အန်းစလော့က ပရီးမီးယားလိဂ်ပြိုင်ပွဲမှာ ဗိုလ်စွဲဖို့ဆိုရင် လီဗာပူးအနေဖြင့် လွန်ခဲ့တဲ့သီတင်းပတ်နှစ်ပတ်ကျော်က နယူးကာဆယ်ကို ရှုံးနိမ့်ခဲ့တဲ့ ကာရာဘောင်ဖလားဗိုလ်လုပွဲကာလထက် ပိုမိုကြိုးစားအားထုတ်သွားရမယ်လို့ ပြောခဲ့ပါတယ်။

ကြိုးကြာနီတွေက သီတင်းပတ်နှစ်ပတ်ခန့်အနားရရှိပြီးနောက် အခုညပိုင်းမှာ အဲဗာတန်နဲ့ မာဆေးဆိုဒ်ဒါဘီပွဲစဉ်ကို ဆင်နွှဲသွားရပါမယ်။ လွန်ခဲ့တဲ့သီတင်းပတ်နှစ်ပတ်ကျော်ကာလမှာ လီဗာပူးက ပီအက်စ်ဂျီကို အရေးနိမ့်ကာ ချန်ပီယံလိဂ်ပြိုင်ပွဲမှထွက်ခွာခဲ့ရပြီး စိတ်ပျက်စရာတွေနဲ့ ကြုံတွေ့ခဲ့ရပါတယ်။အန်းစလော့ကတော့ အဲ့ဒီပွဲစဉ်တွေမှာ ရင်ဆိုင်ခဲ့ရတဲ့ ခက်ခဲမှုတွေကို အမှတ်ရပြီး ရာသီကုန်ကာလ၊ နောက်ဆုံးလက်ကျန်ကိုးပွဲမှာ အားသာချက်အဖြစ် အသုံးချရမယ်လို့ ဆိုပါတယ်။

အန်းစလော့က “ ပီအက်စ်ဂျီနဲ့ နယူးကာဆယ်ကို ဆက်တိုက်ရှုံးနိမ့်ချိန် ကျွန်တော်တို့အကြောင်း ဆူညံသံတွေ အနည်းငယ်ထွက်ပေါ်လာခဲ့ပါတယ်။ ကျွန်တော်ကတော့ အမြဲတမ်းလိုလို ဆင်ခြင်တုံတရားနဲ့ အခြေအနေကို အကဲဖြတ်သွားဖို့အတွက် ကြိုးစားပါတယ်။ အခုလိုအခြေအနေမျိုးတွေ အကြိမ်ပေါင်းများစွာ ဖြစ်မလာတော့ဘူးလို့ ကျွန်တော် ယူဆမိပါတယ်။

ဥရောပအဆင့်မှာ ရှစ်ပွဲတိတိအနိုင်ရရှိပြီး တစ်ပွဲတည်းရှုံးနိမ့်ခဲ့ပေမယ့် ကျွန်တော်တို့ ပြိုင်ပွဲမှထွက်ခွာခဲ့ရပါတယ်။ ကျွန်တော်ကိုယ်တိုင်လည်း နည်းနည်းတော့ စိတ်ပျက်သွားခဲ့ပါတယ်။ ဒါပေမယ့် ကာရာဘောင်းဖလားဖိုင်နယ်ကတော့ ကျွန်တော့်ကို ပိုပြီး စိတ်ပျက်မိစေပါတယ်။ ဘာကြောင့်လဲဆိုတော့ ဒီပွဲစဉ်က ကျွန်တော်တို့အတွက် ပထမဆုံးအကြိမ် ထိုက်ထိုက်တန်တန်ရှုံးနိမ့်ခဲ့တဲ့ပွဲစဉ်ဖြစ်နေလို့ပါပဲ။ ကျွန်တော်တို့အသင်းခံစစ်ပိုင်းမှာ လုံလောက်တဲ့ကောင်းမွန်မှုမျိုးမရှိသလို ဘောလုံးပိုင်ဆိုင်ထားချိန်မှာလည်း စွမ်းဆောင်ရည်တွေ မကောင်းမွန်ခဲ့ပါဘူး။

ချက်ချင်းဆိုသလိုပဲ ကစားသမားတွေက နိုင်ငံ့လက်ရွေးစင်အသင်းဆီ ရောက်ရှိသွားပြီး အရေးကြီးပွဲစဉ်တွေကို ကစားခဲ့ရပါတယ်။ သူတို့တွေအနက် အများစုကလည်း ဖြစ်ပျက်ခဲ့တဲ့အရာတွေကို မမေ့ပျောက်သွားခဲ့ပါဘူး။ သူတို့လည်း ကျွန်တော့်လိုပဲ ပထမဆုံးဆုဖလားနဲ့လွဲချော်သလို ချန်ပီယံလိဂ်ပြိုင်ပွဲမှထွက်ခွာခဲ့ရလို့ စိတ်ပျက်နေခဲ့ပါတယ်။

