နယူးကာဆယ်တိုက်စစ်မှူး အီဆက်က အသင်းနဲ့စာချုပ်သစ်ဆွေးနွေးမှုမရှိကြောင်း ပြောကြားလိုက်ပေမယ့် အသင်းကနေထွက်ခွာဖို့ ဆွေးနွေးမှုတော့ မရှိဘူးလို့ အခိုင်အမာပြောကြားလိုက်ပါတယ်။ ဆွီဒင်သားဟာ ဒီရာသီနယူးကာဆယ်အသင်းအတွက် စွမ်းဆောင်ရည်ကောင်းတွေပြသနေပြီး ၂၃ ဂိုးအထိသွင်းယူနိုင်ခဲ့သလို ဝင်ဘာလေမှာ နယူးကာဆယ်ကိုအနိုင်ရခဲ့တဲ့ကာရာဘောင်ဖိုင်နယ်ပွဲမှာလည်း တစ်ဂိုးသွင်းယူပေးနိုင်ခဲ့ပါတယ်။

အီဆက်ကို အာဆင်နယ်က ကာလရှည်ပစ်မှတ်အဖြစ် သတ်မှတ်ထားကာ အာတီတာက လာမယ့်နွေမှာခေါ်ယူဖို့ ပစ်မှတ်ထားနေပါတယ်။ လီဗာပူးအသင်းကလည်း နွေရာသီမှာ ခေါ်ယူဖို့ ချိတ်ဆက်နေပြီး ၂၀၂၂ ဆိုစီဒက်ကနေပြောင်းလာပြီးကတည်းက အီဆက်ဟာ နယူးကာဆယ်အတွက် ၁၀၀ ပွဲမှာ ၅၈ ဂိုးအထိသွင်းယူပေးထားနိုင်ပါတယ်။

နယူးကာဆယ်ဟာ အီဆက်ကို ပေါင်သန်း ၁၂၀ တန်ကြေးသတ်မှတ်ထားတာကြောင့် ပရီးမီးယားလိဂ်ပြိုင်ဘက်တွေအနေနဲ့ ခေါ်ယူနိုင်ဖို့ ခက်ခဲဖွယ်ရှိနေပါတယ်။ နယူးကာဆယ် နဲ့ အီဆက်တို့ကြား စာချုပ်သက်တမ်းက ၃ နှစ်ကျန်နေသေးတာဖြစ်ပြီး  စာချုပ်သစ်အတွက် မကြာခင်မှာ ဆွေးနွေးဖွယ်ရှိနေပါတယ်။

“အပြင်မှာ အများကြီးရေးနေကြတာရှိပါတယ်။ ဒါပေမယ့် အတွင်းပိုင်းမှာတော့ ကျွန်တော်တို့ ဘာမှမပြောပါဘူး။ကျွန်တော် အရိုးသားဆုံးပြောရရင် အများကြီးမသိပါဘူး။ ကျွန်တော်တို့ အသင်းကြားမှာ ဘာဆွေးနွေးမှုမှမရှိပါဘူး။

ကျွန်တော် ဘောလုံးကစားဖို့ပဲ အပြည့်အဝအာရုံစိုက်ထားပါတယ်။ အများကြီးလည်း မပြောဖြစ်ပါဘူး။ ကျွန်တော့်အခြေအနေကို မှတ်ချက်ပြုရတာ အကြိမ်ရေများနေပါပြီ။ ဒီအသင်း နဲ့ ဒီမြို့ကို ကျွန်တော် ဘယ်လောက်ချစ်လဲဆိုတာ ရေးနေကြတာများပါတယ်။

အနာဂတ်အကြောင်း ကျွန်တော် မတွေးဖြစ်ပါဘူး။ ကျွန်တော် နယူးကာဆယ်အတွက်စွမ်းဆောင်ဖို့ပဲ အာရုံစိုက်ထားပါတယ်။ အခုတော့ ကျွန်တော်တို့ အောင်မြင်မှုရထားပါပြီ။ ဒါပေမယ့် ကျွန်တော်တို့ နိုင်ပွဲတွေလိုချင်သလို ချန်ပီယံလိဂ်လည်းကန်ချင်ပါတယ်။

အဲ့တာက ကျွန်တော်အာရုံစိုက်ထားတာပါ။ အခြားတွေးထားတာတွေမရှိပါဘူး။ ကျွန်တော် နယူးကာဆယ်မှာ အဆင်ပြေနေပါတယ်”လို့ အီဆက်က ပြောကြားခဲ့ပါတယ်။ အီဆက်ဟာ လန်ဒန်မှာ အောင်ပွဲခံခဲ့တာဖြစ်ပြီး အဲ့နောက် နိုင်ငံအသင်းနဲ့ပူးပေါင်းခဲ့ပါတယ်။ နယူးကာဆယ်ဟာ နိုင်ငံတကာရက်သတ္တပတ်အပြီးမှာ ဘရန့်ဖို့ဒ်နဲ့ရင်ဆိုင်ရမှာဖြစ်ပါတယ်။