ဘာစီလိုနာနည်းပြ ဟန်ဆီဖလစ်က ဘင်ဖီကာကို ရာဖင်ဟာရဲ့နောက်ကျသွင်းဂိုးကြောင့် ၄-၅ နဲ့အနိုင်ရခဲ့ပြီးနောက် ပွဲအပြီးမှာ အဆိုပါပွဲစဉ်ဟာ ရူးလောက်စရာကောင်းတယ်လို့ ဝန်ခံပြောကြားခဲ့ပြီး အသင်းရဲ့ အနိုင်မခံ အရှုံးမပေးစိတ်ဓာတ်ကို ချီးကျူးလာခဲ့ပါတယ်။ 

ယခုပွဲစဉ်မှာ ဘာစီလိုနာဟာ ဘင်ဖီကာရဲ့ပြတ်ပြတ်သားသား ဦးဆောင်ခြင်းကို ၂ ကြိမ်တိုင်တိုင် ခံခဲ့ရပြီးမှ နောက်ကျသွင်းဂိုးတွေနဲ့အတူ အဝေးကွင်းမှာ အဖိုးတန်အနိုင် ၃ မှတ်ကို ပုံဖော်နိုင်ခဲ့တာဖြစ်ပါတယ်။ ပွဲအပြီးမှာ ဖလစ်က “ရူးလောက်စရာကောင်းတဲ့ပွဲပါ။ အရေးကြီးဆုံး အပြုသဘောဆောင်တဲ့အချက်ကတော့ ကျွန်တော်တို့အသင်းရဲ့ စိတ်ဓာတ်ကြံ့ခိုင်မှုပါပဲ။ မယုံနိုင်လောက်စရာအခြေအနေကနေ ပြန်လာနိုင်ခဲ့ပါတယ်။ ဒါကြောင့် ကျွန်တော်တို့ ဘောလုံးကိုချစ်မြတ်နိုးနေတာပါ။ ကျွန်တော့်အနေနဲ့ ဒီလို come back အတွေ့အကြုံမျိုး မရှိခဲ့ဖူးပါဘူး။ မယုံနိုင်စရာပါပဲ။ ပထမပိုင်းမှာ အသင်းက ခြေစွမ်းညံ့ဖျင်းခဲ့ပေမယ့် ဒုတိယပိုင်းမှာတော့ ပိုကောင်းခဲ့ပါတယ်”

“သူတို့က ကျွန်တော်တို့ကို သေသေချာချာ ခုခံကစားနိုင်ခဲ့ပါတယ်။ အသင်းရဲ့ကစားသမားတွေမှာလည်း နေရာယူပုံမှားယွင်းမှုတွေရှိခဲ့ပါတယ်။ ဒုတိယိပိုင်းရောက်မှ ပိုကောင်းခဲ့တယ်ဆိုတာတော့ ဝန်ခံပါတယ်။ လူစားပြောင်းလဲမှုတွေက ဒီပွဲမှာ အရမ်းအရေးပါခဲ့ပါတယ်” လို့ပြောကြားခဲ့ပါတယ်။

ဆက်လက်ပြီး ဖလစ်က ယခုပွဲစဉ်မှာ ပေါ့လျော့မှုကြောင့် ၂ ဂိုးအထိခွင့်ပြုခဲ့ရပြီး လက်စွမ်းပြဖို့ရုန်းကန်ခဲ့ရတဲ့ အသင်းရဲ့ဂိုးသမား ဆက်ဇ်ဇီနီကိုလည်း ကာကွယ်ပြောဆိုမှုတွေပြုလုပ်ခဲ့ပါတယ်။ ဂျာမန်သားက “အမှားမလုပ်တဲ့ကစားသမားဆိုတာမရှိပါဘူး။ ဒါက ပုံမှန်ပါပဲ။ တစ်သင်းလုံးအတူတူနိုင်ပြီး အတူတူရှုံးကြပါမယ်။ ရလဒ်က ကစားသမားတစ်ယောက်တည်းအပေါ်မှာ မူတည်မနေပါဘူး။ ဒီနိုင်ပွဲကြောင့် ကျွန်တော်တို့အနေနဲ့ ဗလန်စီယာ၊ အတ္တလန္တာတို့နဲ့ကစားသွားမယ့်ပွဲတွေအပေါ် အာရုံစိုက်နိုင်သွားပါပြီ။ ဒါပေမယ့် သက်တောင့်သက်သာဖြစ်နေတဲ့ အခြေအနေမျိုးနဲ့တော့မဟုတ်ပါဘူး။ အသင်းတော်တော်များများက ထပ်ဆုံး ၈ သင်းစာရင်းမှာဝင်နိုင်တယ်လို့ ယုံကြည်နေတုန်းမို့ပါ” လို့ပြောကြားခဲ့ပါတယ်။ 

လာမယ့်ချန်ပီယံလိဂ်ပွဲစဉ်မှာတော့ ဘာစီလိုနာဟာ အတ္တလန္တာနဲ့ယှဉ်ပြိုင်သွားရမှာဖြစ်ပြီး ချန်ပီယံလိဂ် ၇ ပွဲဆက်တိုက်နိုင်ပွဲရရှိသွားမလား စောင့်ကြည့်ရပါမယ်။