ဒါပေမယ့် သူတို့တွေက လက်တွေ့ကျပါတယ်။ ဥရောပအဆင့်ကိုးပွဲကစားရာမှာ ရှစ်ပွဲအနိုင်ရရှိပြီး ကံမကောင်းစွာနဲ့ဘဲ ပယ်နယ်တီအဆုံးအဖြတ်နဲ့ ရှုံးနိမ့်ကာ ထွက်ခွာခဲ့ရပါတယ်။ ဒီအဆင့်ကို ကျော်ဖြတ်နိုင်ဖို့ အစွမ်းကုန်အားထုတ်ခဲ့ကြလို့ ကစားသမားတွေကို ကျွန်တော် အပြစ်မတင်ပါဘူး။ ကာရာဘောင်းဖလားဖိုင်နယ်မှာတော့ ကျွန်တော်တို့တွေ အလုပ်ပိုကြိုးစားဖို့လိုအပ်ပြီး အဲ့ဒီပုံစံမျိုးက ကျွန်တော်ကြိုက်တဲ့အရာမျိုး မဟုတ်ဘူး”လို့ ပြောပါတယ်။

ဆက်လက်ပြီး အန်းစလော့က အခုနိုင်ငံတကာသီတင်းပတ်ဟာ သူ့အသင်းကို ကောင်းမွန်ခြင်းကမ္ဘာဆီ ခေါ်ဆောင်ပေးသွားလိမ့်မယ်လို့ ဆိုပါတယ်။ သူက “ အခုနိုင်ငံတကာသီတင်းပတ်ကတော့ ကျွန်တော် အကြိုက်ဆုံးအရာပါပဲ။ ကျွန်တော့်အတွက်လည်း အလိုအပ်ဆုံးအချိန် ဖြစ်နေခဲ့ပါတယ်။ ဒါပေမယ့် အရင်အချိန်နဲ့ လတ်တလောကာလအကြား ဘာကွာခြားမှုမှ မရှိပါဘူး။ ပရီးမီးယားလိဂ်ဖလား၊ ကာရာဘောင်ဖလား၊ လိဂ်ဖလားတွေကို အနိုင်ရရှိချင်တယ်ဆိုရင် ကမ္ဘာ့အကောင်းဆုံးကလပ်အသင်းတွေနဲ့ ယှဉ်ပြိုင်နိုင်စွမ်းရှိဖို့ လိုအပ်ပါတယ်။ ဒါကြောင့် အခုအချိန်မှာ အရှိန်ချပစ်လိုက်စရာအကြောင်းပြချက် လုံးဝမရှိသေးပါဘူး။ ကိုယ့်ရဲ့ပွဲစဉ်တွေတိုင်းကို ထိပ်တန်းပုံစံမျိုးနဲ့ အမြဲတမ်းဖြတ်သန်းရပါမယ်။ စက်တင်ဘာလပဲဖြစ်ဖြစ်၊ အောက်တိုဘာလပဲဖြစ်ဖြစ်၊ မတ်လပဲဖြစ်ဖြစ် အခုလက်ရှိရောက်ရှိနေတဲ့နေရာမှာ ရှိချင်ကြပါတယ်။ ဧပြီ၊ မေမှာလည်း ရှိချင်ကြတာပါပဲ”လို့ ဆက်ပြောပါတယ်။

လီဗာပူးအသင်းအနေဖြင့် အန်းစလော့ပြောခဲ့သလို လက်ရှိရောက်နေတဲ့နေရာမှာ ဆက်ရှိနေဖို့အတွက် နောက်ဆုံးလိဂ်ကိုးပွဲဆက်ရှုံးပွဲမရှိဖြတ်သန်းထားတဲ့ ဒေးဗစ်မိုရက်စ်ရဲ့အဲဗာတန်နဲ့ ခက်ခဲတဲ့စမ်းသပ်မှုတစ်ခုကို ရင်ဆိုင်သွားရပါလိမ့်မယ်။ ကြိုးကြာနီတွေက လက်ကျန်ကိုးပွဲမှာ ၁၆ မှတ်စုဆောင်းနိုင်မယ်ဆိုရင် အမှတ်ပေးချန်ပီယံအဖြစ် အောင်ပွဲခံနိုင်ပါလိမ့်မယ်။