခဲ့တဲ့ လူငယ်စတား အက်ဆူဂိုတစ်ယောက် ပေါ်တူဂီယူ - ၂၁ အသင်းကနေ အထုတ်ခံခဲ့ရတယ်လို့ သိရပါတယ်။ ချဲလ်ဆီးစတား စပို့တင်းစတား ၂ ဦးဖြစ်တဲ့ အက်ဆူဂို နဲ့ ကွမ်ဒါတို့ကို ပေါင် ၆၂.၄ သန်းနဲ့ အပြီးသတ်ခေါ်ယူခဲ့တာဖြစ်ပါတယ်။

ကွမ်ဒါဟာ စပို့တင်းမှာတုန်းက အာမိုရင်လက်အောက်မှာ ခြေစွမ်းကောင်းတွေပြသနိုင်ခဲ့တာဖြစ်ပြီး ယူနိုက်တက်က အလိုရှိခဲ့ပေမယ့် ချဲလ်ဆီးက ပေါင် ၄၂ သန်းနဲ့ ခေါ်ယူခဲ့တာဖြစ်ပါတယ်။ အက်ဆူဂိုကတော့ ဒီရာသီလက်စ်ပါးမက်စ်မှာ အငှားထွက်ကစားနေတာဖြစ်ပြီး ရာသီအကုန်မှာ ချဲလ်ဆီးနဲ့ပူးပေါင်းမှာဖြစ်ပါတယ်။ အက်ဆူဂိုဟာ ပေါ်တူဂီယူ - ၂၁ အသင်းအတွက် ၈ ပွဲပါဝင်ကစားပေးထားကာ သောကြာနေ့က ရိုမေးနီးယားကို ၁-၀ နဲ့အရေးနိမ့်ခဲ့တဲ့ပွဲအတွင်း ဒုတိယပိုင်းမှာ လူစားဝင်ကစားခဲ့ပါတယ်။

ဒါပေမယ့် အင်္ဂလန်ယူ - ၂၁ အသင်းနဲ့ခြေစမ်းပွဲကန်မယ့်လူစာရင်းမှာတော့ အက်ဆူဂိုတစ်ယောက် မပါဝင်လာခဲ့တာဖြစ်ပါတယ်။ အကြောင်းပြချက်ကတော့ အက်ဆူဂိုအနေနဲ့ ဥရောပယူ - ၂၁ ချန်ပီယံရှစ်ကန်ရမယ့် ဇွန်လမှာ ချဲလ်ဆီးအသင်းကလည်း ကလပ်ကမ္ဘာ့ဖလားကန်ရမှာဖြစ်ပါတယ်။

“အခုရွေးချယ်မှုက နည်းပြ ဂျော့ဂျ်ရဲ့ရွေးချယ်မှုပါ။ ရွေးချယ်ခံရပြီးနောက် အက်ဆူဂိုက ချဲလ်ဆီးနဲ့ပရော်ဖက်ရှင်နယ်စာချုပ်ချုပ်ဆိုခဲ့ပါတယ်။ ပြီးတော့ ချဲလ်ဆီးက ကလပ်ကမ္ဘာ့ဖလားကန်ရမှာပါ။  အဲ့တာက သူ့အတွက် ဥရောပယူ - ၂၁ ချန်ပီယံရှစ်ကန်ဖို့ မဖြစ်နိုင်လောက်ပါဘူး”လို့ ပေါ်တူဂီအသင်းဘက်က ကြေညာချက်ထုတ်ပြန်ခဲ့ပါတယ်။ ပေါ်တူဂီဟာ အုပ်စု (C) မှာ ပြင်သစ် ၊ ဂျော်ဂျီယာ ၊ ပိုလန်တို့နဲ့ တစ်အုပ်စုတည်းကျရောက်နေပါတယ်။