သောမတ်စ်တူချယ်က လက်ရွေးစင်အသင်းလူစာရင်းမှာ သွေးသစ်ကစားသမားအချို့ကို နေရာပေးဖို့ အချိန်ရောက်ပြီလို့ ပြောဆိုရင်း အတွေ့အကြုံရင့်အင်္ဂလန်ကြယ်ပွင့်တွေဆီ သတိပေးစကားတစ်ခု ပေးပို့လိုက်ပါတယ်။ အန်ဒိုရာ၊ ဆာဘီးယားတို့နဲ့ရင်ဆိုင်ရမယ့်ပွဲစဉ်အတွက် အသင်းလူစာရင်းမှာ အန်ဒါဆန်၊ ဝါတန်တို့ ပါဝင်လာခြင်းအပေါ်မေးမြန်းလာမှုကို တုံ့ပြန်ချိန်မှာ တူချယ်က အခုလိုပဲပြောဆိုခဲ့တာပါ။ ဝါတန်က ဆောက်ဂိတ်ရဲ့ယူရို-၂၀၂၄ ပြိုင်ပွဲဝင်အသင်းလူစာရင်းမှာ ပါဝင်ခဲ့ပေမယ့် ပွဲကစားချိန်တော့ မရရှိခဲ့ပါဘူး။ 

အန်ဒါဆန်ကလည်း ပရီးမီးယားလိဂ်ပြိုင်ပွဲမှာ ပြသနေတဲ့ သူ့ရဲ့စွမ်းဆောင်ရည်နဲ့ ဥရောပယူ-၂၁ ပြိုင်ပွဲမှာ သရဖူဆောင်းနိုင်ခဲ့ခြင်းတို့ကြောင့် စီနီယာလက်ရွေးစင်အသင်းအတွက် ခေါ်ယူခံခဲ့ရပါတယ်။ ဒါ့အပြင် တော့တင်ဟမ်ရဲ့စပန့်ခ်လည်း လက်ရွေးစင်အဆင့်မှာ ပထမဆုံးအကြိမ် ပါဝင်လာခဲ့ပါတယ်။ အခုတစ်ကြိမ်၊ လက်ရွေးစင်အသင်းအတွက် ချန်လှပ်ခံရသူတွေအနက် အထင်ရှားဆုံးသူကတော့ အာနိုးလ်ပဲ ဖြစ်ပါတယ်။ လတ်တလော အိုဗီဒိုကို ရီးရဲလ်မက်ဒရစ်က သုံးဂိုးပြတ်အနိုင်ယူခဲ့တဲ့ပွဲစဉ်မှာ လီဗာပူးကစားသမားဟောင်းကို အရန်ခုံတန်းဆီမှာပဲ မြင်တွေ့ခဲ့ရပါတယ်။ အလားတူ ဘယ်လင်ဟမ်၊ ဆာကာ၊ ကိုးလ်ပယ်လ်မာတို့လည်း ဒဏ်ရာကြောင့် မပါဝင်နိုင်လို့ လူငယ်ကြယ်ပွင့်တွေအတွက် တံခါးပွင့်လာသလို မားကပ်စ်ရက်ရှ်ဖို့ဒ်လည်း ပြန်လာနိုင်ခဲ့ပါတယ်။

တူချယ်က “ ပထမဆုံးအနေနဲ့ သူတို့နှစ်ဦးလုံးကို လက်ရွေးစင်အသင်းမှာပါဝင်ဖို့ ထိုက်တန်တယ်လို့ ယူဆတာကြောင့် ကျွန်တော်တို့က သူတို့နှစ်ဦးလုံးကို ခေါ်ယူခဲ့တာပါ။ ပြီးခဲ့တဲ့ဘောလုံးရာသီမှာ သူတို့နှစ်ဦးလုံးက သက်ဆိုင်ရာကလပ်အသင်းတွေအတွက် အလွန်ကြီးမားတဲ့ အစိတ်အပိုင်းအဖြစ် ပါဝင်ခဲ့ပါတယ်။ ဝါတန်ဆိုရင်လည်း ခရစ္စတယ်ပဲလေ့စ်ရဲ့ကွင်းလယ်မှာ အဓိကကစားသမား ဖြစ်လာခဲ့ပြီး ဆုဖလားအောင်မြင်မှုအတွက် ပါဝင်ပတ်သက်ခဲ့ပါတယ်။ အန်ဒါဆန်ကလည်း နော်တင်ဟမ်ဖောရက်စ်ရဲ့ဥရောပအဆင့်ပြိုင်ပွဲဝင်ရောက်ခွင့်ရရှိရေးလှုပ်ရှားမှုမှာ အဓိကအစိတ်အပိုင်းတစ်ရပ် ဖြစ်ခဲ့ပါတယ်။

သူတို့နှစ်ဦးလုံးက လက်ရွေးစင်အဆင့်မှာပါဝင်ဖို့ ထိုက်တန်သလို အခုဘောလုံးရာသီကိုလည်း အကောင်းမွန်ဆုံး စတင်ထားပြီးပါပြီ။ သူတို့တွေ ပုံစံကောင်းရနေပါတယ်။ အခုတော့ ပိုမိုပြင်းထန်တဲ့ ပြိုင်ဆိုင်မှုမှာ ပါဝင်ဖို့ အချိန်ရောက်ပါပြီ။ ဒါက သွေးသစ်ကစားသမားအချို့ကို နေရာပေးရမယ့် အချိန်ပါ။ ဒါကြောင့်ပဲ သူတို့တွေ ကျွန်တော်တို့နဲ့အတူရှိနေဖို့ ထိုက်တန်ရခြင်း ဖြစ်ပါတယ်”လို့ ပြောပါတယ်။

အင်္ဂလန်လက်ရွေးစင်အသင်းက ၂၀၂၆ ကမ္ဘာ့ဖလားခြေစစ်ပွဲအဖြစ် လာမယ့်စက်တင်ဘာ ၆ ရက်၊ ဝင်ဘာလေကွင်းမှာ အန်ဒိုရာနဲ့ ရင်ဆိုင်ပြီးနောက် စက်တင်ဘာ ၉ ရက်၊ ဘဲလ်ဂရိတ်မှာ ဆာဘီးယားနဲ့ ထပ်မံကစားပါလိမ့်မယ်။