ခရစ္စတယ်ပဲလေ့စ်အသင်း နည်းပြ အိုလီဗာဂလက်စ်နာဟာ အပြောင်းအရွှေ့ဈေးကွက် ပိတ်သိမ်းဖို့ ရက်အနည်းငယ်အလိုမှာ အပြောင်းအရွှေ့လှုပ်ရှားမှုတွေရဲ့ ဗဟိုချက်ဖြစ်နေတဲ့ အဓိကနောက်ခံလူ မာ့ခ် ဂူဟီရဲ့ အနာဂတ်အကြောင်းကို ထုတ်ဖော်ပြောကြားခဲ့ပါတယ်။ လီဗာပူးအသင်းက အင်္ဂလန်လက်ရွေးစင် ကစားသမားအတွက် နောက်ဆုံးမိနစ်မှာ ကြိုးပမ်းနေတာကြောင့် ပဲလေ့စ်အသင်းဟာ သူတို့ရဲ့ တန်ဖိုးအရှိဆုံး ကစားသမားတစ်ဦးကို ထိန်းသိမ်းထားနိုင်ဖို့ ရုန်းကန်နေရပါတယ်။

နည်းပြ ဂလက်စ်နာ လက်အောက်မှာ ပဲလေ့စ်အသင်းရဲ့ အက်ဖ်အေဖလား ဗိုလ်စွဲခဲ့မှုမှာ အဓိကအခန်းကဏ္ဍကနေ ပါဝင်ခဲ့တဲ့ ဂူဟီဟာ သူ့ရဲ့စာချုပ်သက်တမ်း နောက်ဆုံးနှစ်ထဲ ရောက်ရှိနေပါတယ်။ အဲဒီလို စာချုပ်သက်တမ်းကုန်ဆုံးတော့မယ့် အချိန်အခြေအနေကပဲ အသင်းအတွက် အရေးကြီးတဲ့ ဆုံးဖြတ်ချက်ကို ချမှတ်ရတော့မှာပါ။ အခုပဲ ရောင်းထုတ်မလား ဒါမှမဟုတ် လာမယ့်နွေရာသီမှာ အလကားဆုံးရှုံးမလားဆိုတဲ့ ဆုံးဖြတ်ချက် ဖြစ်ပါတယ်။

ပြီးခဲ့တဲ့အပတ်က အာဆင်နယ်ထံ အီဘီရီချီ အီးဇီးကို ဆုံးရှုံးခဲ့ရတာက ပဲလေ့စ်အသင်းအတွက် ထိခိုက်စေခဲ့ပါတယ်။ အဲဒီအပြောင်းအရွှေ့ကြောင့် နည်းပြ ဂလက်စ်နာလည်း ဒေါသထွက်ခဲ့ပြီး ပြင်ဆင်မှုတွေကို ထိခိုက်စေခဲ့ပါတယ်။ အခုတော့ လီဗာပူးအသင်းကလည်း ဂူဟီကို ဝိုင်းထားတာကြောင့် နောက်ထပ် ထိုးနှက်ချက်တစ်ရပ်ကို ထပ်မံရင်ဆိုင်နေရတာပဲ ဖြစ်ပါတယ်။

တနင်္ဂနွေနေ့မှာ အက်စတွန်ဗီလာနဲ့ပွဲစဥ်အတွက် ဂူဟီ ပါဝင်နိုင်မှုအကြောင်း မေးမြန်းတဲ့အခါမှာ နည်းပြ ဂလက်စ်နာဟာ သူရဲ့စိုးရိမ်ပူပန်မှုကို မဖုံးကွယ်ထားနိုင်ခဲ့ပါဘူး။ နည်းပြက "အားလုံး မြင်နိုင်ပါတယ်၊ ကျွန်တော်တို့မှာ ဘယ်လောက်များများ ကစားသမား ရနိုင်တယ်ဆိုတာကို အားလုံး မြင်နိုင်ပါတယ်၊ မာ့ခ်က ဘယ်လောက်အရေးကြီးတယ်ဆိုတာကိုလည်း အားလုံး မြင်နိုင်ပါတယ်၊ ရိုးရိုးသားသားပြောရရင်တော့ ကျွန်တော် မသိပါဘူး၊ ဒါပေမဲ့ ဗီလာပါ့ခ်မှာ မာ့ခ်က ကျွန်တော်တို့အတွက် ကစားလိမ့်မယ်လို့ ကျွန်တော် တကယ်ပဲ မျှော်လင့်ပါတယ်၊ မာ့ခ်ဟာ ဒီရာသီကုန်အထိ ကျွန်တော်တို့အတွက် ကစားလိမ့်မယ်လို့ တကယ်ပဲ မျှော်လင့်ပါတယ်" လို့ ပြောပါတယ်။

လက်ရှိဖြစ်နေတဲ့ အပြောင်းအရွှေ့သတင်းတွေကြောင့် ရာသီသစ်အတွက် ပြင်ဆင်မှုတွေဟာ အိပ်မက်ဆိုးတစ်ခုဖြစ်နေတယ်လို့လည်း ဂလပ်စ်နာက ဝန်ခံခဲ့ပါတယ်။ သူက အပြောင်းအရွှေ့ကာလကို ဘောလုံးရာသီ မစခင်ကတည်းက ပိတ်သင့်တယ်လို့လည်း ပြောခဲ့ပါတယ်။

"ကျွန်တော် မကြာခဏဆိုသလို ပြောနေပါတယ်၊ ကျွန်တော့်အတွက်ရော နည်းပြတိုင်းအတွက်ပါ ရာသီစတင်တဲ့အခါ အပြောင်းအရွှေ့လည်း ရပ်တန့်သွားသင့်ပါတယ်။ ဘာဖြစ်လို့လဲဆိုတော့ ခင်ဗျားတို့ဟာ ရာသီတစ်ခုအတွက် အသင်းကို ပြင်ဆင်နေလို့ပါ။ ဒါဟာ ပိုမိုလွယ်ကူစေမှာ ဖြစ်ပါတယ်၊ ဒါပေမဲ့ နောက်ဆုံးမှာတော့ ပြီးခဲ့တဲ့နှစ်ကလိုပဲ စက်တင်ဘာလ (၁) ရက်၊ တနင်္လာနေ့မှာ အရက်ဆိုင်ကို သွားပြီး ဘီယာတစ်ခွက်မှာသောက်မှာပါ" လို့ သူက ပြောပါတယ်၊

အခြေအနေတွေနောက်ကွယ်မှာတော့ ပဲလေ့စ်အသင်းဟာ ဖြစ်နိုင်ခြေရှိတဲ့ အစီအစဥ်တွေကို ကြိုတင်တွက်ဆထားပြီး ဖြစ်ပါတယ်။ ဂူဟီ ထွက်ခွာသွားခဲ့ရင် အစားထိုးဖို့အတွက် မန်စီးတီးကစားသမား အကန်ဂျီကို ခေါ်ယူဖို့ အသင်းက စဥ်းစားနေကြောင်း သတင်းတွေမှာ ဖော်ပြထားပါတယ်။