နူနက်ဇ်ဟာ ဘင်ဖီကာမှ ငွေကြေးအမြောက်အမြားဖြင့် ပြောင်းရွှေ့လာပြီးနောက် အန်ဖီးလ်ရှိ သုံးနှစ်ကြာ ကာလအတွင်း ကစားပုံ မတည်ငြိမ်နေတာဖြစ်ပါတယ်။ လီဗာပူးဟာ ဥရုဂွေးလက်ရွေးစင် တိုက်စစ်မှူးအား ဝယ်ယူရန် ပေါင် ၆၄ သန်း ပေးခဲ့ရပြီး အပိုကြေးများဖြင့် စုစုပေါင်းကုန်ကျစရိတ်မှာ ပေါင် ၈၅ သန်းအထိ ရှိနိုင်ကာ သူ့အား ကလပ်ရဲ့ သမိုင်းတစ်လျှောက် ငွေကြေးအများဆုံး ပေးကာဝယ်ယူခဲ့သော ကစားသမားဖြစ်စေခဲ့ပါတယ်။  

ထိုမျှများပြားတဲ့ ငွေကြေးကုန်ကျမှုကြောင့် နူနက်ဇ်ထံမှ ပိုမိုမျှော်လင့်ထားခဲ့ကြသော်လည်း လက်ရှိရာသီပရီးမီးယားလိဂ်တွင် အသင်းအတွက် ၄ ဂိုးသာ သွင်းယူနိုင်ထားသော်လည်း အသင်းကတော့ ဇယားထိပ်တွင် ရပ်တည်နေပါတယ်။  စလော့ကတော့ လီဗာပူးရဲ့ တိုက်စစ်မှူးနေရာတွင် အခြားရွေးချယ်စရာကစားသမားတွေကို ပိုမိုနှစ်သက်နေပြီး နူနက်ဇ်အား လိဂ်ပွဲစဉ်များရဲ့ သုံးပုံတစ်ပုံထက်နည်းသော ပွဲစဉ်များတွင်သာ စတင်ကစားခွင့်ပေးခဲ့တာဖြစ်ပါတယ်။  

အန်ဖီးလ်ဂန္တဝင် ကာရေဂါက လီဗာပူးဟာ နူနက်ဇ်အား ရောင်းချရန် စဉ်းစားသင့်ကြောင်း အကြံပြုခဲ့သော်လည်း The Athletic ရဲ့ဖော်ပြချက်အရ အသင်းဟာ သူ့အား ထွက်ခွာခွင့်ပြုရန် မရည်ရွယ်ကြောင်း သိရပါတယ်။

ဆော်ဒီပရိုလိဂ်ကလပ် အယ်လ်နာဆာဟာ ဇန်နဝါရီလ အပြောင်းအရွှေ့ကာလတွင် နူနက်ဇ်အား ‌ခေါ်ယူရန် စိတ်ဝင်စားကြောင်း ဖော်ပြခဲ့သော်လည်း လီဗာပူးက ချက်ချင်းငြင်းဆန်ခဲ့ပြီး ချန်ပီယံဆုအတွက် ပြိုင်ဆိုင်နေတဲ့ စလော့ရဲ့အသင်းအတွက် ဒုတိယရာသီဝက်တွင် နူနက်ဇ်က အရေးပါတဲ့ အခန်းကဏ္ဍမှ ပါဝင်မယ်လို့ ယုံကြည်နေတာဖြစ်ပါတယ်။  

သို့သော်လည်း အဆိုပါအချက်က နူနက်ဇ်အား မာဆေးဆိုဒ်တွင် ရေရှည်ရှိနေမယ်လို့ ဆိုလိုတာ မဟုတ်ပါဘူး။ လီဗာပူးဟာ အသက် ၂၅ နှစ်အရွယ် ကစားသမားအား ရာသီကုန်တွင် စိတ်ဝင်စားမှုများစွာရှိလာနိုင်တယ်လို့ မျှော်လင့်ထားပြီး နွေရာသီတွင် ရောင်းချမှုဖို့အတွက် လက်ရှိအချိန်ကို ငြင်းပယ်ခဲ့တာဖြစ်ပါတယ်။ နူနက်ဇ်ဟာ နိုဝင်ဘာလအစောပိုင်းကတည်းက သွင်းဂိုး ၁ ဂိုးသာ ရရှိခဲ့ပြီး ယခုလအစောပိုင်းက ဘရန့်ဖို့ဒ်အား ၂-၀ ဂိုးဖြင့် အနိုင်ရခဲ့တဲ့ ပွဲစဉ်ရဲ့ နာကျင်အချိန်ပိုတွင် ၂ ဂိုး သွင်းနိုင်ခဲ့ပါတယ်။  

အရေးပါတဲ့ ပါဝင်မှုမတိုင်မီ ရက်အနည်းငယ်အလိုတွင် နူနက်ဇ်အား ကလပ်ဂန္တဝင် ရော်ဘီဖောင်လာက လီဗာပူး ကစားသမားမဟုတ်ဘူးလို့ ပြောကြားခဲ့ပါတယ်။ "ကျွန်တော်တို့က အခုလည်း လွန်ခဲ့တဲ့ နှစ်နှစ် သုံးနှစ်ကတည်းက ပြောနေတဲ့အတိုင်းပဲ ပြောနေတုန်းပါပဲ။ သူဟာ ကြမ်းတမ်းပြီး ဒီလိုလို ဟိုလိုလို ဖြစ်နေတာပါ" "ဒါကို ဆက်ပြီး ပြောလို့မရဘူး။ ကျွန်တော်ကတော့ သူ့ကို ပိုမြင်လေ၊ သူဟာ လီဗာပူး ကစားသမားမဟုတ်ဘူးဆိုတာ ပိုပြီးထင်လာလေပါပဲ"  

