အင်္ဂလန်လက်ရွေးစင်အသင်းနည်းပြဘဝကနဦးကာလမှာပဲ ဝင်ဘာလေကွင်းအတွင်း နှစ်ပွဲဆက်အနိုင်ရရှိအောင် စွမ်းဆောင်နိုင်ခဲ့တဲ့ သောမတ်စ်တူချယ်လက်အောက်မှာ အသင်းအနေဖြင့် အခုထက်ပိုပြီးတိုးတက်လာပါဦးမယ်လို့ ဟယ်ရီကိန်းက ကတိပြုပြောကြားခဲ့ပါတယ်။

အင်္ဂလန်အသင်းက ပြီးခဲ့တဲ့သောကြာနေ့မှာ အယ်လ်ဘေးနီးယားကို ၂-၀ ဂိုးဖြင့် အနိုင်ယူပြီးနောက် တနင်္လာနေ့မှာလည်း လတ်ဗီးယားကို ၃-၀ ဂိုးဖြင့် အနိုင်ယူခဲ့ပြန်ပါတယ်။ အခုပွဲစဉ်ရလဒ်ပိုင်းတွေကြောင့် တူချယ်ရဲ့အင်္ဂလန်နည်းပြဘဝကမ္ဘာ့ဖလားခြေစစ်ပွဲခရီးစဉ်က ရာနှုန်းပြည့်နိုင်ပွဲတွေနဲ့အတူ စတင်နိုင်ခဲ့ပါတယ်။

အထက်ပါပွဲစဉ်တွေအတွင်း အင်္ဂလန်လက်ရွေးစင်အသင်းအတွက် တစ်ဂိုးစီသွင်းယူပေးနိုင်ခဲ့တဲ့ ဟယ်ရီကိန်းက လက်ရွေးစင်ကစားသမားဘဝသွင်းဂိုး ၇၁ ဂိုးအထိ ရှိလာခဲ့ပါပြီ။ဒါပေမယ့် ဒီပွဲစဉ်နှစ်ခုလုံးမှာ အားနည်းတဲ့ပြိုင်ဘက်တွေနဲ့ရင်ဆိုင်ရချိန် ထိုးဖောက်တိုက်စစ်ဆင်ကစားဖို့ ရုန်းကန်ခဲ့ရတဲ့ အင်္ဂလန်အသင်းအတွက် ဝေဖန်သံတွေလည်း ထွက်ပေါ်လာခဲ့ပါတယ်။

ဟယ်ရီကိန်းကတော့ အင်္ဂလန်အသင်းအနေဖြင့် အယ်လ်ဘေးနီးယားကို အနိုင်ရရှိပြီးနောက် ခြေတစ်လှမ်းရှေ့တိုးလာနိုင်တယ်လို့ အခိုင်အမာပြောကြားခဲ့ပြီး နည်းပြသစ်သောမတ်စ်တူချယ်လက်အောက် တိုးတက်လာနေပြီလို့ ယုံကြည်နေပါတယ်။ ဒါ့အပြင် လတ်ဗီးယားနဲ့ပွဲစဉ်မှာ သူ့အတွက် ဂိုးဖန်တီးပေးခဲ့တဲ့ အသင်းဖော်ဒီကလန်ရိုက်စ်ကိုလည်း ချီးကျူးဂုဏ်ပြုခဲ့ပါတယ်။

ITV သတင်းဌာနနဲ့တွေ့ဆုံချိန် ဟယ်ရီကိန်းက “သောကြာနေ့ပွဲစဉ်ထက် ကျွန်တော်တို့တွေ ပိုကောင်းလာခဲ့ပါတယ်။ ဘောလုံးကစားနိုင်မယ့်နည်းလမ်းတွေနဲ့ အခွင့်အလမ်းတွေလည်း ပိုရရှိခဲ့ပါတယ်။ ဒါပေမယ့် တစ်သင်းလုံးခံစစ်ကိုပိတ်ဆို့ကာကွယ်နေတဲ့ပြိုင်ဘက်နဲ့ ရင်ဆိုင်ကစားရတာ ခက်ခဲသလို သူတို့တွေကလည်း ကျွန်တော်တို့အခက်တွေ့အောင် ကြိုးစားကစားသွားပါတယ်။ ဒါကြောင့် ကျွန်တော်တို့က တောင်ပံကစားသမားတွေကို အားပြုကစားဖို့ လိုအပ်လာပါတယ်။

အရန်ခုံတန်းမှတဆင့် ဝင်ရောက်ကစားတဲ့ ကောင်လေးတွေကလည်း အသင်းအတွက် ကောင်းမွန်တဲ့ အကျိုးသက်ရောက်မှုတစ်ခုရှိအောင် လုပ်ဆောင်နိုင်ခဲ့တယ်လို့ ထင်ပါတယ်။ကျွန်တော်တို့အတွက် နှစ်ပွဲနိုင်၊ Clean Sheet နှစ်ကြိမ်ရရှိခဲ့လို့ ကျေနပ်အားရမိပါတယ်။ ဒီကလန်ရိုက်စ်ကလည်း အခုလိုပြေးလွှားလှုပ်ရှားမှုနဲ့အတူ ခြားနားချက်တစ်ခုကို လုပ်ဆောင်နိုင်လိမ့်မယ်လို့ တွေးနေခဲ့ပါတယ်။ ဒါကိုပဲ သူလုပ်ဆောင်ခဲ့ပြီး ဂိုးဧရိယာဆီ အရမ်းကောင်းတဲ့ဘောလုံးပေးပို့မှုတစ်ခု ဖန်တီးပေးခဲ့ပါတယ်”လို့ ပြောပါတယ်။

အင်္ဂလန်အတွက်ကစားပေးခဲ့ရတဲ့ ဝင်ဘာလေကွင်းနောက်ဆုံးပွဲစဉ် ၁၇ ခုမှာ ၁၇ ဂိုးအထိ သွင်းထားနိုင်တဲ့ တိုက်စစ်မှူးက ဘိုင်ယန်မြူးနစ်မှာလည်းလက်တွဲခဲ့ဖူးတဲ့ တူချယ်ကို လှိုက်လှိုက်လှဲလှဲချီးကျူးဂုဏ်ပြုပြီး နောက်ထပ်တိုးတက်မှုတွေ မြင်တွေ့ရဦးမယ်လို့ ကတိပြုခဲ့ပါတယ်။

ဟယ်ရီကိန်းက “ တူချယ်က တကယ့်အံ့မခန်းပါပဲ။ သူက ချက်ချင်းဆိုသလို အထိုင်ကျပြီး နည်းပြအဖြစ် သူ့ကို ရရှိတာ တကယ်ကိုဝမ်းသာမိပါတယ်။ သူယူဆောင်လာပေးတဲ့ ခွန်အားတွေ၊ စိတ်အားထက်သန်မှုတွေနဲ့ နည်းဗျူဟာပိုင်းတွေက အသင်းနဲ့ အံဝင်ခွင်ကျဖြစ်နေခဲ့ပါတယ်။ ဒါက ပထမဆုံးစခန်းသွင်းလေ့ကျင့်မှုဖြစ်ပြီး ဒီအချိန်မှာပဲ ရှေ့ဆက် ပိုပြီးကောင်းမွန်လာဦးမယ်ဆိုတာ ကျွန်တော်တို့ သိလာပါတယ်။ သူလည်း ကျေနပ်နေမယ်လို့ ထင်ပါတယ်။ ကျွန်တော်တို့လည်း သူနဲ့အတူ ရှိနေရတာကို ကျေနပ်မိပါတယ်”လို့ ပြောပါတယ်။