ပက်ဂွါဒီယိုလာက မန်စီးတီးကစားပုံကို ကြည့်ရတာ ပျင်းစရာကြီးဆိုတဲ့ ဂယ်ရီနဗီးလ်ရဲ့ ဝေဖန်မှုအပေါ် လျစ်လျူရှုသွားခဲ့ပါတယ်။

မန်စီးတီးအသင်းဟာ ချန်ပီယံလိဂ်၁၆သင်းအဆင့် ပထမအကျော့ပွဲစဉ်မှာ ကိုပင်ဟေဂင်ကို ဂိုးပြတ် အနိုင်ယူခဲ့ပေမယ့် နဗီးလ်ကတော့ ၃-၁ဆိုရလဒ်ထွက်မယ်ဆိုတာ သိသာတယ်လို့ ပြောခဲ့ပါတယ်။ မန်စီးတီးဟာ ပရီးမီးယားလိဂ် နောက်ဆုံး၁၃ပွဲမှာ clean sheet ၂ပွဲသာ ရှိခဲ့ပေမယ့် ကာရေဂါကတော့ စီးတီးဟာ စွန့်စားပြီးကစားချင်စိတ်မရှိဘူးလို့ ထောက်ပြခဲ့ပါတယ်။

ဂွါဒီယိုလာက "အဲ့ဒါက ကျွန်တော်တို့ ဘယ်လောက်ထိ စိတ်ကျေနပ်မှုရှိတယ်ဆိုတာနဲ့ ဆိုင်ပါတယ်။ အဲ့ဒီကစားပုံက ကျွန်တော်တို့ရဲ့ မူပိုင်ပါ။ ကစားပုံကို လူတွေ အသိအမှတ်မပြုဘူးဆိုပြီး ကိစ္စမရှိပါဘူး။ အဲ့ဒါက ပြဿနာကြီးမဟုတ်ပါဘူး။ ကျွန်တော်တို့ ဒီမှာရှိနေသေးပြီး ကိုယ့်ကိုယ်ကိုယ်ခံစားချက်ကောင်းဖို့က အရေးကြီးပါတယ်။ ဖလား၃လုံးရတယ်ဆိုတာလည်း အဲ့ဒါကြောင့်ဖြစ်ပြီး အပြင်က ဝေဖန်သုံးသပ်သူတွေကြောင့် မဟုတ်ပါဘူး"လို့ ပြောခဲ့ပါတယ်။

ကစားပုံက ပျင်းစရာကောင်းတယ်ဆိုတဲ့အပေါ် ဂွါဒီယိုလာက "ကျွန်တော် ဘာပြောနိုင်မှာလဲ။ နဗီးလ်ရဲ့ချီးမွှမ်းမှုကို ကျေးဇူးတင်ပါတယ်။ ဘောလုံးမှာ အရာအားလုံးက ခက်ခဲပါတယ်။ ကျွန်တော် အဲ့ဒါကိုတော့ သေချာသိပါတယ်။ အပတ်တိုင်း ပြိုင်ဆိုင်မှုတွေ ပြုလုပ်နေရတာက ဘယ်လောက်ခက်ခဲတယ်ဆိုတာ ကမ္ဘာပေါ်က ဘောလုံးနဲ့သက်ဆိုင်သူအားလုံးသိကြပါတယ်။ ကျွန်တော် တစ်ခုပြောပြပါမယ်။ အနာဂတ်မှာ ခင်ဗျားတို့ မေ့နိုင်မှာမဟုတ်ပါဘူး။ ဘောလုံးကစားတာက လွယ်တယ်ထင်ရပေမယ့် မလွယ်ပါဘူး။ အဲ့ဒါလေးကို မှတ်မိစေချင်ပါတယ်။ ပြိုင်ဘက်က ကျွန်တော်တို့အပေါ် လေးစားမှုရှိပါတယ်။ တစ်ခါတစ်လေ ကျွန်တော်တို့လုပ်ပြခဲ့တာတွေက မလုံလောက်ဘူးလို့ ထင်ကြတာရှိလိမ့်မယ်။ ဒါပေမယ့် ဘောလုံးကစားတာက ဘယ်လောက်ထိခက်တယ်ဆိုတာ ကျွန်တော် ကောင်းကောင်းသိပါတယ်"လို့ ပြောခဲ့ပါတယ်။