"လူတွေက ကျွန်တော်ကို ဒါကိုပြောလို့ ဝေဖန်ကြပါလိမ့်မယ်။ ဘာလို့လဲဆိုတော့ သူဟာ ကြိုးစားတယ်။ ဒါပေမယ့် ကစားသမားတစ်ယောက်ကို ကြိုးစားတာကြောင့် ဝယ်တာမဟုတ်ဘူး။ ဒါက အခြေခံလိုအပ်ချက်တစ်ခုပါ" "မင်းဒီကိုလာပြီး ဂိုးတွေသွင်းရမယ်။ သူဟာ ဘာလုပ်ပေးလဲဆိုတာကြောင့် ပရိသတ်တွေရဲ့ စိတ်ကြိုက်ဖြစ်နေတယ်ဆိုတာ ကျွန်တော်သိပါတယ်။ ဒါပေမယ့် အခုအချိန်မှာတော့ ပိုကောင်းအောင် လုပ်ရမယ်၊ လီဗာပူး အင်္ကျီနဲ့ ပိုကောင်းအောင် ထိုက်တန်အောင် ကစားရပါမယ်" လို့ ဖောင်လာက ပြောပါတယ်။  

ကာရေဂါကလည်း နူနက်ဇ် အပေါ် သံသယများရှိကြောင်း ဖော်ပြခဲ့ပြီး အပြောင်းအရွှေ့ကာလမပြီးဆုံးမီ သင့်တော်တဲ့ ကမ်းလှမ်းချက်ရရှိပါက သူ့အား ရောင်းချသင့်ကြောင်း ဝန်ခံခဲ့ပါတယ်။ "ဒီပြဿနာအတွက် လီဗာပူးမှာ ဂျိုတာဆိုတဲ့ အခြားရွေးချယ်စရာ ကစားသမားရှိပါတယ်။ ဒါပေမယ့် သူဟာ ဒဏ်ရာများတတ်တဲ့အတွက် အနည်းငယ် လျော့သွားနိုင်ပါတယ်"  

"သေချာတာကတော့ နွေရာသီအထိ ဒီကမ်းလှမ်းချက်ရှိနေဦးမယ်ဆိုရင် ဇန်နဝါရီမှာ သူ့ကို ဆက်ထားလိုက်ပြီး နွေရာသီမှာ ဒီငွေရှိနေဦးမလားဆိုတာ မသေချာပေမယ့် ငွေတွေကတော့ အများကြီးရှိနေမှာပါ" "ကျွန်တော်သာဆိုရင် သူ့ကို ရောင်းဖို့ စွန့်စားလိုက်မှာပါ။ ကလော့ပ် လက်ထက်မှာ သူဟာ သိပ်မကောင်းပေမယ့် ဒီကစားပုံကြောင့် သူ့ရဲ့အမြန်နှုန်းနဲ့ တိုးအားရုန်းအားကို အသုံးပြုရမှာဖြစ်ပါတယ်" "အာနီစလော့ လက်ထက်မှာတော့ နည်းနည်းပိုနှေးကွေးပြီး သူဟာ နေရာတစ်ခုမှာ ရပ်နေသလိုဖြစ်နေပါတယ်။ ဒါက သူ့အတွက် မသင့်တော်ပါဘူး" လို့ ပြောပါတယ်။  

အယ်လ်နာဆာဟာ နူနက်ဇ်အား ဝယ်ယူရန် စဉ်းစားခဲ့ပြီး အသင်းရဲ့ တိုက်စစ်မှူးရွေးချယ်စရာနေရာတွေကို အားဖြည့်ရန် ရှာဖွေနေတာဖြစ်ပါတယ်။ ယခုအခါတွင် အယ်လ်နာဆာဟာ လေဗာကူဆင်ရဲ့ ဘိုနီဖေ့စ် သို့မဟုတ် ဗီလာက ဒူရန်အား ဝယ်ယူရန် မျှော်လင့်ထားပြီး ဒူရန်ကိုလည်း အာဆင်နယ်၊ ချဲလ်ဆီး နှင့် ဝက်စ်ဟမ်းတို့ကပါ စိတ်ဝင်စားနေပါတယ်။  

ပရီးမီးယားလိဂ်အမှတ်ပေးဇယားတွင် ရမှတ် ၆ မှတ်အသာဖြင့် ဦးဆောင်နေတဲ့ လီဗာပူးဟာ ဗုဒ္ဓဟူးနေ့တွင် ပီအက်စ်ဗွီနှင့် ချန်ပီယံလိဂ်အုပ်စုအဆင့် နောက်ဆုံးပွဲစဉ်ကို ကစားရန် ရှိနေပါတယ်။ စလော့ဟာ သူရဲ့ ပထမအသင်း ကစားသမားများစွာကို အင်္ဂလန်တွင် ချန်ထားခဲ့ပြီး အုပ်စုတွင် ထိပ်ဆုံးနှစ်နေရာအတွင်းဝင်ရန် အာမခံချက်ရှိထားပြီးဖြစ်လို့ ထိပ်ဆုံးတန်းသို့ ရောက်ရန် ရမှတ် ၁ မှတ်သာ လိုအပ်နေတာဖြစ်ပါတယ်။