မန်ချက်စတာစီးတီးနည်းပြ ပက်ဂွါဒီယိုလာက တိုက်စစ်မှူး အာလင်းဟာလန်းတစ်ယောက် အသင်းနဲ့ ၁၀ နှစ်သက်တမ်းရှိ ကာလရှည်စာချုပ်ကို ဘာကြောင့်ချုပ်ဆိုခဲ့သလဲဆိုတာ ထုတ်ဖော်ပြောကြားလာခဲ့ပါတယ်။ 

အပြောင်းအရွှေ့နဲ့ပတ်သက်ပြီး ကောလာဟလတွေထွက်ပေါ်နေတဲ့အကြားမှာပဲ ဟာလန်းဟာ မန်စီးတီးနဲ့ ၁၀ နှစ်သက်တမ်းရှိ ကာလရှည်စာချုပ်ကိုချုပ်ဆိုပြီး အီတီဟတ်မှာ ၂၀၃၄ ခုနှစ်အထိနေထိုင်ဖို့ သေချာစေခဲ့ပြီဖြစ်ပါတယ်။

အစ်ဆွစ်ခ်ျနဲ့ယှဉ်ပြိုင်သွားရမယ့် ပရီးမီးယားလိဂ်ပွဲစဉ်မတိုင်မီ ပွဲကြိုသတင်းစာရှင်းလင်းပွဲမှာ ဟာလန်းရဲ့ စာချုပ်သစ်နဲ့ပတ်သက်ပြီး မေးမြန်းမှုပြုလုပ်ခဲ့ရာ ဂွါဒီယိုလာက "လာမယ့်ရာသီ ကျွန်တော့်အနေနဲ့ မန်စီးတီးမှာဆက်ရှိနေမယ်ဆို ကျွန်တော်လည်း ၁၀ နှစ်စာချုပ်ချုပ်ဆိုသွားပါမယ်။ ဟာလန်းက နော်ဝေးကလာတာပါ။ မန်ချက်စတာရာသီဥတုက နော်ဝေးထက်ပိုကောင်းလို့ အခုလို ကာလရှည်စာချုပ်ချုပ်တာဖြစ်ပါလိမ့်မယ်"

"သူဒီအသင်းအတွက် ပေးဆပ်ထားပါတယ်။ ဒီမှာသူ့ရဲ့ ဇနီး၊ အဖေဖြစ်သူတို့နဲ့ အတူတူနေရတာ ပျော်နေပုံရပါတယ်။ ပြီးတော့ ဒီမှာရှိနေတဲ့ပတ်ဝန်းကျင်ကလည်း သူ့ကိုချစ်ကြပါတယ်။ သူကလည်း အသင်းကိုအရမ်းချစ်တဲ့ကစားသမားတစ်ယောက်ပါ။ ပရီးမီးယားလိဂ်ကိုလည်း ချစ်ပါတယ်။ ဒါကြောင့် ဒီနေရာထက်ပိုကောင်းတဲ့နေရာမရှိနိုင်တော့လို့ ၁၀ နှစ်သက်တမ်းရှိတဲ့စာချုပ်ကို လက်မှတ်ထိုးခဲ့တာဖြစ်ပါလိမ့်မယ်။ ၁၀ နှစ်အတွင်း ဒီအသင်းနဲ့အတူ ဘယ်လောက်အထိအောင်မြင်မှုတွေရနိုင်ဦးမလဲ မသိနိုင်ဘူးလေ။ သူနဲ့ သူ့မိသားစုက မှန်ကန်တဲ့ဆုံးဖြတ်ချက်ကို ချခဲ့တယ်လို့ထင်ပါတယ်" လို့ပြောကြားခဲ့ပါတယ်။ 

မန်စီးအတွက်ပြိုင်ပွဲစုံ ၁၂၆ ပွဲကစားထားတဲ့ ဟာလန်းဟာ ၁၁၁ ဂိုးအထိသွင်းယူပြီး ဂိုးဖန်တီးမှု ၁၅ ကြိမ်ပြုလုပ်ထားနိုင်ပါတယ်။ ပရီးမီးယားလိဂ်သွင်းဂိုး ၇၉ ဂိုးအထိသွင်းယူထားတဲ့ နော်ဝေးလက်ရွေးစင်ဟာ လိဂ်သမိုင်းတစ်လျှောက် ဂိုးအများဆုံးသွင်းယူထားတဲ့ အလန်ရှီးယားကိုလိုက်မီဖို့ ဂိုး ၂၀၀ ခန့်သာလိုအပ်နေပါတယ်။ သို့သော်လည်း ဟာလန်းအနေနဲ့ မန်စီးတီးမှာ နောက်ထပ် ၁၀ နှစ်အထိဆက်လက်နေထိုင်သွားမှာဖြစ်လို့ နယူးကာဆယ်ဂန္ထဝင်ရဲ့သွင်းဂိုးအရေအတွက်ကို လိုက်မီဖို့ ဖြစ်နိုင်တဲ့အခွင့်အရေးကိုပိုင်ဆိုင်ထားပါတယ်။