အာဆင်နယ်ကြယ်ပွင့် နောက်ခံလူ ဂါဘရီရယ်မက်ဂါဟေးစ်ဟာ ဖူလ်ဟမ်နဲ့ပွဲမှာ ရရှိခဲ့တဲ့ တံကောက်ကြောဒဏ်ရာပြဿနာကို ခွဲစိတ်ကုသမှုခံယူသွားရမှာဖြစ်လို့ ရာသီကုန်အထိ အနားယူသွားရမှာဖြစ်တယ်လို့ သိရပါတယ်။ အသက်-၂၇ နှစ်အရွယ်နောက်ခံလူဟာ ပွဲအစမှာပဲ အဆိုပါဒဏ်ရာကို ရရှိခဲ့တာဖြစ်ပြီး ၁၆ မိနစ်မှာ ယာကော့ဘ်ကီဝီအောနဲ့ လူစားလဲခံခဲ့ရပါတယ်။ အဆိုပါပွဲစဉ်မှာ အာဆင်နယ်ဟာ ဖူလ်ဟမ်ကို ၂-၁ နဲ့အနိုင်ရခဲ့ပေမယ့် ပွဲအပြီးမှာ နည်းပြမီခေးလ်အာတီတာက ဂါဘရီရယ်ရဲ့ဒဏ်ရာဟာ စိုးရိမ်စရာအခြေအနေမှာရှိနေကြောင်း ဝန်ခံပြောကြားခဲ့ပါတယ်။ 

သောကြာနေ့မှာတော့ အာဆင်နယ်က "ဂါဘရီရယ်ရဲ့တံကောက်ကြောဒဏ်ရာကို လာမယ့်ရက်ပိုင်းအတွင်းမှာပဲ ခွဲစိတ်ကုသသွားမှာဖြစ်ပါတယ်။ ပြန်လည်ထူထောင်ရေးနဲ့ ကြံ့ခိုင်မှုတည်ဆောက်ရေးလုပ်ငန်းစဉ်တွေက ကြာမြင့်နိုင်လို့ နောက်ရာသီအစလောက်မှပဲ အဆင်သင့်ဖြစ်မယ်လို့ယူဆရပါတယ်။ အသင်းမှာရှိတဲ့လူတိုင်း ဂါဘရီရယ်ရဲ့ဒဏ်ရာ အမြန်ဆုံးပြန်လည်ကောင်းမွန်လာစေဖို့ တွန်းအားပေး ကူညီသွားရပါမယ်" လို့အတည်ပြုထုတ်ပြန်ခဲ့ပါတယ်။

အခုလို အားထားရတဲ့ဗဟိုနောက်ခံလူ ဒဏ်ရာရရှိသွားခဲ့ခြင်းက အာဆင်နယ်အတွက် ကြီးမားတဲ့ ထိုးနှက်ချက်တစ်ခုဖြစ်လာဖို့ရှိနေပါတယ်။ ဒီရာသီမှာ အာဆင်နယ်ဟာ လီဗာပူးနဲ့အပြိုင် ပရီးမီးယားလိဂ်ဆုဖလားကို စိန်ခေါ်နိုင်ခဲ့ပေမယ့် အဓိက ကစားသမားတွေ မကြာခဏဒဏ်ရာရနေခဲ့လို့ နောက်ကောက်ကျ ကျန်နေခဲ့ရတာဖြစ်ပါတယ်။ တိုက်စစ်မှူးတွေဖြစ်တဲ့ ကိုင်ဟားဗတ်ဇ်နဲ့ ဂါဘရီရယ်ဂျီးဆပ်တို့က ရာသီကုန်အထိ အနားယူသွားရဖို့ရှိနေသလို၊ ဘူကာယိုဆာကာ၊ မာတင်အိုဒီဂတ်၊ ဘန်ဝှိုက်နဲ့ ဂါဘရီရယ်မာတင်နယ်လီတို့ကလည်း ဒဏ်ရာပြဿနာတွေကြောင့် ကာလရှည် အနားယူခဲ့ကြရတာဖြစ်ပါတယ်။  

လာမယ့်စနေနေ့မှာ အာဆင်နယ်ဟာ ပရီးမီးယားလိဂ်ပွဲစဉ်အဖြစ် အဲဗာတန်ကို ဂူဆင်ပါ့ခ်မှာ သွားရောက်ရင်ဆိုင်ရမှာဖြစ်ပြီး အဆိုပါပွဲစဉ်အပြီး ဧပြီလ ၉ ရက်နေ့မှာတော့ ချန်ပီယံလိဂ်ကွာတားဖိုင်နယ် ပထမအကျော့ပွဲစဉ်အဖြစ် ရီးရဲလ်မက်ဒရစ်နဲ့ ယှဉ်ပြိုင်သွားရပါမယ်။