သတင်းတွေအရ ရီးရဲလ်အသင်းစတား ၄ ဦးဖြစ်တဲ့ ဘာပေ ၊ ဗင်နီအပါအဝင် ကစားသမား ၄ ဦးဟာဟာ ယူအီးအက်ဖ်အေရဲ့ပြစ်ဒဏ်နဲ့ရင်ဆိုင်ရဖို့များနေပြီး အာဆင်နယ်နဲ့ပွဲကို လွဲချော်နိုင်ချေရှိနေပါတယ်။ တီကိုနဲ့ပွဲအပြီးမှာ ယူအီးအက်ဖ်အေဘက်က စည်းကမ်းပိုင်းဆိုင်ရာကြောင့် ဘာပေ ၊ ရူဒီဂါ ၊ ဗင်နီ နဲ့ ဆီဘယ်လော့စ်တို့ကို အရေးယူဖို့ ပြင်ဆင်နေပါတယ်။

ရူဒီဂါကတော့ ပွဲအပြီးမှာ တီကိုပရိသတ်တွေကို မဆီလျော်တဲ့အပြုအမူမျိုးပြုလုပ်ခဲ့တာကြောင့် ပိုကြီးမားတဲ့ပြစ်ဒဏ်နဲ့ရင်ဆိုင်ရဖို့များနေပါတယ်။ ဘာပေကလည်း တီကိုပရိသတ်တွေရှေ့မှာ မဆီလျော်တဲ့အောင်ပွဲခံမှုမျိုးပြုမူခဲ့တာဖြစ်ပါတယ်။ ဒါ့အပြင် ဗင်နီက ပင်နယ်တီကန်သွင်းပြီးနောက် တီကိုပရိသတ်တွေရှေ့မှာ ကွင်းကိုညွှန်ပြပြီး အောင်ပွဲခံခဲ့ပါတယ်။

ဆီဘယ်လော့စ်ကတော့ ပွဲအပြီးဥမင်ထဲဝင်ချိန်မှာ တီကိုပရိသတ်တွေကို မဆီလျော်တဲ့အပြုအမူပြုလုပ်ခဲ့တယ်ဆိုတဲ့ ဗီဒီယိုထွက်ပေါ်လာခဲ့တာဖြစ်ပါတယ်။ “ယူအီးအက်ဖ်အေရဲ့စည်းကမ်းထိန်းသိမ်းရေးဆိုင်ရာကော်မတီကတော့ တီကိုနဲ့ပွဲက ရီးရဲလ်စတား ၄ ဦးရဲ့အခြေအနေကို စစ်ဆေးနေပါတယ်”လို့ ကြေညာချက်ထုတ်ပြန်ခဲ့ပါတယ်။

မက်ဒရစ်အနေနဲ့တော့ ပြစ်ဒဏ်တွေကနေရှောင်ရှားနိုင်ဖို့ ယူအီးအက်ဖ်အေနဲ့ ဆွေးနွေးရဖွယ်ရှိနေပါတယ်။ ၂၀၁၉ တုန်းက ရော်နယ်ဒိုတစ်ယောက် တီကိုနည်းပြ ဆီမြွန်နီရဲ့အောင်ပွဲခံမှုနဲ့ အောင်ပွဲခံခဲ့တာကြောင့် ယူအီးအက်ဖ်အေရဲ့ပေါင် ၁၇၃၀၀ ဒဏ်ကြေးပေးဆောင်စေမှုနဲ့ ရင်ဆိုင်ခဲ့ရပါတယ်။ အခုနှစ်ဖေဖော်ဝါရီတုန်းကလည်း ယူအီးအက်ဖ်အေဟာ မန်စီးတီးနည်းပြ ဂွါဒီယိုလာကို သံပြိုင်သီဆိုသရော်ခဲ့တဲ့ ရီးရဲလ်ပရိသတ်အချို့ကြောင့် မက်ဒရစ်အသင်းကို ပေါင် ၂၄၈၀၀ ပြစ်ဒဏ်ချမှတ်ခဲ့ပါတယ်။

ရီးရဲလ်အသင်းဟာ ချန်ပီယံလိဂ်ကွာတားဖိုင်နယ်ပထမအကျော့အဖြစ် ဧပြီလ ၈ ရက်နေ့ အမ်းမရိတ်မှာ အာဆင်နယ်နဲ့ပထမအကျော့ကန်ရမှာဖြစ်ပြီး အဲ့နောက် ဒုတိယအကျော့ကို ဧပြီလ ၁၆ ရက်နေ့ ဘာနေဗျူးမှာ ကန်ရမှာဖြစ်ပါတယ်။