လီဗာပူး၊ ချဲလ်ဆီးတို့လို ပရီးမီးယားလိဂ်ထိပ်သီးတွေနဲ့ သတင်းတွေ ထွက်ပေါ်နေချိန်မှာပဲ ဘရိုက်တန်ပဲ့ကိုင်ရှင်ဒီဇာဘီက နည်းပြဘဝအနာဂတ်အတွက် အသင်းနဲ့ဆွေးနွေးသွားဖို့ စီစဉ်နေတယ်လို့ ထုတ်ဖော်ပြောဆိုလိုက်ပါတယ်။

အီတာလျံသားက မကြာသေးမီနှစ်တွေအတွင်း ဥရောပရဲ့ အလားအလာအရှိဆုံးနည်းပြတွေအနက် တစ်ဦးဖြစ်လာသည်အထိ စွမ်းဆောင်ထားနိုင်ခဲ့ပြီး သူနဲ့ပတ်သက်လို့ ထိပ်တန်းကလပ်အသင်းကြီးတွေဆီ ပြောင်းရွှေ့လိမ့်မယ်ဆိုတဲ့ အများရဲ့ ထင်မြင်ယူဆမှုတွေလည်း ရှိလာခဲ့ပါတယ်။ လတ်တလောမှာ ဒီဇာဘီကို ရာသီကုန်၊ လီဗာပူးအသင်းမှထွက်ခွာဖို့ရှိနေတဲ့ ယာဂန်ကလော့ပ်ရဲ့ နေရာအတွက် ဆက်ခံပေးဖို့ ချိတ်ဆက်မှုတွေ ရှိခဲ့ပါတယ်။ ဒါ့အပြင် ဘရိုက်တန်နည်းပြက လာမယ့်အနာဂတ်ကာလမှာ ပိုချက်တီနို ရာထူးမှ ထုတ်ပယ်ခံခဲ့ရရင် ချဲလ်ဆီးနဲ့အတူ လက်တွဲနိုင်မယ့်သူအဖြစ် ဖော်ပြခံနေရပါတယ်။

Sky Sports ရဲ့ အင်တာဗျူးအစီအစဉ်တစ်ခုမှာ ဒီဇာဘီက ဘရိုက်တန်နဲ့အတူ ပျော်ရွှင်နေပေမယ့် တစ်ချိန်ချိန်မှာတော့ ကလပ်အသင်းကြီးတစ်ခုအတွက် အလုပ်လုပ်သွားဖို့ စဉ်းစားထားတယ်လို့ ပွင့်ပွင့်လင်းလင်းပြောဆိုလိုက်ပါတယ်။

သူက “ဘရိုက်တန်အသင်းသမိုင်းကြောင်းရဲ့ နောက်ထပ်ကဏ္ဍတစ်ရပ်ကို ကျွန်တော်တို့ ရေးသားနိုင်မယ်လို့ ခံစားမိပါတယ်။ အားလုံးကလည်း ဒီတာဝန်ရှိမှုကို ခံစားနေကြရပြီး ပရိတ်သတ်တွေနဲ့ ကလပ်အသင်းမှာရှိနေသူတွေ ပျော်ရွှင်လာအောင် ကျွန်တော်တို့ ကြိုးစားလုပ်ဆောင်နေပါတယ်။ ကျွန်တော်တို့ရဲ့ အကောင်းဆုံးကြိုးစားပြသွားပါမယ်။ ကလပ်အသင်းကြီးတွေက ကျွန်တော့်ကို စိတ်ဝင်စားနေတယ်လို့ ကြားရတာ ဂုဏ်ယူစရာပါ။ ဒါပေမယ့် ကျွန်တော်ကတော့ ကိုယ့်အလုပ်ကိုပဲ နေ့တိုင်းအာရုံစိုက်နေပါတယ်။ အနာဂတ်နဲ့ပတ်သက်လို့ အသင်းပိုင်ရှင်တွေ၊ အသင်းတာဝန်ရှိသူတွေနဲ့ ကျွန်တော်ဆွေးနွေးသွားပါမယ်။ ဘာကြောင့်လဲဆိုတော့ ကျွန်တော်က ကိုယ်လုပ်နိုင်သမျှ အကောင်းဆုံးနည်းလမ်းမျိုးနဲ့ ယှဉ်ပြိုင်သွားချင်လို့ ဖြစ်ပါတယ်။ အစီအစဉ်တွေကိုလည်း နားလည်ပေးချင်ပါတယ်။ ဒီနောက်မှာ ကလပ်အသင်းကြီးတစ်ခုအတွက် အလုပ်လုပ်ဖို့ဆိုတာ ပြဿနာတစ်ခုတော့ မဟုတ်ပါဘူး။ ကျွန်တော့်ရဲ့နည်းပြဘဝမှာ ပရီးမီးယားလိဂ်၊ စီးရီးအေ၊ ဘွန်ဒက်စ်လီဂါ၊ လာလီဂါ၊ ချန်ပီယံလိဂ်ဆုဖလားတွေကို ဆွတ်ခူးနိုင်ရေး ယှဉ်ပြိုင်သွားချင်ပါတယ်။ ဒါပေမယ့် အချိန်မကျသေးပါဘူး”လို့ ပြောပါတယ်။