ချဲလ်ဆီးဟာ ဘာစီလိုနာကွင်းလယ်လူ ဖာမင်လိုပက်ဇ်ကိုခေါ်ယူဖို့ ပစ်မှတ်ထားနေပြီး ယခုအခါမှာတော့ ကစားသမားရဲ့ကိုယ်စားလှယ်တွေနဲ့ အပြောင်းအရွှေ့အတွက် ဆွေးနွေးမှုတွေ ပြုလုပ်နေပြီလို့ သိရပါတယ်။ 

ဘာစီလိုနာအနေနဲ့လည်း အသင်းရဲ့ကွင်းလယ်မှာ ကစားသမားတွေအများအပြားရှိနေတာကြောင့် ဖာမင်လိုပက်ဇ်ကိုရောင်းချဖို့ စိတ်ဝင်စားနိုင်တယ်လို့လည်း သတင်းတွေကဆိုပါတယ်။ The Athletic သတင်းဌာနရဲ့အဆိုအရ ချဲလ်ဆီးဟာ ဖာမင်ကိုခေါ်ယူနိုင်ဖို့ အလားအလာရှိတဲ့ဆွေးနွေးမှုတွေပြုလုပ်ထားနိုင်ကြောင်း အတည်ပြုခဲ့ပေမယ့် ဘာစီလိုနာထံသို့ တရားဝင်ကမ်းလှမ်းမှုမပြုလုပ်ရသေးဘူးလို့ သိရပါတယ်။ 

ဘာစီလိုနာဟာ ဖာမင်အတွက်ပြောင်းရွှေ့ကြေးကို ပေါင် ၄၃ သန်းသာသတ်မှတ်ထားတာကြောင့် ချဲလ်ဆီးအနေနဲ့ အဆိုပါပမာဏကိုပေးချေဖို့ ငြင်းဆန်သွားဖွယ်မရှိပါဘူး။ ဖာမင်ဟာ ပြီးခဲ့တဲ့ ၂၀၂၄ ခုနှစ်၊ အောက်တိုဘာလကမှ ဘာစီလိုနာနဲ့ ၂၀၂၉ ခုနှစ်အထိ စာချုပ်သက်တမ်းတိုးမြှင့်ထားခဲ့တာဖြစ်ပြီး နူးကမ့်မှာ ကာလရှည်နေထိုင်ဖို့ ဆုံးဖြတ်ထားပုံပေါ်ပါတယ်။ 

နွေရာသီအပြောင်းအရွှေ့ကာလအတွင်း ပရီးမီးယားလိဂ်ထိပ်သီးကလပ်တွေအပါအဝင် ဥရောပကလပ်အတော်များများရဲ့စိတ်ဝင်စားမှုတွေရရှိခဲ့ပေမယ့် ဖာမင်ကတော့ ဘာစီလိုနာနဲ့ပဲ ဆက်လက် လက်တွဲလိုကြောင်း "ဘာစီလိုနာပရိသတ်တွေ ဘာမှစိတ်ပူစရာမရှိပါဘူး။ ကျွန်တော်ဒီမှာပဲ ဆက်နေမှာပါ။ ဒီအသင်းကို စွန့်ခွာသွားမှာမဟုတ်ပါဘူး။ လာလီဂါအဖွင့်ပွဲမှာ အသင်းအတွက်ပါဝင်ကစားဖို့မျှော်လင့်ထားပါတယ်" လို့ပြောကြားထားပါတယ်။

ဖာမင်အနေနဲ့ နူးကမ့်မှ ဆက်နေလိုပေမယ့် ဘာစီလိုနာဘက်ကတော့ အသင်းရဲ့ဘဏ္ဍာရေးအခြေအနေတွေ ထိန်းညှိနိုင်ရေးအတွက် ကစားသမားကိုရောင်းချဖို့ ဆုံးဖြတ်သွားဖွယ်ရှိပါတယ်။ အပြောင်းအရွှေ့ကာလက လာမယ့်စက်တင်ဘာလ ၁ ရက်နေ့မှာပဲ ပိတ်သိမ်းတော့မှာဖြစ်လို့ ချဲလ်ဆီးအနေနဲ့ တစ်ပတ်အတွင်း ဖာမင်ကိုခေါ်ယူပြီး ကွင်းလယ်ပိုင်းကို အင်အားဖြည့်တင်းသွားနိုင်မလား စောင့်ကြည့်ရပါမယ်။