ဘာစီလိုနာဟာ မန်ချက်စတာယူနိုက်တက်တောင်ပံကြယ်ပွင့် မားကပ်စ်ရက်ရှ်ဖို့ဒ်ကို အငှားစာချုပ်နဲ့ခေါ်ယူပြီးနောက် ယခုနွေရာသီအပြောင်းအရွှေ့ကာလအတွင်း နောက်ထပ်ကစားသမားသစ်ထပ်မံခေါ်ယူတော့မှာမဟုတ်ကြောင်း ပြောကြားလာခဲ့ပါတယ်။ ကလပ်ဥက္ကဌ ဂျိုအန်လာပေါ်တာက ဘာစီလိုနာဟာ နောက်ထပ်ကစားသမားသစ်ထပ်မံခေါ်ယူဖို့ အစီအစဉ်မရှိကြောင်းနဲ့ ကစားသမားလိုအပ်ချက်ရှိပါက လာမာစီယာအကယ်ဒမီမှ လူငယ်လေးတွေကို ထုတ်သုံးသွားမယ်လို့ ပြောကြားခဲ့ပါတယ်။ 

ယခုနွေရာသီအတွင်း ဘာစီလိုနာဟာ အက်စ်ပန်ညိုဂိုးသမား ဂျိုအန်ဂါစီယာကို ခေါ်ယူထားပြီး ဂါစီယာဟာ လက်ရှိဂိုးသမားတွေဖြစ်တဲ့ တာစတီဂန်နဲ့ ဆက်ဇနီတို့ကိုကျော်ဖြတ်ပြီး အသင်းရဲ့နံပါတ် ၁ ဂိုးသမားဖြစ်လာနိုင်ချေရှိတယ်လို့သိရပါတယ်။ ထို့နောက် ဘာစီလိုနာဟာ ဘီလ်ဘာအိုကြယ်ပွင့် နီကိုဝီလီယမ်၊ အေစီမီလန်တောင်ပံကစားသမား ရာဖေးလ်လီယာအိုနဲ့ လီဗာပူးတိုက်စစ်မှူး လူးဝစ်ဒီယက်ဇ်တို့ကိုခေါ်ယူနိုင်ချေရှိတယ်လို့ သတင်းတွေကျယ်ကျယ်ပြန့်ပြန့်ထွက်ပေါ်ခဲ့ပေမယ့် ယူနိုက်တက်မှရက်ရှ်ဖို့ဒ်ကိုသာ အငှားနဲ့ခေါ်ယူနိုင်ခဲ့ပါတယ်။ 

ယခုအခါမှာလာပေါ်တာက "သေချာတာတစ်ခုကတော့ နောက်ထပ်ကစားသမားသစ်ခေါ်ယူမှု မရှိတော့ပါဘူး။ ကျွန်တော်တို့မှာ ကစားသမားအလုံအလောက်ရှိနေပြီး နည်းပြကလည်း လိုအပ်တဲ့လူစာရင်းကို ပိုင်ဆိုင်နေပါပြီ။ အသင်းကနေ ကစားသမားကောင်းတွေ မဆုံးရှုံးရဖို့မျှော်လင့်ပါတယ်။ လက်ရှိအသင်းရဲ့ကစားသမားတွေအားလုံးက အသင်းအတွက်အရေးပါကြပါတယ်။ ဒါပေမယ့် ကစားသမားထွက်ခွာမှုရှိမရှိကတော့ နည်းပြနဲ့ အားကစားဒါရိုက်တာ ဒီကိုတို့အပေါ်မူတည်ပါတယ်" လို့ပြောကြားခဲ့ပါတယ်။ 

နောက်ထပ်ကစားသမားသစ်ခေါ်ယူမှုရှိတော့မှာမဟုတ်လို့ နည်းပြဟန်ဆီဖလစ်အနေနဲ့ လက်ရှိလူစာရင်းကိုအကောင်းဆုံးတည်ဆောက်ပြီး ရာသီကြိုပွဲစဉ်တွေမှာ အသင်းရဲ့စွမ်းဆောင်ရည်ကို တိုးတက်အောင်ပြုလုပ်သွားရမှာဖြစ်ပါတယ်။ ရာသီကြိုပွဲစဉ်တွေမှာတော့ ဘာစီလိုနာဟာ ဗစ်ဆဲလ်ကိုဘီ၊ ဆိုးလ်အက်ဖ်စီ၊ ဒေဂူးတို့နဲ့ ယှဉ်ပြိုင်သွားရပါမယ်။