လန်ဒန်ဒါဘီပွဲမတိုင်ခင် အာဆင်နယ်နည်းပြ အာတီတာက ပြိုင်ဘက် ချဲလ်ဆီးအသင်းကို ဒီရာသီပရီးမီးယားလိဂ်ချန်ပီယံဆုစိန်ခေါ်နိုင်မယ့်အသင်းအဖြစ် မျှော်လင့်ခဲ့ကြောင်း ပြောကြားလိုက်ပါတယ်။ သောကြာနေ့က သတင်းစာရှင်းပွဲမှာ အာတီတာက ချဲလ်ဆီးအသင်းကို ချီးကျူးပြောကြားခဲ့ပြီး မာရက်စ်လက်အောက်မှာ တိုးတက်မှုတွေရှိလာတယ်လို့ ပြောကြားခဲ့ပါတယ်။

ချဲလ်ဆီးအသင်းဟာ ရလဒ်တွေတိုးတက်လာခဲ့ပြီး လီဗာပူးကို ၂ မှတ်အကွာအထိ ဖိအားပေးနိုင်ခဲ့ပေမယ့် ဒီဇင်ဘာနောက်ပိုင်းကတည်းက လိဂ်ပွဲ ၁၂ ပွဲမှာ ၄ ပွဲသာအနိုင်ရရှိခဲ့ပါတယ်။ အာဆင်နယ်အသင်းကလည်း ချန်ပီယံဆုအတွက် လီဗာပူးအသင်းကို ဖိအားပေးနိုင်ခဲ့ပေမယ့် နောက်ပိုင်းမှာ ခြေချော်ခဲ့တာကြောင့် ၁၅ မှတ်အထိ ကွာဟခဲ့တာဖြစ်ပါတယ်။

၂ သင်းစလုံးကတော့ လာမယ့်ရာသီချန်ပီယံလိဂ်ဝင်ခွင့်အတွက်သာ အာရုံစိုက်ရတော့မှာဖြစ်ပြီး လာမယ့်ရာသီသစ်မှာ ပရီးမီးယားလိဂ်အသင်း ၅ သင်းက ချန်ပီယံလိဂ်ဝင်ခွင့်ရမှာဖြစ်ပါတယ်။ လက်ရှိချဲလ်ဆီးအသင်းက မန်စီးတီး ၊ နယူးကာဆယ်တို့နဲ့ ၂ မှတ်အကွာ အဆင့် ၄ နေရာမှာ ရပ်တည်နေပါတယ်။ 

“ကျွန်တော် ချဲလ်ဆီးအသင်းကို ရာသီကြိုကတည်းက စောင့်ကြည့်ဖြစ်ပါတယ်။ပြီးတော့ မာရက်စ်ကာလက်အောက်မှာ ဘယ်လိုအလုပ်လုပ်လဲဆိုတာကို နားလည်လိုက်သလို သူတို့လူစာရင်းမှာ အရည်အချင်းရှိတယ်ဆိုတာကို မြင်ခဲ့ပါတယ်။ အစကတည်းက ကျွန်တော် သူတို့ချန်ပီယံဆုစိန်ခေါ်နိုင်မယ့်အသင်းအဖြစ် မျှော်လင့်ခဲ့တာပါ။ သူတို့မှာ စွမ်းဆောင်ရည်ကောင်းတွေရှိသလို ချိတ်ဆက်မှု ၊ စွမ်းအင် နဲ့ တည်ငြိမ်မှုလည်း ရှာဖွေနိုင်ခဲ့ပါတယ်။

သူတို့က ဘယ်အသင်းနဲ့မဆို ယှဉ်နိုင်တယ်လို့ ကျွန်တော်ထင်ပါတယ်။ မာရက်စ်ကာကလည်း ထိပ်တန်းနည်းပြတစ်ဦးပါ။ သူက သူလိုချင်တာကိုရှင်းရှင်းလင်းလင်းလုပ်ပါတယ်။ သူ့အသင်းကစားဟန်ကို ကျွန်တော် တကယ်ကြိုက်ပါတယ်”လို့ အာတီတာက ဖြေကြားခဲ့ပါတယ်။ လန်ဒန်ဒါဘီပွဲအပြီးမှာ အာဆင်နယ်ဟာ ချန်ပီယံလိဂ်ကွာတားဖိုင်နယ်ပွဲအဖြစ် ရီးရဲလ်အသင်းနဲ့ရင်ဆိုင်ရမှာဖြစ်ပြီး ၂၀၀၆ နောက်ပိုင်း အခုတစ်ကြိမ်တွေ့ဆုံမှုက ဒုတိယအကြိမ်ဖြစ်လာခဲ့ပါတယ်။ ပထမအကြိမ်တွေ့ဆုံတုန်းက အာဆင်နယ်ဟာ ၂ ကျော့ပေါင်း ၁-၀ နဲ့ အနိုင်ရရှိခဲ့ပါတယ်။