မန်ချက်စတာယူနိုက်တက်ကွင်းလယ်လူ ခရစ်ရှင်အဲရစ်ဆင်က သူဟာ ရာသီကုန်မှာ အိုးလ်ထရက်ဖို့ဒ်ကနေ ထွက်ခွာဖို့မျှော်လင့်ထားတယ်လို့ ပြောကြားလာခဲ့ပြီး မွေးရပ်မြေ ဒိန်းမတ်နိုင်ငံသို့ ပြန်ဖို့အတွက်တော့ အဆင်သင့်မဖြစ်သေးဘူးလို့ဆိုပါတယ်။ 

၂၀၂၂ ခုနှစ်မှာ ယူနိုက်တက်သို့စတင်ရောက်ရှိလာခဲ့တဲ့ အသက်-၃၃ နှစ်အရွယ်စွယ်စုံရကွင်းလယ်လူဟာ ယခုရာသီကုန်မှာပဲ စာချုပ်သက်တမ်းကုန်ဆုံးမှာဖြစ်ပြီး အသင်းဘက်က စာချုပ်သစ်ချုပ်ဆိုဖို့ ကမ်းလှမ်းထားခြင်းမရှိဘူးလို့ဆိုပါတယ်။ ဒိန်းမတ်မှာပြုလုပ်ခဲ့တဲ့ အင်တာဗျူးတစ်ခုမှာ အဲရစ်ဆင်က "ကျွန်တော်ဒီအကြောင်းကို ဘယ်သူ့ကိုမှမပြောပြရသေးပါဘူး။ ရာသီကုန်မှာ ကျွန်တော်နဲ့ ယူနိုက်တက်တို့ရဲ့ ပေါင်းစပ်မှုက အဆုံးသတ်ပြီလို့ယူဆထားပါတယ်။ ကျွန်တော့်ရဲ့စာချုပ် သက်တမ်းကုန်ဆုံးတော့မယ်ဆိုတာတော့ လူတိုင်းသိပါတယ်။ ဒါကြောင့် အသင်းကနေထွက်ခွာဖို့ပဲမျှော်လင့်ထားပါတယ်"

"ယူနိုက်တက်နဲ့လမ်းခွဲမယ့်အကြောင်းကို ကျွန်တော်အများကြီးမတွေးထားပါဘူး။ နေရာသစ်တစ်ခုကိုရှာဖွေဖို့ပဲ ပြင်ဆင်ထားပါတယ်။ လောလောဆယ်မှာတော့ ဘယ်ကိုပြောင်းရွှေ့မယ်ဆိုတာ မဆုံးဖြတ်ရသေးပါဘူး။ ကျွန်တော်နဲ့ ကျွန်တော့်ရဲ့မိသားစုအတွက် သင့်တော်မယ့်နေရာတစ်ခုကို ပြောင်းရွှေ့မယ်လို့တော့ စဉ်းစားထားပါတယ်" လို့ပြောကြားခဲ့ပါတယ်။ 

ပြီးခဲ့တဲ့နှစ်နိုဝင်ဘာလက ယူနိုက်တက်ကိုစတင်ကိုင်တွယ်ခဲ့တဲ့ နည်းပြသစ်ရူဘင်အာမိုရင်လက်အောက်မှာ အဲရစ်ဆင်ဟာ ပြိုင်ပွဲစုံ ၁၄ ပွဲသာပါဝင်ကစားခွင့်ရထားပါတယ်။ သို့သော်လည်း ကွင်းလယ်လူဟာ အာဆင်နယ်၊ လက်စတာတို့နဲ့ယှဉ်ပြိုင်ခဲ့တဲ့ ယူနိုက်တက်ရဲ့ နောက်ဆုံးပရီးမီးယားလိဂ်ပွဲစဉ် ၂ ပွဲမှာတော့ ပွဲထွက်ကစားသမားအဖြစ် ပါဝင်ခွင့်ရခဲ့ပါတယ်။ 

အဲရစ်ဆင်ဟာ သူ့ရဲ့ကစားသမားဘဝကို ဥရောထိပ်သီးကလပ်တွေဖြစ်တဲ့ အေဂျက်စ်၊ တော့တင်ဟမ်နဲ့ အင်တာမီလန်တို့မှာဖြတ်သန်းခဲ့ဖူးသလို၊ ဘရန့်ဖို့ဒ်မှာလည်း ကစားခဲ့ဖူးပါတယ်။ လောလောဆယ်မှာတော့ ကစားသမားဟာ မွေးရပ်မြေဒိန်းမတ်သို့ ပြန်သွားဖို့အတွက်လည်း အဆင်သင့်မဖြစ်သေးဘူးလို့ဆိုပါတယ်။ 

အဲရစ်ဆင်က "ကျွန်တော့်အနေနဲ့ နိုင်ငံခြားမှာဆက်ကစားဖို့ နှစ်အနည်းငယ်အချိန်ရသေးတယ်လို့ခံစားရပါတယ်။ တကယ်လို့ဒိန်းမတ်ကိုသာ ပြန်ခဲ့မယ်ဆိုရင် မိသားစုအတွက်အရေးပေးပြီး ကျွန်တော့်ရဲ့ ကစားသမားဘဝကို ဆွဲချသလိုဖြစ်နေပါလိမ့်မယ်။ ဒါက ကောင်းတော့ကောင်းပေမယ့် ဒိန်းမတ်ကိုတော့ ကျွန်တော်ပြန်ဖြစ်ဦးမှာမဟုတ်ပါဘူး" လို့ပြောကြားခဲ့ပါတယ်။