သတင်းတွေအရ ဘာစီလိုနာအသင်းဟာ ယူနိုက်တက်စတား ရက်ရှ်ဖို့ဒ်ကိုခေါ်ယူဖို့ အူနိုင်းဟာနန်ဒက်ဇ်ကို ရောင်းထုတ်ဖို့ ပြင်ဆင်နေပြီး နီးစပ်နေတယ်လို့ သိရပါတယ်။ ရက်ရှ်ဖို့ဒ်အခြေအနေက ယူနိုက်တက်မှာ ရှင်းလင်းနေပြီဖြစ်ကာ လူစာရင်းထဲမှာမပါပဲ ဆက်နေမလား ဒါမှမဟုတ် အသင်းကနေထွက်ခွာမလားဆိုတာ ဆုံးဖြတ်ရမှာဖြစ်ပါတယ်။

အင်္ဂလန်သားဟာ ဒီဇင်ဘာဒုတိယအပတ်ကတည်းက ယူနိုက်တက်အသင်းလူစာရင်းမှာ မပါဝင်တော့တာဖြစ်ပြီး အေစီမီလန် ၊ ဒေါ့မွန် နဲ့ ဘာစီလိုနာတို့က ချိတ်ဆက်နေပါတယ်။ ဘာစီလိုနာဘက်က အင်္ဂလန်သားကိုခေါ်ယူနိုင်ဖို့ ကစားသမားတွေအရင်ရှင်းထုတ်ဖို့ လိုအပ်နေပါတယ်။ ဘာစီလိုနာဟာ အသက် ၁၈ နှစ်သား ဟာနန်ဒက်ဇ်ကို ဆော်ဒီလိဂ်ကလပ် အယ်လ်-ဟီလယ်အသင်းထံ ပေါင် ၃.၃ သန်းနဲ့ရောင်းထုတ်ဖို့ ပြင်ဆင်နေပါတယ်။

ဘာစီလိုနာအနေနဲ့ ယူနိုက်တက်စတားကိုခေါ်ယူနိုင်ဖို့ဆိုရင် လုပ်ခလစာ ပေါင် ၅ သန်းလောက်ရှာဖွေဖို့ လိုအပ်နေပါတယ်။ တကယ်လို့ ဟာနန်ဒက်ဇ်အပြောင်းအရွှေ့ဖြစ်လာခဲ့မယ်ဆိုရင်တော့ ဘာစီလိုနာအနေနဲ့ ရက်ရှ်ဖို့ဒ်ကို ခေါ်ယူနိုင်မှာဖြစ်ပါတယ်။ ရက်ရှ်ဖို့ဒ်အနေနဲ့ ဘာစီလိုနာကိုပြောင်းဖြစ်မယ်ဆိုရင် ပုံမှန်နေရာရဖို့အတွက် လီဝန်ဒေါစကီး ၊ ယာမဲလ် ၊ ရာဖင်ဟာတို့နဲ့အားပြိုင်ရဖွယ်ရှိနေပါတယ်။ ဒါ့အပြင် အရန်ခုံမှာလည်း ဖာရန်တောရက်စ် ၊ ဗစ်တာ ၊ အိုလ်မို နဲ့ လိုပက်ဇ်တို့ရှိနေတာကြောင့် အားပြိုင်မှုတွေလုပ်ရမှာဖြစ်ပါတယ်။