လီယွန်နယ်မက်ဆီနဲ့ အာဂျင်တီးနားလက်ရွေးစင်အသင်းတို့ဟာ လာမယ့် ၂၀၂၆ ခုနှစ်အစောပိုင်း စင်္ကာပူမှာကျင်းပသွားမယ့် အပျော်တမ်းဘောလုံးပြိုင်ပွဲသို့ တက်ရောက်သွားမယ်လို့ သိရပါတယ်။ ဒါ့အပြင် အာဂျင်တီးနားအသင်းဟာ ယခုနှစ်အောက်တိုဘာလအတွင်းမှာလည်း အိန္ဒိယမှာကျင်းပမယ့် အပျော်တမ်းဘောလုံးပွဲမှာ ပါဝင်ကစားသွားမှာဖြစ်ပါတယ်။ အဆိုပါပွဲစဉ်တွေဟာ အာဂျင်တီးနားဘောလုံးအဖွဲ့ချုပ် AFA နဲ့ HSBC တို့ရဲ့ လက်တွဲအလုပ်လုပ်ကိုင်မှု ၁ နှစ်ပြည့် အထိမ်းအမှတ်အနေနဲ့ ကျင်းပတာဖြစ်တယ်လို့သိရပါတယ်။ 

HSBC က"ဒီလိုပူးပေါင်းဆောင်ရွက်မှုက ကမ္ဘာ့ဘဏ်လုပ်ငန်းနဲ့ အားကစားကဏ္ဍတို့အကြား ပေါင်းကူးတံတားဖြစ်လာစေဖို့ရည်ရွယ်ပြီး ဘောလုံးပွဲစဉ်တွေကို အာဂျင်တီးနားလက်ရွေးစင်အသင်းနဲ့အတူ စင်္ကာပူနဲ့ အိန္ဒိယနိုင်ငံတို့မှာ ကျင်းပသွားမှာဖြစ်ပါတယ်။ သဘောတူညီချက်တွေအရ အဆိုပွဲစဉ်တွေကို HSBC ကနိုင်ငံနှစ်နိုင်ငံစလုံးမှာ တာဝန်ယူကျင်းပသွားမှာဖြစ်ပါတယ်"

"HSBC ရဲ့ကာစတန်မာတွေ၊ ပါတနာတွေအနေနဲ့ အဆိုပါပွဲစဉ်တွေမှာ လာရောက်ဆင်နွှဲနိုင်ပြီး ကမ္ဘာ့ချန်ပီယံ ဘောလုံးသမားတွေနဲ့ တွေ့ဆုံနှုတ်ဆက်ခွင့်ရဖို့ အခွင့်အရေးရသွားမှာလည်းဖြစ်ပါတယ်" လို့ထုတ်ပြန်ကြေညာထားပါတယ်။ အာဂျင်တီးနားဘောလုံးအဖွဲ့ချုပ်ဥက္ကဌ ဖာဘီယန်တာပီယာက "ကျွန်တော်တို့အနေနဲ့ အာရှဘဏ်လုပ်ငန်းအဖွဲ့အစည်းတွေကို ဦးဆောင်ထားနိုင်တဲ့ HSBC နဲ့ လက်တွဲရတဲ့အတွက် အတော်လေးကျေနပ်မိပါတယ်။ အိန္ဒိယနဲ့ စင်္ကာပူတို့မှာကျင်းပသွားမယ့် ပွဲစဉ်တွေအတွက် HSBC ကစပွန်ဆာအဖြစ် တာဝန်ယူဆောင်ရွက်သွားမှာဖြစ်ပါတယ်" လို့ပြောပါတယ်။ 

မက်ဆီဟာ ယခင်ကလည်း အာဂျင်တီးနားလက်ရွေးစင်အသင်းနဲ့အတူ စင်္ကာပူသို့ သွားရောက်ခဲ့ဖူးပါတယ်။ ၂၀၁၇ ခုနှစ်မှာ မက်ဆီဟာ ချစ်ကြည်ရေးခြေစမ်းပွဲအတွက် စင်္ကာပူသို့သွားရောက်ခဲ့ပြီး နာရီအနည်းငယ်သာနေထိုင်ခဲ့ကာ မင်္ဂလာပွဲအတွက်ပြင်ဆင်မှုတွေပြုလုပ်ဖို့ အာဂျင်တီးနားနိုင်ငံသို့ပြန်လာခဲ့ပါတယ်။ 

ပြီးခဲ့တဲ့နှစ်မှာလည်း မက်ဆီဟာ အင်တာမီယာမီနဲ့အတူ ဟောင်ကောင်သို့သွားရောက်လည်ပတ်ခဲ့ဖူးပြီး ထိုစဉ်ကတော့ ချစ်ကြည်ရေးခြေစမ်းပွဲမှာပါဝင်နိုင်ခဲ့ခြင်းမရှိပါဘူး။ ထိုစဉ်က ပွဲလက်မှတ်ခဟာ ဒေါ်လာ ၆၄၀ အထိမြင့်တက်ခဲ့ပေမယ့် မက်ဆီပါဝင်မကစားတာတာကြောင့် ပရိသတ်အချို့က ပြန်အမ်းငွေပေးဖို့ ပြန်လည်တောင်းဆိုခဲ့ကြပါတယ်။ ဘောလွန်းဒီအော် ၈ ဆုရှင်ဟာ ထိုစဉ်ကကြွက်သားဒဏ်ရာပြဿနာ ကြုံတွေ့နေရတယ်လို့ အကြောင်းပြခဲ့ပြီး အရန်ခုံမှာပဲ ထိုင်နေခဲ့တာဖြစ်ပါတယ်။