မန်ချက်စတာစီးတီးဟာ အသင်းရဲ့ကြယ်ပွင့် ကစားသမားဟာ ဖီးလ်ဖိုဒန်ကို အခြားကလပ်အသင်းတွေရဲ့စိတ်ဝင်စားမှုမှ ကာကွယ်နိုင်ဖို့အတွက် စံချိန်တင်စာချုပ်တစ်ရပ်ကမ်းလှမ်းသွားမယ်လို့ သတင်းတွေ ထွက်ပေါ်နေတာကြောင့် ဖိုဒန်ဟာ သမိုင်းတစ်လျှောက်လစာအမြင့်ဆုံး အင်္ဂလိပ်ကစားသမားဖြစ်လာတော့မယ်လို့ သိရပါတယ်။

ပြီးခဲ့တဲ့ ၂၀၂၃-၂၄ ရာသီမှာ ဖိုဒန်ဟာ သူ့ရဲ့ကစားသမားဘဝအကောင်းဆုံး စွမ်းဆောင်ရည်တွေကို ပြသနိုင်ခဲ့ပြီး မန်စီးတီးအတွက် ပရီးမီးယားလိဂ်မှာ ၁၉ ဂိုး သွင်းယူကာ ဂိုးဖန်တီးမှု ၈ ကြိမ်အထိ ပြုလုပ်နိုင်ခဲ့ပါတယ်။ ကွင်းလယ်လူဟာ လာမယ့် ၂၀၂၄ ယူရိုပြိုင်ပွဲမှာ  အင်္ဂလန်အသင်းရဲ့ပွဲထွက်ကစားသမားစာရင်းမှာ ပါဝင်ဖို့ သေချာနေသော်လည်း ရီးရဲလ်မက်ဒရစ် ကွင်းလယ်လူ ဂျုဒ်ဘယ်လင်ဟမ်ကြောင့် နံပါတ် ၁၀ နေရာကိုတော့ လက်လွှတ်သွားရဖွယ်ရှိနေပါတယ်။

သို့သော်လည်း ဥရောပကလပ်အသင်းကြီးတွေရဲ့ ပစ်မှတ်ထားခြင်းကိုခံနေရတဲ့ ဖိုဒန်ဟာ အရည်အသွေးမြင့် ကစားသမားတစ်ဦးဖြစ်တာကြောင့် ရီးရဲလ်မက်ဒရစ်ကလည်း အင်္ဂလန်သားကိုခေါ်ယူဖို့ စိတ်ဝင်စားနေကြောင်း အခိုင်အမာဆိုခဲ့ပါတယ်။ စပိန်အခြေစိုက်သတင်းဌာနတွေအရ ရီးရဲလ်မက်ဒရစ်ရဲ့ကင်းထောက်အဖွဲ့ဟာ အသက်-၂၄ နှစ် အရွယ် ကစားသမားကိုခေါ်ယူဖို့ ပစ်မှတ်ထားနေပြီး လာမယ့်နွေရာသီမှာပဲ ဘာနေဗျူးသို့ခေါ်ယူဖို့ ဆွဲဆောင်သွားမှာဖြစ်တယ်လို့သိရပါတယ်။
နောက်ထပ်သတင်းတွေမှာတော့ အန်ဆယ်လော့တီရဲ့အသင်းဟာ ပီအက်စ်ဂျီစူပါစတား ကီလီယန်အမ်ဘာပေကို ခေါ်ယူထားနိုင်ခဲ့ပြီးဖြစ်တာကြောင့် ဖိုဒန်ကို ခေါ်ယူဖို့ စိတ်မဝင်စားတော့ဘဲ လေဗာကူဆင် တိုက်စစ်ကစားသမား ဖလော်ရီယန်ဝက်ဇ်ကို ပစ်မှတ်ထားနေတယ်လို့လည်း ဖော်ပြထားကြပါတယ်။

ယခုအခါမှာတော့ The Sun ရဲ့အဆိုအရ မန်စီးတီးဟာ ဖိုဒန်ကို အီတီဟတ်မှာ ကာလရှည်ထိန်းသိမ်းဖို့ရည်ရွယ်နေတာကြောင့် စာချုပ်သစ် ကမ်းလှမ်းဖို့ပြင်ဆင်နေပြီး သမိုင်းတစ်လျှောက် လစာအမြင့်ဆုံး အင်္ဂလိပ်ကစားသမားအဖြစ် ဆွဲဆောင်သွားမယ်လို့ သိရပါတယ်။ မန်စီးတီးဟာ အင်္ဂလန်လက်ရွေးစင်ကစားသမားကို တစ်ပတ်လုပ်ခပေါင် ၃ သိန်း ၇ သောင်းခွဲတန်ကြေးရှိ စာချုပ်တစ်ရပ်ကမ်းလှမ်းသွားမှာဖြစ်ပြီး အဆိုပါပမာဏဟာ လက်ရှိ ကယ်ဗင်ဒီဘရိုင်းနဲ့ အာလင်းဟာလန်းတို့ ရရှိနေတဲ့ ပမာဏနဲ့တူညီနေတာလည်း ဖြစ်ပါတယ်။

သို့သော်လည်း ဖိုဒန်က လက်ရှိအချိန်မှာတော့ ယူရိုအတွက်သာ အာရုံစိုက်ထားကြောင်းကို “အသင်းရဲ့အရန်ခုံမှာ ရှိနေတဲ့ ကစားသမားတွေကတောင် ကျွန်တော်တွေ့ဖူးသမျှထဲမှာ  အကောင်းဆုံး ကစားသမားတွေပါပဲ။ ကစားသမားအားလုံးက ပုံစံကောင်းမှာရှိနေကြပါတယ်။ ပြီးခဲ့တဲ့ ရာသီအနည်းငယ်အတွင်းမှာ အင်္ဂလန်အသင်းကပိုကောင်းလာခဲ့ပါတယ်။ ဒီလိုကောင်းလာဖို့ ကျွန်တော်တို့ အချိန်အတော်ယူခဲ့ရပြီး အခုချိန်မှာတော့ တစ်ယောက်နဲ့တစ်ယောက်နားလည်မှုတွေ အများကြီးတည်ဆောက်ထားနိုင်ပါပြီ” လို့ ပြောကြားခဲ့ပါတယ်။