ဗုဒ္ဓဟူးနေ့နံနက်က ယှဉ်ပြိုင်ခဲ့တဲ့ တောင်အမေရိကဇုန် ကမ္ဘာ့ဖလားခြေစစ်ပွဲစဉ်မှာ လက်ရှိချန်ပီယံအာဂျင်တီးနားဟာ အစဉ်အလာပြိုင်ဘက် ဘရာဇီးကို အိမ်ကွင်းမှာဧည့်ခံကစားခဲ့ပြီး ၄-၁ နဲ့သက်တောင့်သက်သာ ဂိုးပြတ်အနိုင်ယူကာ အုပ်စုကို လွတ်လွတ်ကျွတ်ကျွတ်ဆက်လက်ဦးဆောင်နိုင်ခဲ့ပါတယ်။ 

လီယွန်နယ်မက်ဆီနဲ့ လော်တာရိုမာတီနက်ဇ်တို့လို အဓိကတိုက်စစ်ကစားသမားတွေမပါဝင်နိုင်ခဲ့ပေမယ့် အာဂျင်တီးနားဟာ ပွဲအစမှာပဲ ဦးဆောင်ဂိုးတွေစောစောစီးစီးရရှိခဲ့တာဖြစ်ပါတယ်။ အာဂျင်တီးနားအတွက်ပထမဆုံးဦးဆောင်ဂိုးကို ပွဲအစ ၄ မိနစ်မှာပဲ တိုက်စစ်မှူး ဂျူလီယန်အယ်လ်ဗာရက်ဇ်ကစတင်သွင်းယူပေးခဲ့ပြီး ၈ မိနစ်အကြာမှာ အန်ဇိုဖာနန်ဒက်ဇ်က ဒုတိယဦးဆောင်ဂိုးထပ်မံသွင်းယူပေးခဲ့ပါတယ်။ 

ဦးဆောင်ဂိုး ၂ ဂိုးအထိစောစောစီးစီးခွင့်ပြုခဲ့ရတဲ့ ဘရာဇီးဟာ ၂၆ မိနစ်မှာ ရရှိခဲ့တဲ့ ကွန်ဟာရဲ့ဂိုးနဲ့ ပြန်လာနိုင်ဖို့ကြိုးစားခဲ့ပေမယ့် ၃၇ မိနစ်မှာ မက်အလစ္စတာရဲ့ဂိုးကို ထပ်မံခွင်ပြုခဲ့ရတာကြောင့် ပထမပိုင်းမှာပဲ ၃-၁ နဲ့ရှုံးနိမ့်နေခဲ့တာဖြစ်ပါတယ်။ ဒုတိယပိုင်းမှာလည်း ဂိုးလိုအပ်နေတဲ့ ဘရာဇီးက သွင်းဂိုးထပ်မံမရရှိခဲ့ဘဲ လူစားဝင်ကစားသမား ဆီမြွန်နီက အာဂျင်တီးနားအတွက် အနိုင်ပြတ်သားစေမယ့်ဂိုးကို ၇၁ မိနစ်မှာ ထပ်မံသွင်းယူခဲ့ပါတယ်။ 

ယခုပွဲစဉ်ရလဒ်ကြောင့် အာဂျင်တီးနားဟာ တောင်အမေရိကဇုန် ကမ္ဘာ့ဖလားခြေစစ်ပွဲအုပ်စုမှာ ဒုတိယနေရာက အီကွေဒေါကို ရမှတ် ၈ မှတ်အထိဖြတ်တောက်ဦးဆောင်နိုင်ခဲ့ပေမယ့် ဘရာဇီးကတော့ စတုတ္ထနေရာအထိ ကျဆင်းသွားခဲ့ပြီး အာဂျင်တီးနားနဲ့ ရမှတ် ၁၀ မှတ်အထိကွာဟသွားခဲ့ပါတယ်။