အာဆင်နယ်နည်းပြ မီခေးလ်အာတီတာသည် အမ်းမရိတ်စ်ကွင်းတွင် နွေရာသီအပြောင်းအရွှေ့တစ်ခုအတွက် ဆုံးဖြတ်ချက်မချမီ ရီးရဲလ်မက်ဒရစ်မန်နေဂျာ ဇာဘီအလွန်ဆိုနှင့် သူ့ရဲ့ ရင်းနှီးသောဆက်ဆံရေးကို အသုံးချခဲ့ပါတယ်။

မီခေးလ်အာတီတာက အာဆင်နယ်ရဲ့ နွေရာသီအပြောင်းအရွှေ့များထဲမှ တစ်ခုကို မပြီးမြောက်မီ ရီးရဲလ်မက်ဒရစ်နည်းပြ ဇာဘီအလွန်ဆိုထံမှ အကြံဉာဏ်ရယူခဲ့ကြောင်း ဖွင့်ဟပြောကြားလိုက်ပါတယ်။ စပိန်လူမျိုးနည်းပြဟာ အပြောင်းအရွှေ့ကာလနှောင်းပိုင်းတွင် ပီယာရိုဟင်ကာပီကို မခေါ်ယူမီ သူ့ရဲ့သူငယ်ချင်းထံ ဆက်သွယ်ခဲ့ခြင်းဖြစ်ပါတယ်။

အာဆင်နယ်အသင်းဟာ ဟင်ကာပီကို ဘိုင်ယန်လေဗာကူဆင်အသင်းမှ ကနဦး အငှားစာချုပ်ဖြင့် ခေါ်ယူခဲ့ပါတယ်။ ကီဝီယာ အသင်းမှ ထွက်ခွာသွားချိန်တွင် သူရောက်ရှိလာခဲ့ပြီး အဆိုပါသဘောတူညီချက်တွင် အီကွေဒေါလက်ရွေးစင်ကစားသမားကို ပေါင် ၄၅ သန်းဖြင့် အပြီးသတ်ဝယ်ယူခွင့်လည်း ပါဝင်နေပါတယ်။

ဟင်ကာပီက ကနဦးတွင် ဂါဘရီယယ် မာဂယ်ဟေးစ်နှင့် ဝီလီယံဆာလီဘာတို့အား ပံ့ပိုးပေးရမှာဖြစ်သော်လည်း အီကွေဒေါလက်ရွေးစင်ကစားသမားက ဂန်းနားတို့အတွက် ရေရှည်ရင်းနှီးမြှုပ်နှံမှုတစ်ခု ဖြစ်လာနိုင်ကာ အာတီတာက အသက် ၂၃ နှစ်အရွယ် ကစားသမားနှင့်ပတ်သက်၍ အတွင်းကျကျ သိရှိလိုခဲ့သည်မှာ အံ့ဩစရာမဟုတ်ပါဘူး။

သူ့ရဲ့ ကလပ်ကစားသမားဘဝ ပွဲပေါင်း ၁၉၇ ပွဲတွင် ၁၂၁ ပွဲမှာ လီဗာပူးကွင်းလယ်ကစားသမားဟောင်း အလွန်ဆိုရဲ့ လက်အောက်တွင် ကစားခဲ့ခြင်းဖြစ်ရာ အဆိုပါနောက်ခံလူအကြောင်းကို အလွန်ဆိုလောက် ကောင်းစွာသိမည့်သူ နည်းပါးလိမ့်မယ်။ အလွန်ဆိုက ကောင်းမွန်သော ထောက်ခံချက်တစ်ခု ပေးခဲ့သည်မှာလည်း ရှင်းနေပါတယ်။

လေဗာကူဆင်မန်နေဂျာဟောင်းကို ဆက်သွယ်ခဲ့ခြင်းနှင့် ပတ်သက်၍ အာတီတာက "ဟုတ်ကဲ့၊ သေချာပေါက်ပဲ၊ ကျွန်တော် ဆက်သွယ်ခဲ့ရပါတယ်။ ဆိုလိုတာက ကျွန်တော် အရမ်းသိကျွမ်းတဲ့၊ ယုံကြည်ရတဲ့၊ သူ့ကို နှစ်အနည်းငယ်ကြာ ကိုင်တွယ်ခဲ့တဲ့ သူ့လိုလူတစ်ယောက်ဆီကပါ"

