သတင်းတွေအရ အာဆင်နယ်အသင်းအားကစားဒါရိုက်တာ ဘာတာတစ်ယောက် တောင်ပံကစားသမား နီကိုဝီလီယံရဲ့အေးဂျင့်ဖြစ်သူနဲ့တွေ့ဆုံနေတယ်လို့ သိရပါတယ်။ အသက် ၂၂ နှစ်သားကို အာဆင်နယ်က နွေရာသီရဲ့ထိပ်တန်းပစ်မှတ်အဖြစ် သတ်မှတ်ထားတာဖြစ်ပါတယ်။ ပြီးခဲ့တဲ့နှစ်တုန်းက ဝီလီယံကို ဘာစီလိုနာက အသည်းအသန်စိတ်ဝင်စားခဲ့ပေမယ့် ကစားသမားက ဘီလ်ဘာအိုမှာဆက်နေခဲ့တာဖြစ်ပါတယ်။

တိုင်းမ်စ်သတင်းဌာနကတော့ အာဆင်နယ်ဟာ ဝီလီယံကိုနွေရာသီမှာ အရခေါ်ယူဖို့ လုပ်ဆောင်လာပြီး ဘာတာက ကစားသမားရဲ့အေးဂျင့်နဲ့တွေ့ဆုံနေတယ်လို့ ဖော်ပြခဲ့ပါတယ်။ ဒါပေမယ့် ဂါးဒီးယန်းသတင်းဌာနကတော့ စပိန်သားကို အာဆင်နယ်တစ်သင်းတည်းက ဆွဲဆောင်နေတာမဟုတ်ပဲ ချဲလ်ဆီး ၊ ဘာစီလိုနာ နဲ့ ဘိုင်ယန်တို့ကလည်း ပစ်မှတ်ထားနေတယ်လို့ ဖော်ပြခဲ့ပါတယ်။

ဝီလီယံဟာ ဒီရာသီဘီလ်ဘာအိုအတါက် ၄ ဂိုးသွင်း ၊ ၅ ဂိုးဖန်တီးထားနိုင်ခဲ့ပြီး ရာသီအစောပိုင်းကိုတော့ ဒဏ်ရာကြောင့် လွဲချော်ခဲ့ပါတယ်။ အာဆင်နယ်ဟာ ဈေးကွက်ထဲမှာ နောက်ထပ်စွယ်စုံရတိုက်စစ်မှူးတစ်ဦးရှာဖွေနေဆဲဖြစ်ပါတယ်။ပြီးခဲ့တဲ့အပတ်တုန်းက အာဆင်နယ်ဟာ အီဆက်အစား အခြားပစ်မှတ်ကိုပြောင်းလဲလာတယ်လို့ သိရပါတယ်။

အာဆင်နယ်ဟာ တိုက်စစ်ပိုင်းအတွက် အီဆက်အပြင် စပို့တင်းတိုက်စစ်မှူး ဗစ်တာဂရိုကီရက်စ်ကို ချိတ်ဆက်နေတယ်လို့ သိရပါတယ်။ ဂရိုကီရက်စ် နဲ့ စပို့တင်းတို့ကြား စာချုပ်ဖျက်သိမ်းကြေးက ပေါင် ၈၃ သန်းရှိနေပေမယ့် အနည်းဆုံးပေါင် ၆၃ သန်းရရင်ရောင်းထုတ်ဖွယ်ရှိနေပါတယ်။