အာဆင်နယ်ဟာ အသင်းရဲ့တိုက်စစ်ပိုင်းလိုအပ်ချက်ကိုဖြည့်ဆည်းဖို့ ဥရောပတဝှမ်း ကြယ်ပွင့်တိုက်စစ်မှူးတွေကို ပစ်မှတ်ထားနေပြီး လာမယ့်နွေရာသီမှာတော့ စပို့တင်းလစ္စဘွန်းတိုက်စစ်မှူး ဗစ်တာဂျိုကာရက်စ်ကို ခေါ်ယူဖို့ အဓိက စိတ်ဝင်စားနေတယ်လို့သိရပါတယ်။ 

အာဆင်နယ်ရဲ့အားကစားဒါရိုက်တာသစ် အန်ဒရီယာဘာတီကလည်း အသင်းအနေနဲ့ နယူးကာဆယ်တိုက်စစ်မှူး အလက်ဇန်းဒါးအီဆက်ကို ခေါ်ယူမယ့်အစား ဂျိုကာရက်စ်ကိုခေါ်ယူတာက ဘဏ္ဍာရေးအခြေအနေအတွက်လည်း အဆင်ပြေစေမယ်လို့ ရှုမြင်ထားတာဖြစ်ပါတယ်။ တစ်ချိန်တည်းမှာပဲ အာဆင်နယ်ဟာ လိုက်ပ်ဇစ်တိုက်စစ်မှူး ဘင်ဂျမင်ဆက်ဆခိုအပြင် အခြားတိုက်စစ်မှူးတွေကိုလည်း စောင့်ကြည့်နေတယ်လို့ သတင်းတွေထွက်ပေါ်နေပါတယ်။ 

ဂျိုကာရက်စ်ဟာ စပို့တင်းလစ္စဘွန်းအတွက် ပြိုင်ပွဲစုံ ၉၂ ပွဲကစားထားရာမှာ ၈၅ ဂိုးအထိသွင်ယူထားနိုင်တာကြောင့် အာဆင်နယ်ရဲ့တိုက်စစ်အတွက် အားထားရတဲ့ တိုက်စစ်မှူးဖြစ်လာဖို့ရှိနေပါတယ်။ ပေါ်တူဂီကလပ်နဲ့ ၂၀၂၈ ခုနှစ်အထိ စာချုပ်သက်တမ်းကျန်ရှိနေသေးတဲ့ ဂျိုကာရက်စ်ကိုခေါ်ယူဖို့ အာဆင်နယ်အနေနဲ့ ငွေကြေးဘယ်လောက်အထိ ကုန်ကျသွားနိုင်မလဲဆိုတာတော့ အခုချိန်အထိ ရှင်းရှင်းလင်းလင်းမသိရှိရသေးပါဘူး။ 

ဂိုးသွင်းစက်တစ်ခုလို အလုပ်လုပ်နေတဲ့ ဂျိုကာရက်စ်ဟာ စပို့တင်းလစ္စဘွန်းအတွက်ကစားထားတဲ့ နောက်ဆုံး ၅ ပွဲမှာ ၈ ဂိးအထိသွင်းယူထားသလို၊ ပေါ်တူဂီလိဂ်မှာလည်း ၂၆ ပွဲမှာ ဂိုး ၃၀ အထိသွင်းယူထားပါတယ်။ ဒါ့အပြင် ဆွီဒင်လက်ရွေးစင်ဟာ ချန်ပီယံလိဂ်မှာလည်း ၈ ပွဲကစား ၆ ဂိုးအထိသွင်းယူနိုင်ခဲ့ပါတယ်။ 

ပေါ်တူဂီအမှတ်ပေးဇယားကို ထိပ်ဆုံးကနေဦးဆောင်ထားတဲ့ စပို့တင်းလစ္စဘွန်းဟာ လာမယ့်သောကြာနေ့မှာ ပြည်တွင်းဖလားပြိုင်ပွဲ ဆီမီးဖိုင်နယ်ပွဲစဉ်အဖြစ် ရီယိုအိဗ်နဲ့ ယှဉ်ပြိုင်သွားရမှာဖြစ်ပြီး အာဆင်နယ်ကတော့ ဗုဒ္ဓဟူးနေ့မှာ လန်ဒန်ဒါဘီအဖြစ် ဖူလ်ဟမ်နဲ့ကစားသွားရပါမယ်။