ယမန်နေ့ညပိုင်း၊ ဘရိုက်တန်နဲ့ပွဲစဉ်အတွင်း ပြိုင်ဘက်အတွက် နောက်ခံလူခူတာနော့ဗ်ရဲ့ Own Goal ခွင့်ပြုပေးခဲ့ရပြီးနောက် မန်စီးတီးအသင်းရဲ့ မိမိကိုယ်ကိုယုံကြည်မှုနဲ့ ယုံကြည်ချက်တွေ ပျောက်ဆုံးသွားတယ်လို့ ဂမ်ဒိုဂန်က ဝန်ခံပြောဆိုခဲ့ပါတယ်။

အခုပွဲစဉ်ရဲ့ပထမပိုင်းပွဲချိန်အပြီး ဟာလန်း(ပင်နယ်တီ)၊ အိုမာမာမွတ်ရှ်တို့ရဲ့သွင်းဂိုးတွေနဲ့ ပြိုင်ဘက်ကို ၂-၁ ဂိုးဖြင့် ဦးဆောင်နိုင်ခဲ့ပြီးနောက် မန်စီးတီးအသင်းမှာ ယုံကြည်မှုတွေပြည့်ဝေနေခဲ့ပုံ ရပါတယ်။ ဘရိုက်တန်အတွက် ဗွေဆော်ဦးချေပဂိုးကိုတော့ အက်စ်တူပီနန်က ပြစ်ဒဏ်ဘောမှတဆင့် တိုက်ရိုက်ကန်သွင်းရယူခဲ့ပါတယ်။ ဒါပေမယ့် ဒုတိယပိုင်းပွဲချိန်စတင်လာပြီး မကြာခင်မှာပဲ ဟင်ရှဲလ်ဝုဒ်ရဲ့ကန်ချက် ခူဆာနော့ဗ်နဲ့ထိပြီး ဂိုးဝင်သွားလို့ ဘရိုက်တန်တို့ ဒုတိယမြောက်ချေပဂိုးရရှိခဲ့ပြီးနောက် အနိုင်ရလဒ်ရရှိရေးအတွက်ပါ  အရှိန်အဟုန်မြှင့်တင်လာခဲ့ပါတယ်။ ဂမ်ဒိုဂန်ကိုယ်တိုင်လည်း ပြိုင်ဘက်ရဲ့ဒုတိယမြောက်ချေပဂိုးကြောင့် သူတို့အသင်းပြန်လာနိုင်ဖို့ ခက်ခဲသွားတယ်လို့ အတိအလင်းဝန်ခံပြောဆိုခဲ့ပါတယ်။

အခုပွဲစဉ်ရလဒ်ပိုင်းနဲ့အတူ ပရီးမီးယားလိဂ်နောက်ဆုံးခြောက်ပွဲမှာ နှစ်ပွဲသာ အနိုင်ရရှိတဲ့ မန်စီးတီးအသင်းမှာ လတ်တလောကာလတလျှောက်လုံး မြင်တွေ့ခဲ့ရတဲ့ စိတ်ပျက်စရာကောင်းပြီး တည်ငြိမ်မှုကင်းမဲ့တဲ့ စွမ်းဆောင်ရည်မျိုး ထပ်မံမြင်တွေ့ခဲ့ရပါတယ်။ သူတို့တွေက အနီးဆုံးပြိုင်ဘက်တွေထက် တစ်ပွဲပိုကစားပြီး ထိပ်ဆုံးလေးသင်းစာရင်းနဲ့ တစ်မှတ်အကွာမှာ ဆက်ရှိနေခဲ့ပါတယ်။

ပွဲစဉ်အပြီး ဂမ်ဒိုဂန်က “ ပုဂ္ဂိုလ်ရေးအရပြောရရင် ကျွန်တော် အရမ်းစိတ်ပျက်မိပါတယ်။ ကျွန်တော်တို့တွေ ဦးဆောင်ဂိုးနှစ်ကြိမ်တိုင် ရရှိခဲ့ပြီး ကစားပုံလည်း အမှန်တကယ်ကောင်းမွန်ခဲ့ပါတယ်။ သုံးမှတ်အပြည့်မရရှိခဲ့တာ တကယ်ကိုစိတ်ပျက်ဖို့ကောင်းပါတယ်။ ပြိုင်ဘက်ရဲ့ဘောလုံးပိုင်ဆိုင်မှုကို ကျွန်တော်တို့ ထိန်းချုပ်နိုင်ခဲ့တယ်လို့ ထင်ပါတယ်။ ဒုတိယပိုင်းအစ၊ဒုတိယမြောက်ဂိုးပေးလိုက်ရချိန်မှာတော့ မိမိကိုယ်ကိုယုံကြည်မှု၊ ယုံကြည်ချက်တွေ ပျောက်ဆုံးသွားတယ်လို့ ခံစားမိပါတယ်။ ကစားပုံ အနည်းငယ်အားလျော့သွားပြီး အခွင့်အရေးတွေလည်း လွယ်လွယ်ကူကူခွင့်ပြုပေးခဲ့ပါတယ်။

တည်တည်ငြိမ်ငြိမ်ရှိနေဖို့သာ အရေးအကြီးဆုံးပါ။ ဟုတ်ပါတယ်၊ အခုလိုအဆင့်မျိုးမှာတောင် အမှားအယွင်းတွေ ရှိလာတက်ပါတယ်။ ပြိုင်ဘက်ကလည်း အရမ်းကောင်းခဲ့ပါတယ်။ ပွဲတိုင်းက ခက်ခဲပါတယ်။ နေ့စဉ်နေ့တိုင်း အားလုံးရဲ့အကောင်းဆုံးပုံစံကို မျှော်လင့်နေဖို့ လိုအပ်ပါတယ်။ ကောင်းမွန်တဲ့လေ့ကျင့်ရေးသီတင်းပတ်တစ်ခု ရှိခဲ့တယ်လို့ ထင်ပါတယ်။ ကျွန်တော်တို့က လေ့ကျင့်ရေးမှာ ရရှိခဲ့တဲ့ စွမ်းအားတွေကို ပွဲစဉ်တွေဆီ ပို့လွှတ်ချင်ပါတယ်။ တခါတရံတော့ အဲ့ဒီလိုမျိုး လုံလုံလောက်လောက် မလုပ်နိုင်ခဲ့ပါဘူး”လို့ ပြောပါတယ်။

လာမယ့်မတ်လနိုင်ငံတကာသီတင်းပတ်အပြီး မန်စီးတီးက မတ် ၃၀ ရက်မှာ ဘုန်းမောက်နဲ့ အက်ဖ်အေဖလားကွာတားဖိုင်နယ်အဝေးကွင်းပွဲစဉ် ယှဉ်ပြိုင်ကစားရပါမယ်။ ဒီပြိုင်ပွဲကသာ ပရီးမီးယားလိဂ်အမှတ်ပေးဇယားအဆင့်-၅နေရာမှာ ရှိနေတဲ့ ပက်ဂွါဒီယိုလာရဲ့အသင်းအတွက် အခုဘောလုံးရာသီ၊ နောက်ဆုံးဆုဖလားမျှော်လင့်ချက် ဖြစ်လာပါတယ်။