မန်ချက်စတာယူနိုက်တက်နောက်ခံလူ လန်နီယိုရိုက ခက်ခဲတဲ့ ရာသီအစမှာ အသင်းရဲ့ကစားသမားတွေအနေနဲ့ စည်းစည်းလုံးလုံးနေပြီး ရှေ့ဆက်သွားရမယ်လို့ တိုက်တွန်းပြောကြားလာခဲ့ပါတယ်။ ယိုရိုက အသင်းအနေနဲ့ သေးငယ်တဲ့အမှားလေးတွေကို ရှောင်ရှားနိုင်မယ်ဆိုပါက အခြေအနေတွေကို ပြန်လည်ထိန်းချုပ်နိုင်လိမ့်မယ်လို့ ယုံကြည်နေပြီး အခက်အခဲတွေကို အတူတကွ ရင်ဆိုင်သွားရမယ်လို့ အခိုင်အမာပြောကြားလာခဲ့တာဖြစ်ပါတယ်။ ယခု ၂၀၂၅-၂၆ ရာသီအတွင်း ယူနိုက်တက်ဟာ ပရီးမီးယားလိဂ်မှာနိုင်ပွဲမရသေးသလို ကာရာဘောင်ဖလားပြိုင်ပွဲမှာလည်း ဂရင်းစ်ဘီတောင်းအသင်းလေးကို ရှုံးနိမ့်ပြီး ပြိုင်ပွဲကနေ နုတ်ထွက်ခဲ့ရပါတယ်။ 

ဒါကြောင့် နည်းပြအာမိုရင်ရဲ့အနာဂတ်ကလည်း တည်ငြိမ်မှုမရှိဘဲ ထင်ကြေးပေးမှုတွေ အမျိုးမျိုးရှိနေပြီး ပေါ်တူဂီသားဟာ အိုးလ်ထရက်ဖို့ဒ်ကနေ ထုတ်ပယ်ခံရတော့မယ်လို့ ယူဆခံနေရတာဖြစ်ပါတယ်။ ယခုအခါမှာတော့ ယိုရိုက "လက်ရှိအခြေအနေက အသင်းမှာရှိတဲ့လူတိုင်းအတွက် ခက်ခဲနေမှာပါ။ ဒါပေမယ့် အခုကစားထားတဲ့ပွဲတွေက အတိတ်မှာကျန်ခဲ့ပါပြီ။ ကျွန်တော်တို့ လာမယ့်အနာဂတ်ကိုပဲ အာရုံစိုက်သွားရမှာပါ။ ဘန်လေနဲ့ပွဲအတွက် အသင်းက အဆင်သင့်ရှိနေပြီလို့ယုံကြည်ပါတယ်"

"ပြီးခဲ့တဲ့ပရီးမီးယားလိဂ် ၂ ပွဲစလုံးမှာ ကျွန်တော်တို့ နည်းနည်းကံမကောင်းခဲ့လို့ နိုင်ပွဲနဲ့လွဲချော်ခဲ့ပါတယ်။ ကျွန်တော်တို့ရဲ့ ကစားပုံကတော့ ကောင်းခဲ့တယ်လို့ထင်ပါတယ်။ ဂိုးရဖို့အခွင့်အရေးတွေ ဖန်တီးနိုင်ခဲ့ပေမယ့် အသုံးမချနိုင်ခဲ့သလို ပြိုင်ဘက်ရဲ့ဂိုးတွေကိုလည်း ခွင့်ပြုပေးခဲ့ရပါတယ်။ အခွင့်အရေးတွေအသုံးချနိုင်ဖို့ ကြိုးစားသွားရပါမယ်။ ကျွန်တော်တို့လိုအပ်နေတဲ့တိုးတက်မှုလေးက ဒါပါပဲ။ အမှားသေးသေးလေးတွေကိုပြင်နိုင်ရင် နိုင်ပွဲတွေရလာမယ်လို့ ယုံကြည်ပါတယ်။ ကာရင်တန်ကိုရောက်တဲ့အချိန်တိုင်း ကျွန်တော်တို့ အာရုံစူးစိုက်မှုအပြည့်နဲ့ကြိုးစားနေပါတယ်။ စည်းစည်းလုံးလုံးနေထိုင်ပြီး ရှေ့ဆက်နိုင်ဖို့ အာရုံစိုက်သွားရပါမယ်" လို့ပြောကြားခဲ့ပါတယ်။ 

စနေနေ့ညမှာတော့ ယူနိုက်တက်ဟာ တတိယတတိယမြောက်ပရီးမီးယားလိဂ်ပွဲစဉ်အဖြစ် ဘန်လေကို အိမ်ကွင်းအိုးလ်ထရက်ဖို့ဒ်မှာ ဧည့်ခံကစားသွားရမှာဖြစ်ပြီး ဒီရာသီပထမဆုံးနိုင်ပွဲကို စတင်ရယူသွားနိုင်မလား စောင့်ကြည့်ရပါမယ်။