ဆန်းဒါးလန်းနဲ့ သရေကျပြီးနောက် နာကျင်နေကြာင်း ဖွင့်ဟလာတဲ့ အာတီတာ
အာဆင်နယ်နည်းပြ အာတီတာက ယနေ့နံနက် ဆန်းဒါးလန်းနဲ့ ၂-၂ သရေကျခဲ့တဲ့အတွက် နာကျင်မှုခံစားရကြောင်း ပြောကြားခဲ့ပါတယ်။ ဒီရလဒ်ကတော့ ချန်ပီယံဆုအတွက် ပြိုင်ပွဲကို အသက်ပြန်သွင်းပေးလိုက်နိုင်ပါတယ်။ ဘရိုင်ယန်ဘရော့ဘီ ရဲ့ အချိန်ပို ၄ မိနစ်မှာ သွင်းယူခဲ့တဲ့ဂိုးဟာ အာဆင်နယ်ရဲ့ လိဂ်ပွဲ ငါးပွဲဆက် အနိုင်ရနေတဲ့ စံချိန်ကို ရပ်တန့်စေခဲ့ပါတယ်။ ဒါ့အပြင် ပြိုင်ပွဲစုံ ၁၀ ပွဲဆက် အနိုင်ရတဲ့ စံချိန်လည်း ရပ်သွားခဲ့တာပါ။
ပွဲအပြီးမှာ အာတီတာက"ကျွန်တော့် ဗိုက်ထဲက နာကျင်မှုကို ခံစားရတယ်ဗျာ။ ကျွန်တော် ဂိုးပေးရတာကို မလိုချင်ဘူး။ အဲဒါက ဂိုးပေးလိုက်ရတယ်၊ ပြီးတော့ ပွဲကို ခက်ခဲတဲ့ အခြေအနေမှာ ရောက်သွားစေခဲ့တယ်။"လို့ ပြောခဲ့ပါတယ်။ ဆက်လက်ပြီး အာတီတာက"နောက်ဆုံး ခံစားချက်ကတော့ စိတ်ပျက်တာနဲ့ စိတ်တိုတာပါပဲ။ ဘာလို့လဲဆိုတော့ ကျွန်တော်တို့ သုံးမှတ် လိုချင်ခဲ့တာလေ။ ကျွန်တော်တို့ တကယ် ခက်ခဲတဲ့ပွဲကို ဖြတ်ကျော်ဖို့ ကြိုးစားခဲ့ရတယ်။ ကျွန်တော်တို့ သိပါတယ်၊ (သူတို့က) အရမ်းကို နှောင့်ယှက်တယ်။ ကျွန်တော်တို့ ရှင်းရတာ ခက်တဲ့ အခြေအနေတွေကို ဖြေရှင်းဖို့ ကြိုးစားခဲ့ရတယ်။ သူတို့ ကောင်းကောင်း ကစားခဲ့တယ်၊ ကျွန်တော်တို့ရဲ့ စံနှုန်းမဟုတ်တဲ့ ဂိုးကို ပေးလိုက်ရတယ်။ အဲဒီနောက်မှာတော့ ကျွန်တော့်ထင်တယ်၊ အသင်းက တုံ့ပြန်မှု ကောင်းကောင်း လုပ်နိုင်ခဲ့တယ်။ ကျွန်တော်တို့ စိတ်ဓာတ်ခိုင်မာမှုနဲ့ ရဲစွမ်းသတ္တိ ကို ပြသခဲ့တယ်၊ ပထမဂိုး သွင်းခဲ့တယ်၊ ဒုတိယဂိုး သွင်းခဲ့တယ်၊ ပြီးတော့ ပွဲကို လုံးဝ လွှမ်းမိုးထားနိုင်ခဲ့တယ်။
အဲဒီနောက် သူတို့က ဂိုးဧရိယာထဲကို ကစားသမား ခြောက်ယောက်၊ ခုနစ်ယောက်လောက် ထည့်ပြီး ကစားလာတဲ့အခါမှာတော့ ကိုယ့်ရဲ့ ခံစစ်ကိုပဲ အားကိုးရတော့တယ်။ ဒါက ဘောလုံးတိုက်ရိုက်ကစားတာကနေပဲ ဖြစ်ဖြစ်၊ လက်ပစ်ဘောကနေပဲ ဖြစ်ဖြစ်၊ ဘယ်အခြေအနေကနေပဲ ဖြစ်ဖြစ် လာနိုင်တယ်။အဲဒီ လုပ်ရပ်ကို ကျွန်တော်တို့ ပိုကောင်းအောင် ကာကွယ်နိုင်ပါတယ်။ ဒီနေ့တော့ ကျွန်တော်တို့ မလုပ်နိုင်ခဲ့ဘူး၊ ဒါကြောင့် ဂိုးပေးလိုက်ရတယ်"လို့ ရှင်းပြခဲ့ပါတယ်။
