ယနေ့နံနက်က ဖူလ်ဟမ်ကို ၀-၁ နဲ့အနိုင်ရခဲ့တဲ့ပရီးမီးယားလိဂ်ပွဲစဉ်မှာ ယူနိုက်တက်အတွက် ၁ လုံးတည်းသောအနိုင်ဂိုးကိုသွင်းယူပေးခဲ့တဲ့ နောက်ခံလူ လီဆန်ဒရိုမာတီနက်ဇ်က အခုလိုဂိုးသွင်းနိုင်ခဲ့ခြင်းမှာ ကံကောင်းလို့သာဖြစ်တယ်လို့ ထုတ်ဖော်ပြောကြားလာခဲ့ပါတယ်။ 

ပွဲကစားချိန် ၇၈ မိနစ်အရောက်မှာ မာတီနက်ဇ်ဟာ ဂိုးဧရိယာအပြင်သို့လျှံထွက်လာတဲ့ ဘောလုံးကို ရုတ်တရက် အပြင်းကန်သွင်းလိုက်စဉ် ဘောလုံးဟာ ဖူလ်ဟမ်ဂိုးသမားကိုကျော်ပြီး ဂိုးပိုက်ထဲသို့ ဆိုက်ဆိုက်မြိုက်မြိုက်ရောက်ရှိသွားခဲ့တာဖြစ်ပါတယ်။ အဆိုပါသွင်းဂိုးဟာ ကြက်ကန်းဆန်အိုးတိုးပြီး ရခဲ့တဲ့သွင်းဂိုးတစ်ဂိုးလို့ သတ်မှတ်လို့ရပေမယ့် ယူနိုက်တက်အတွက်တော့ အနိုင် ၃ မှတ်ရရှိစေဖို့ လုံလောက်ခဲ့ပါတယ်။ 

ယခုနိုင်ပွဲဟာ ဒီရာသီယူနိုက်တက်ရဲ့ ပရီးမီးယားလိဂ် ၃ ပွဲမြောက်အဝေးကွင်းနိုင်ပွဲတစ်ပွဲလည်းဖြစ်ခဲ့ပါတယ်။ ပွဲအပြီးမှာ အာဂျင်တီးနားလက်ရွေးစင်က “ဒီဂိုးဝင်သွားတာ ကံကောင်းလို့ပါ။ ဒါပေမယ့် ဒီနိုင်ပွဲက အရေးပါတဲ့နိုင်ပွဲဖြစ်ခဲ့ပါတယ်။ ဒီလိုပုံစံနဲ့အနိုင်ရလည်း အသင်းအတွက် ပျော်ပါတယ်။ ဘယ်သူဂိုးသွင်းတယ်ဆိုတာ အရေးမကြီးပါဘူး။ အရေးကြီးဆုံးက ၃ မှတ်ရဖို့ပါပဲ” လို့ပြောကြားခဲ့ပါတယ်။ 

ဆက်လက်ပြီး မာတီနက်ဇ်က ယခုပွဲစဉ်မှာခြေစွမ်းပြခဲ့တဲ့  အသင်းရဲ့လူငယ်ကစားသမားလေး တိုဘီကိုလီယာကိုလည်း ချီးကျူးပြောဆိုမှုတွေပြုလုပ်ခဲ့ပါတယ်။ ကိုလီယာဟာ ဒုတိယပိုင်းအတွင်း ဖူလ်ဟမ်နောက်ခံလူ ဂျိုအာချင်အန်ဒါဆန်ရဲ့ ခေါင်းတိုက်ချက်ကို ဂိုးစည်းပေါ်ကနေ ဖြတ်ထုတ်ပေးပြီး ယူနိုက်တက်ကို ကယ်တင်ခဲ့တာဖြစ်ပါတယ်။ 

မာတီနက်ဇ်က “ဒီကောင်လေးနဲ့အတူတူကစားရတာ ပျော်ပါတယ်။ သူက မျိုးဆက်သစ်တွေအတွက် စံနမူနာတစ်ခုပါပဲ။ နေ့ရက်တိုင်းမှာအလုပ်ကြိုးစားနေပြီး အရမ်းနှိမ့်ချတတ်တဲ့လူတစ်ယောက်ပါ။ ဒီပွဲက အားလုံးအတွက် အဓိပ္ပာယ်အများကြီးရှိပါတယ်။ အသင်းရဲ့ရှုံးပွဲတွေကြောင့် ပရိသတ်တွေချည်းပဲ ခံစားခဲ့ရတာမဟုတ်ပါဘူး။ ကျွန်တော်တို့လည်း အများကြီးခံစားခဲ့ရပါတယ်။ ခက်ခဲတဲ့နိုင်ပွဲတစ်ပွဲပါ။ ယူနိုက်တက်မှာ ဘယ်လောက်အထိဖိအားများသလဲဆိုတာ ကျွန်တော်တို့သိပါတယ်။ ခက်ခက်ခဲခဲအနိုင်ရခဲ့ပေမယ့် ကျွန်တော်တို့ နှိမ့်ချပြီးနေရပါမယ်” လို့ပြောကြားခဲ့ပါတယ်။ 

ပြိုင်ပွဲစုံ ၂ ပွဲဆက်တိုက်အနိုင်ရခဲ့တဲ့ ယူနိုက်တက်အနေနဲ့ လာမယ့်သောကြာနေ့မှာတော့ ယူရိုပါလိဂ်အုပ်စုအဆင့် နောက်ဆုံးပွဲစဉ်အဖြစ် ရိုမေးနီးယားကလပ် FCSB ကိုအဝေးကွင်းမှာသွားရောက်ရင်ဆိုင်ရမှာဖြစ်ပြီး ၃ ပွဲဆက်တိုက်နိုင်ပွဲရရှိဖို့ ကြိုးစားသွားရပါမယ်။ အဆိုပါပွဲစဉ်အပြီး တနင်္ဂနွေနေ့မှာတော့ ယူနိုက်တက်ဟာ ပရီးမီးယားလိဂ်ပွဲစဉ်အဖြစ် ခရစ္စတယ်ပဲလေ့စ်နဲ့ ယှဉ်ပြိုင်သွားရပါမယ်။