မန်စီးတီးနည်းပြ ပက်ဂွါဒီယိုလာက နွေရာသီအပြောင်းအရွှေ့မပိတ်ခင်မှာ ကစားသမားအချို့ကို ရောင်းထုတ်သွားဖို့ စီစဉ်နေတယ်လို့ ပြောကြားလိုက်ပါတယ်။ ပွဲကစားချိန်နည်းပါးတာကြောင့် နောက်ရာသီမှာ ဝမ်းနည်းနေမယ့် ကစားသမားတွေ မရှိစေချင်ဘူးလို့ ဆိုပါတယ်။
 
အမေရိကန်ခရီးစဉ်မှာ လိုင်ယွန်အသင်းကနေ ခေါ်ယူထားတဲ့ တိုက်စစ်ကစားသမား ရိုင်ယန်ချာကီ (ပေါင် ၃၄ သန်း)၊ ဝုဗ်အသင်းကနေ ခေါ်ယူထားတဲ့ ဘယ်နောက်ခံလူ ရိုင်ယန်အယ်လ်နူရီ (ပေါင် ၃၁ သန်း)၊ အေစီမီလန်အသင်းကနေ ခေါ်ယူထားတဲ့ ကွင်းလယ်ကစားသမား တီဂျန်နီရိန်ဒါးစ် (ပေါင် ၄၆.၃ သန်း) နဲ့ ချဲလ်ဆီးအသင်းကနေ ခေါ်ယူထားတဲ့ ဂိုးသမား မာကပ်စ်ဘက်တီနယ်လီ  တို့ပါဝင်ပါတယ်။ မာတီယို ကိုဗာဆစ်ကတော့ အရွတ်ဒဏ်ရာကြောင့် ခရီးစဉ်မှာ ပါဝင်နိုင်ခြင်းမရှိခဲ့ပါဘူး။

ကလပ်ကမ္ဘာ့ဖလားအသင်းမှာ ဂျက်ဂရီးလစ်ရှ်၊ ဝေါ်လ်ကာနဲ့ ဂျိမ်းစ် မက်အတီတို့အပြင် ကယ်လ်ဗင်ဖီးလစ်တို့လည်း ပါဝင်ခြင်းမရှိပါဘူး။  ပြီးခဲ့တဲ့ရာသီအကုန်မှာ  ဂွါဒီယိုလာက ကစားသမားတွေ အရမ်းများလာရင် အသင်းကထွက်သွားမယ်လို့တောင်ပြောခဲ့ဖူးပါတယ်။
အမေရိကန်နိုင်ငံ၊ အတ္တလန္တာမှာ အယ်လ်အိန်းအသင်းနဲ့ ကစားမယ့်ပွဲမတိုင်ခင် ဂွာဒီယိုလာက သူ့ရဲ့ အတွေးအခေါ်ကို အသေးစိတ်ပြောပြခဲ့ပါတယ်။ 

 ဂွါဒီယိုလာက "ကျွန်တော်က လက်ရှိမှာရှိတဲ့ ကစားသမားအားလုံးကို တစ်ရာသီလုံးလိုချင်ပါတယ်။ ကျွန်တော် တကယ်လိုချင်ပါတယ်။ ကစားသမားတွေရဲ့အပြုအမူနဲ့ပတ်သက်ပြီး ဘာသံသယမှမရှိပါဘူး။ ပြဿနာက သူတို့က ရာသီတစ်လျှောက်လုံးမှာ မပျော်ရွှင်ကြတော့မှာပဲ။ သူတို့က ဝမ်းနည်းကြမယ်၊ စိတ်ပျက်ကြမယ်။ ကျွန်တော် အဲဒီလိုမဖြစ်စေချင်ဘူး" လို့ပြောပါတယ်။ အသင်းကစားသမားတွေကို လျှော့ချတာဟာ ကစားသမားတွေအတွက်ဖြစ်တယ်လို့ သူက အလေးအနက်ပြောကြားခဲ့ပါတယ်။ 

ဆက်လက်ပြီး  ဂွါဒီယိုလာက "ကျွန်တော့်အတွက်တော့ ပြဿနာမရှိပါဘူး။ ကျွန်တော့်မှာ ရွေးချယ်စရာတွေအများကြီးရှိပေမဲ့ ဒဏ်ရာမရှိဘဲ အိမ်မှာပဲ ၆ ယောက်၊ ၇ ယောက်လောက် ထားနေရတာမျိုးကိုတော့ မကြိုက်ဘူး။ ဒါကြောင့် ကျွန်တော်က အဲဒီလိုလုပ်တာပါ။ သူတို့အတွက် အဲဒီလိုလုပ်ပေးတာပါ။ ဒါကြောင့် ဘာတွေဆက်ဖြစ်မလဲဆိုတာ စောင့်ကြည့်ရပါမယ်။ အပြောင်းအရွှေ့ကာလပိတ်သိမ်းတဲ့အချိန်အထိ အချိန်အတော်ကြာအောင် စောင့်ရဦးမယ်လို့ပြောချင်ပါတယ်"လို့ ဆိုပါတယ်။

ဂွါဒီယိုလာရဲ့ ပြောဆိုချက်အရ လက်ရှိအမေရိကန်ခရီးစဉ်မှာပါဝင်တဲ့ ကစားသမားအနည်းဆုံး ၃ ဦးဟာ သြဂုတ်လမှာ ပရီးမီးယားလိဂ်ရာသီစတင်တဲ့အခါ အသင်းကနေ ထွက်ခွာရဖွယ်ရှိပါတယ်။ ဂါလာတာစာရေးအသင်းကို ပြောင်းရွှေ့တော့မယ်လို့ သတင်းတွေထွက်နေတဲ့ အီကိုင်ဂမ်ဒိုဂန်ရဲ့ အနာဂတ်နဲ့ပတ်သက်ပြီး မေးမြန်းတဲ့အခါ  ဂွါဒီယိုလာက "ကျွန်တော် ဘာမှမသိပါဘူး။ သူနဲ့ကျွန်တော်စကားမပြောဖြစ်ခဲ့ဘူး။ သူသာအသင်းမှာမရှိတော့ဘူးဆိုရင် သူဒီမှာရှိနေမှာမဟုတ်ဘူး" လို့ ဖြေကြားခဲ့ပါတယ်။