ပြင်သစ်လက်ရွေးစင်အသင်းခေါင်းဆောင် ခီလီယန်အမ်ဘာပေက ယခု ၂၀၂၅ ခုနှစ်အတွင်း ပီအက်စ်ဂျီအတွက်ထူးရှယ်ခြေစွမ်းကောင်းတွေကို ပြသထားနိုင်တဲ့ အသင်းဖော် အူစမန်ဒမ်ဘီလီကို ခရိုအေးရှားနဲ့ပွဲစဉ်မတိုင်မီမှာ ချီးကျူးပြောဆိုမှုတွေပြုလုပ်လာခဲ့ပါတယ်။ 

ရီးရဲလ်မက်ဒရစ်ကြယ်ပွင့်က "သူဘယ်လောက်အထိ ဝေဖန်ခံခဲ့၊ လှောင်ပြောင်ခံခဲ့ရသလဲဆိုတာ ကျွန်တော်အသိဆုံးမို့လို့ အခုလိုပုံစံမျိုးနဲ့ သူ့ကိုမြင်တွေ့ရတာ အရမ်းကျေနပ်စရာကောင်းပါတယ်။ ကျွန်တော်တို့ အသက်-၁၄ နှစ်ကတည်းက သူ့ကို ကျွန်တော်အားပေးလာခဲ့တာပါ။ ကျွန်တော်အမြဲတမ်းပြောတာရှိပါတယ်။အဲဒါကတော့ သူကဂိုးမသွင်းနိုင်ရင်တောင် ကမ္ဘာ့အကောင်းဆုံးဘောလုံးသမားဖြစ်နေဆဲဆိုတာပါပဲ။ ကျွန်တော်အခုလိုပြောတာ သူနဲ့သူငယ်ချင်းဖြစ်နေလို့ပြောတာလို့ ထင်ကြပါလိမ့်မယ်။ ဒါပေမယ့် သူငယ်ချင်းဆက်ဆံရေးနဲ့ အမှန်တရားကြားက ကွာခြားမှုကို ကျွန်တော်ကောင်းကောင်းသိပါတယ်" လို့ပြောကြားခဲ့ပါတယ်။ 

အသက်-၂၇ နှစ်အရွယ်ဒမ်ဘီလီဟာ သူ့ရဲ့ကစားသမားဘဝတစ်လျှောက်လုံးမှာ ဒဏ်ရာပြဿနာတွေနဲ့ ရုန်းကန်နေခဲ့ရပြီး ယခုအခါမှပဲ ပီအက်စ်ဂျီအတွက် အသင့်တော်ဆုံးကစားသမားအဖြစ် ရပ်တည်ထားနိုင်တာဖြစ်ပါတယ်။ဆက်လက်ပြီး အမ်ဘာပေက "ဒမ်ဘီလီက အသက်-၂၇ ရောက်မှပဲ တည်ငြိမ်ရင့်ကျက်တဲ့ပုံစံကို စတင်ရရှိပါတယ်။ ဒါက ဘောလုံးလောကမှာတော့ ပုံမှန်ပါပဲ။ ပုံစံအမှန်ကို နောက်ကျမှရတဲ့ ကစားသမားတွေလည်း ရှိပါတယ်။ ဒါပေမယ့် ဒမ်ဘီလီက နောက်မကျပါဘူး။ ဒါက ဘောလုံးသမားတစ်ယောက်ရဲ့ ပုံမှန်ပြောင်းလဲတိုးတက်မှုပါ။ အသက်-၂၇ မတိုင်ခင် သူ့မှာ အရမ်းကောင်းတဲ့ ခြေစွမ်းတွေရှိခဲ့ပါတယ်။ ကျွန်တော်သူ့အတွက်အရမ်းပျော်ပြီး အခုလိုပဲရှေ့ဆက်နိုင်ဖို့ မျှော်လင့်ပါတယ်။ လက်ရှိသူရထားတဲ့အရာတွေက သူနဲ့ထိုက်တန်လို့ပါ။ သူက အလုပ်အရမ်းကြိုးစားတဲ့ကစားသမားပါ" လို့ပြောကြားခဲ့ပါတယ်။ 

ဒမ်ဘီလီဟာ ဒီရာသီမှာ ပီအက်စ်ဂျီအတွက် ပြိုင်ပွဲစုံ ၃၇ ပွဲကစားပြီး ဂိုး ၃၀ အထိသွင်းယူထားနိုင်ခဲ့ပါတယ်။သို့သော်လည်း တောင်ပံကစားသမားဟာ အဆိုပါသွင်းဂိုး ၃၀ ထဲမှ ၂၂ ဂိုးကိုတော့ ယခု ၂၀၂၅ ခုနှစ်အတွင်းမှာ သွင်းယူထားတာဖြစ်ပါတယ်။