"ဒါက ရရှိဖို့ အရမ်း အရမ်းကို တန်ဖိုးရှိတဲ့ သတင်းအချက်အလက်ပါပဲ။ သူက အကြောင်းပြချက်အမျိုးမျိုးကြောင့် ဟင်ကာပီကို အရမ်းကို ချီးကျူးပြောဆိုခဲ့ပြီး ဒါက ကျွန်တော်မြင်တွေ့ခဲ့တာတွေကို အတည်ပြုနိုင်ဖို့ ကောင်းမွန်ခဲ့ပါတယ်"

"ပြီးတော့ အဲ့ဒီစကားပြောဆိုမှုကနေ ခင်ဗျား သိရှိလာခဲ့တဲ့ အရာတချို့က ခင်ဗျား အရင်က သိပ်သတိမထားမိခဲ့တာမျိုးတွေ ဖြစ်နိုင်ပါတယ်" လို့ အာတီတာက ပြောပါတယ်။

သို့သော် ဟင်ကာပီအတွက် ကောင်းမွန်သော ကစားသမားဘဝအစတစ်ခုတော့ မဟုတ်ခဲ့ပေ။ နေရာစုံကစားနိုင်တဲ့ နောက်ခံလူဟာ ကလပ်အတွက် တစ်မိနစ်တည်းသာ ကစားထားရသေးပြီး ပေါင်ခြံဒဏ်ရာ ခံစားခဲ့ရပါတယ်။

မည်သို့ပင်ဖြစ်စေ ဟင်ကာပီဟာ ဖူလ်ဟမ်နှင့်ပွဲမတိုင်မီ လေ့ကျင့်ခန်းပြန်ဆင်းနေပြီ ဖြစ်ပြီး အာတီတာက သူ့ရဲ့ ပြန်လာမှုအတွက် စိတ်လှုပ်ရှားနေပါတယ်။

"သူ ဒီနေ့ ကျွန်တော်တို့နဲ့အတူ လေ့ကျင့်ခန်းပြန်ဆင်းပါလိမ့်မယ်။ အရာအားလုံး အဆင်ပြေတယ်ဆိုရင် သူ ကစားဖို့ အသင့်ဖြစ်နေပါလိမ့်မယ်။ သူက ကျွန်တော်တို့ကို အများကြီး ကူညီပေးမယ့် ကစားသမားတစ်ယောက်ပါ၊ သူက အသင်းအတွက် မတူညီတဲ့အရာတစ်ခုကို ယူဆောင်လာပေးပါလိမ့်မယ် ပြီးတော့ ကျွန်တော်တို့ သူ့ကို အရှိန်ရအောင် လုပ်ပေးဖို့ လိုအပ်ပါတယ်" 

"ခင်ဗျား မြင်တွေ့ရမယ့်အရာက သူ့ရဲ့ ပြင်းထန်မှု၊ သူ့ရဲ့ စိတ်ပိုင်းဖြတ်မှုပါပဲ။ သူက အထူးသဖြင့် ခံစစ်ကစားရာမှာ လှုပ်ရှားမှုတိုင်းကို အားကုန်သုံး ကစားတဲ့ ကစားသမားတစ်ယောက်ပါ"

"ပြီးတော့ ဘောလုံးနဲ့အတူဆိုရင်၊ သူက ဘယ်ခြမ်းဗဟိုနောက်ခံလူ အဖြစ် ကစားသည်ဖြစ်စေ၊ နောက်တန်းအစွန်လူ အဖြစ် ကစားသည်ဖြစ်စေ ဘောလုံးနဲ့ပတ်သက်ရင် အလွန်သေသပ်တဲ့ ကစားသမားတစ်ယောက်ပါ"

"နောက်တစ်ချက်က သူက ဘောလုံးနဲ့ဖြစ်ဖြစ်၊ သူ့ရဲ့နေရာယူပုံနဲ့ဖြစ်ဖြစ် တကယ်ကို ထိုးဖောက်လိုစိတ်ရှိတဲ့သူတစ်ယောက်ဖြစ်ပြီး အသင်းဆီကို မတူညီတဲ့ စရိုက်လက္ခဏာနဲ့ စိတ်ခံစားမှုကို ယူဆောင်လာပေးပါလိမ့်မယ်" လို့ နည်းပြက ပြောပါတယ်။