လီဗာပူးနောက်ခံလူဟောင်း ဂျေမီကာရေဂါက လာမယ့်နွေရာသီမှာ အသင်းမှထိပ်တန်းကစားသမားအချို့ ထွက်ခွာဖို့ရှိနေတာကြောင့် နည်းပြအန်းစလော့အနေနဲ့ ကစားသမားသစ် ၅ ယောက်၊ ၆ ယောက်လောက်အထိ ပြန်လည်ခေါ်ယူပြီး အသင်းကို တည်ဆောက်သွားရမယ်လို့ အကြံပေးပြောကြားလာခဲ့ပါတယ်။ 

ပြီးခဲ့တဲ့အပတ်ထဲမှာ လီဗာပူးဟာ ချန်ပီယံလိဂ်ပြိုင်ပွဲကနေ ထွက်ခွာခဲ့ရသလို၊ ကာရာဘောင်ဖလားဗိုလ်လုပွဲမှာလည်း ရှုံးနိမ့်ပြီး ဆုဖလားကိုလက်လွှတ်ခဲ့တာကြောင့် အသင်းရဲ့ပရိသတ်တွေအနေနဲ့ ကလပ်ရဲ့အနာဂတ်အပေါ်စိုးရိမ်လာကြပါတယ်။ လက်ရှိအချိန်မှာ လီဗာပူးဟာ ပရီးမီးယားလိဂ်အမှတ်ပေးဇယားကို ထိပ်ဆုံးကနေ ပြတ်ပြတ်သားသားဦးဆောင်ထားနိုင်ပေမယ့် ပရိသတ်တွေကတော့ အဆိုပါဆုဖလားနဲ့ပါ လွဲချော်သွားမှာ စိုးရိမ်နေကြတယ်လို့သိရပါတယ်။ 

ဒါကြောင့် ယခုအခါမှာ ကာရေဂါကလည်း လာမယ့်နွေရာသီအပြောင်းအရွှေ့ဟာ နည်းပြ အန်းစလော့အတွက် အလွန်အလုပ်များတဲ့အပြောင်းအရွှေ့ကာလဖြစ်လာနိုင်ကြောင်း ပြောကြားလာခဲ့ပြီး ဇွန်လမှာ အသင်းနဲ့စာချုပ်သက်တမ်းကုန်ဆုံးမယ့် မိုဟာမက်ဆာလက်၊ ဗန်ဒိုက်ခ်နဲ့ အာနိုးလ်တို့နေရာမှာ အစားထိုးကစားသမားတွေ ပြန်လည်ခေါ်ယူသွားဖို့လိုအပ်နေကြောင်း ထောက်ပြခဲ့ပါတယ်။ 

နောက်ခံလူဟောင်းက "ကျွန်တော့်အနေနဲ့ အန်းစလော့က လီဗာပူးအတွက် ပရီးမီးယားလိဂ်ဖလားကိုဆွတ်ခူးပေးနိုင်တာမြင်တွေ့ရမှာ အရမ်းစိတ်လှုပ်ရှားစရာကောင်းပါတယ်။ ဒါပေမယ့် အသင်းမှာ တိုးတက်ဖို့လိုအပ်နေတဲ့ ဧရိယာတွေအများကြီးကျန်နေပါသေးတယ်"

"သူ့အနေနဲ့ အသင်းရဲ့ ဗဟိုခံစစ်နေရာအတွက် အင်အားဖြည့်တင်းဖို့လိုအပ်နေသလို၊ အသင်းကနေထွက်ခွာဖို့များနေတဲ့ အာနိုးလ်နေရာအတွက်လည်း စဉ်းစားထားဖို့လိုအပ်နေပါတယ်။ ပြီးတော့ အန်ဒိုနေရာမှာအစားထိုးဖို့ ကွင်းလယ်လူတစ်ယောက်၊ ငယ်ရွယ်တဲ့ ဗဟိုတိုက်စစ်မှူးတစ်ယောက်နဲ့ ဘယ်တောင်ပံကစားသမားတစ်ယောက်ကိုလည်း ခေါ်ယူသွားရပါမယ်"

"ဒါကြောင့် နွေရာသီမှာ လီဗာပူးအနေနဲ့ အနည်းဆုံးကစားသမားသစ် ၅ ယောက်၊ ၆ ယောက်လောက်အထိခေါ်ယူသွားရပါမယ်။ ပြီးတော့ အရန်အနေနဲ့လည်း ကစားသမား ၃ ယောက်လောက်အထိ ထပ်ခေါ်ဖို့လိုအပ်ပါတယ်" လို့ပြောကြားခဲ့ပါတယ်။ 

ဆက်လက်ပြီး ကာရေဂါက စလော့ရဲ့လက်ရှိလူစာရင်းဟာ ပြိုင်ပွဲစုံမှာ အလုပ်လုပ်နိုင်မှာမဟုတ်တာကြောင့် လာမယ့်ရာသီမှာအောင်မြင်မှုရဖို့ဆိုရင် များပြားလှတဲ့ ပွဲအချိန်ဇယားနဲ့ လိုက်လျောညီထွေရှိမယ့် ကစားသမားသစ်တွေ ခေါ်ယူသင့်တယ်လို့ အကြံပေးခဲ့ပါတယ်။ 

ကစားသမားဟောင်းက "လီဗာပူးအနေနဲ့ လာမယ့်ရာသီမှာ ချန်ပီယံလိဂ်နဲ့ ကာရာဘောင်ဖိုင်နယ်တို့ကို ပြန်လည်စိန်ခေါ်နိုင်ဖို့ ကစားသမားသစ်တွေလိုအပ်ပါတယ်။ အခုလက်ရှိကစားသမားတွေက အသင်းရဲ့အောင်မြင်မှုအတွက် လုံလောက်မှုရှိပါ့မလားဆိုတာ မေးခွန်းထုတ်ချင်စရာပါ။ စလော့မှာ ကစားသမားအလုံအလောက်မရှိခဲ့လို့ ဆောက်သမ်တန်ကိုရင်ဆိုင်ခဲ့တဲ့ လူစာရင်းနဲ့ ပီအက်စ်ဂျီကိုကစားခဲ့ရတဲ့ ချန်ပီယံလိဂ်ပွဲစဉ်အတွက်လူစာရင်းက တူညီနေခဲ့ပါတယ်။ ဒီရာသီ လီဗာပူးရဲ့လူစာရင်းကတော့ သူ့ရဲ့စိတ်ကြိုက်လူစာရင်းဟုတ်ချင်မှဟုတ်ပါလိမ့်မယ်။ ဒါပေမယ့်နောက်ရာသီမှာ သူ့စိတ်ကြိုက်ကစားသမားတွေကိုခေါ်ယူပြီး အသင်းကိုတည်ဆောက်သွားနိုင်ရပါမယ်'

"သူ့အနေနဲ့ ချန်ပီယံလိဂ်မှာ အခုထက်ပိုပြီး ရှေ့ဆက်သွားချင်ရင် သူ့ရဲ့စိတ်ကြိုက်လူစာရင်းကိုရရှိပြီး ယုံယုံကြည်ကြည်နဲ့ ဦးဆောင်သွားနိုင်ဖို့လိုပါတယ်။ ပြီးတော့ ကာရာဘောင်ဖလားဗိုလ်လုပွဲက လီဗာပူးရဲ့ စွမ်းဆောင်ရည်အပေါ်လည်း သူ့အနေနဲ့ လက်ခံနိုင်မှာမဟုတ်ပါဘူး" လို့ပြောကြားခဲ့ပါတယ်။