အီဒင်တာဇစ်ထွက်ခွာသွားပြီးနောက် ဒေါ့မွန်အသင်းက နည်းပြသစ်အဖြစ် နူရီဆာဟင်ကို ခန့်အပ်လိုက်ပြီလို့ အတည်ပြုထုတ်ပြန်ပါတယ်။

ဘွန်ဒက်စ်လီဂါထိပ်သီးကလပ်က အခုသီတင်းပတ်အစောပိုင်း၊ တာဇစ်နဲ့ အံ့အားသင့်ဖွယ်လမ်းခွဲမှုအပြီး နည်းပြသစ်အဖြစ် ဆာဟင်ကို ခန့်အပ်လိုက်တာပါ။ ဒေါ့မွန်က ပြီးခဲ့တဲ့ဘောလုံးရာသီ၊ ချန်ပီယံလိဂ်ဗိုလ်လုပွဲမှာ ရီးရဲလ်မက်ဒရစ်ကို ၂-၀ ဂိုးဖြင့် ရှုံးနိမ့်ပြီး ဒုတိယနေရာနဲ့ပဲ ကျေနပ်ခဲ့ရပါတယ်။ အခုလို နာကျင်ဖွယ်ရှုံးနိမ့်မှုအပြီး ကလပ်အသင်းကိုဦးဆောင်ဖို့ နောက်ထပ်လူသစ်တစ်ဦးကို နေရာပေးသင့်ပြီလို့ တာဇစ်က ထုတ်ဖော်ဝန်ခံခဲ့ပါတယ်။

ဒေါ့မွန်ဂန္တဝင်ဆာဟင်အတွက် လုပ်စရာအလုပ်တွေအများအပြား စောင့်ကြိုနေပါတယ်။ ဘွန်ဒက်စ်လီဂါပြိုင်ပွဲမှာ အဆင့်-၅ နေရာဖြင့် ရာသီသိမ်းပြီးနောက် ဝါရင့်နောက်ခံလူဟမ်းမဲလ်လည်း တာဇစ်နဲ့အတူ အသင်းမှထွက်ခွာသွားပါတယ်။ ရာသီကုန်ဆုံးချိန်မှာ ဒေါ့မွန်က ချန်ပီယံဖြစ်လာတဲ့ လေဗာကူဆင်နဲ့ ၂၇ မှတ်အထိ ကွာဟခဲ့ပါတယ်။

ဆာဟင်က “ဒေါ့မွန်အသင်းရဲ့နည်းပြချုပ်ဖြစ်ခွင့်ရတာ ကျွန်တော့်အတွက် ကြီးမားတဲ့ဂုဏ်ပြုမှုတစ်ခုပါ။ ဒီအတွက် ဂုဏ်ယူဝမ်းမြောက်မိပါတယ်။ ကျွန်တော့်အပေါ်ပြသခဲ့တဲ့ယုံကြည်မှုတွေအတွက် ကလပ်အသင်းအကြီးအကဲတွေကိုလည်း ကျေးဇူးတင်မိပါတယ်။ ဒေါ့မွန်အသင်းမှာ ကျွန်တော့်ရဲ့အခန်းကဏ္ဍအသစ်အတွက် အကြီးအကျယ် မျှော်လင့်မိနေပါတယ်။ ပထမဆုံးနေ့မှစပြီး ကျွန်တော်တို့တွေ ကိုယ်လုပ်နိုင်တဲ့အရာအားလုံးကို လုပ်သွားရပါလိမ့်မယ်။ ဒီကလပ်အသင်းအတွက် တက်နိုင်သမျှ အောင်မြင်မှုတွေ ရရှိစေဖို့ ခွန်အားအပြည့်၊ စိတ်ဓါတ်အပြည့် လုပ်ဆောင်ရပါလိမ့်မယ်”လို့ ပြောပါတယ်။

ဆာဟင်က ဒေါ့မွန်နဲ့ ကောင်းစွာရင်းနှီးနေပေမယ့် နည်းပြသစ်အဖြစ် မိတ်ဆက်ခွင့်ရရှိဖို့တော့ သီတင်းပတ်အနည်းငယ်လောက် စောင့်ဆိုင်းရပါဦးမယ်။ လက်ရှိဒေါ့မွန်ကစားသမားတွေအနက် နွေရာသီအားလပ်ရက်ခံစားနေသူတွေရှိကြသလို ယူရိုပြိုင်ပွဲနဲ့ ကိုပါအမေရိကပြိုင်ပွဲတွေအတွက် လက်ရွေးစင်အသင်းနဲ့အတူပူးပေါင်းနေသူတွေလည်း ရှိနေပါတယ်။ အခုအချိန်မှာတော့ တူရကီလူမျိုးနည်းစနစ်ပိုင်းကျွမ်းကျင်သူက  ၂၀၂၄-၂၀၂၅ ဘွန်ဒက်စ်လီဂါချန်ပီယံဆုစိန်ခေါ်နိုင်ဖို့အတွက် အသင်းကို ပြန်လည်ဖွဲ့စည်းဖို့ လုပ်ဆောင်သွားရပါလိမ့်မယ်။