အက်စတွန်ဗီလာကို နှစ်ကျော့စလုံးရှုံးနိမ့်ခဲ့ခြင်းသည် ပြီးခဲ့သည့်ရာသီ ပရီးမီးယားလိဂ်ဖလားပြိုင်ပွဲတွင် အာဆင်နယ် အောင်မြင်မှုမရရှိခဲ့သည့် အဓိကအကြောင်းအရင်းတစ်ခုဖြစ်ခဲ့ပြီး နည်းပြ မီကယ်အာတီတာသည် သြဂုတ်လတွင် ဗီလာပန်းခြံ၌ အနိုင်ရရှိခဲ့သော်လည်း အူနိုင်းအမ်မရီ၏အသင်းကို ပေါ့ပေါ့ဆဆမမှတ်ယူထားကြောင်း ပြောကြားခဲ့သည်။

အမှတ်ပေးဇယား အဆင့် ၇ တွင် ရပ်တည်နေသော ဗီလာသည် ပြိုင်ပွဲစုံ သုံးပွဲဆက် အနိုင်ရရှိထားပြီး အာဆင်နယ်သည် အဆင့် ၂ နေရာကနေ ဦးဆောင်သူ လီဗာပူးကို ဖိအားပေးရန် စနေနေ့တွင့်အိမ်ကွင်း၌ လက်ခံကစားရမည်ဖြစ်သည်။

"သူတို့က ကောင်းမွန်တဲ့အသင်းတစ်သင်းပါ။ ဒါကြောင့်ပြီးခဲ့တဲ့ရာသီက ကျွန်တော်တို့ကို အနိုင်ရခဲ့တာပါ" 
"သူတို့ဘယ်လိုအသင်းမျိုးလဲဆိုတာရဲ့ ခက်ခဲမှုကို ကျွန်တော်တို့သိပါတယ်။ ဒါကြောင့် သူတို့က ဒီလောက်ကောင်းကောင်း ကစားနိုင်တာပါ။ အရမ်းကောင်းတဲ့ ကစားသမားတွေနဲ့ အရမ်းကောင်းတဲ့ နည်းပြရှိပါတယ်"ဟု အာတီတာက သတင်းထောက်များကို သောကြာနေ့တွင် ပြောကြားခဲ့သည်။

အာတီတာက ဗုဒ္ဓဟူးနေ့တွင် တော့တင်ဟမ်ဟော့ကို ၂-၁ ဂိုးဖြင့် အနိုင်ရရှိပြီးနောက် လီဗာပူးနှင့် ၎င်းတို့၏ ကွာဟချက်ကို လျှော့ချနိုင်ခဲ့သည့်အတွက် ဝမ်းသာကြောင်း ပြောကြားခဲ့ပြီး  ဦးဆောင်သူဖြစ်သော လီဗာပူးသည် နော်တင်ဟမ်ဖောရက်စ်နှင့် သရေကျခဲ့သည်။

"ကျွန်တော်တို့က အနိုင်ရဖို့ ကစားနေတာပါ။ ဒါက ကျွန်တော်တို့ရောက်ချင်တဲ့နေရာအတိအကျပါပဲ။ ဖိအားက အတွင်းကနေလာတာပါ။ ဖြစ်နိုင်သမျှ အကောင်းဆုံးဖြစ်ဖို့ ကြိုးစားရပါမယ်" ဟု အာတီတာက ပြောကြားခဲ့သည်။ နည်းပြက ဇန်နဝါရီလတွင် တိုက်စစ်မှူးတစ်ဦး ခေါ်ယူခြင်းသည် ၎င်းတို့အသင်းကို အားဖြည့်ပေးနိုင်မည်ဟု ပြောကြားခဲ့သော်လည်း မည်သည့်ကစားသမားကို ခေါ်ယူရန် နီးစပ်နေပြီလားဟု ပြောကြားရန် ငြင်းဆိုခဲ့သည်။

"ကျွန်တော်တို့က ဖြစ်နိုင်သမျှ အကောင်းဆုံး ဖြေရှင်းနည်းကို တက်ကြွစွာ ရှာဖွေနေပါတယ်။ ဒါပေမယ့် ကျွန်တော်တို့ ဘာလုပ်နိုင်မလဲဆိုတာကို စောင့်ကြည့်ရပါမယ်" ဟု အာတီတာက ထပ်လောင်းပြောကြားခဲ့သည်။